1 Areng i leu ly kai teng y tym. 2 Mymy ly kai teng y, “Nang khumi cho awi, nang ly Israela mawichi ai khen iy nichi teng y kai i leu pei naichi thui pi. 3 Israela mawichi teng y Areng i leu pei nai tangai ai nai thui pi; mawi katheang kalenchi, tavochi, leaunghawichi teng y py kai, sa thai naira awm nai Areng i leu pei nai thui pi. Kai ly khumichi my mynchi chiu nai meingtym ka-sangchi taphra ai nai haisau kapato ai. 4 Maichamchi panawi iy mui katui leng patlum nai maichamchi py kapakawi pawn ai. Khumi bawibawichi py mymychi chiu nai mynchi i mo y tleh iy dei u ai. 5 Kai ly Israela chengchi i veu ai mychi i mynchi mo y hei pi phro ai. Nichi i hiuchi ai maicham ka-kira y hei ai. 6 Israela chengchi i mary bawibawichi ly khumi angso savai tlang iy chiu sa naira meingtym ka-sangchi ai taphra nai deaungkho y, nichi i maichamchi hawi mynchi ly taphra piu iy kawi seaungkhrang pawn ai. Mui katui leng patlum nai maichamchi py kawi piupa pawn iy, nichi i sa nai ngiereichi ly tama pawn ai. 7 Khumichi ai ly meingtym tleirei y tleh iy dei u ai. Hini ly kai, Areng ne, nanai pany u ai.

8 “Kai ly khumi phyreichi ai haisau tamo i nai tleaung hai iy, pri takhra tleirei y ahei hai ai. 9 Nichi ly huni meingtym y pri palara avum nai khumi kamta awm u ai. Huna nai khala law tleaung nai khumichi ly kai ai pany u ai. Mymychi i ka-ym by y nai paleung hawi kai ai khai su iy, mynchi ai kai tleaung y paleung bie u keh nai deaungkho y, kai ly mana tanrei paleung si na mo, nanai pany u ai. Hunaibaly mymychi i sa nai hawi y naichi molam y mymychi naimy apaso u ai. 10 Kai ly Areng ne, nanai py, kai i pany hai yb naichi ly ram atyhtyh naichi ny y, nanai py nichi pany u ai,” napi.

11 Sa thai naira awm nai Areng my, “Nangchi ly Israela chengchi i sa nai amso ngai nairachi molam y kiu atabeng ly! kheu achiu u! Paleungsi naimy vo tangam u. Nichi ly tavai keung y, ti y baly tahum takang y, ti y baly no kanghawi y mo dei u ai. 12 Kamlo y tym nai khumichi ly no-na y dei u ai i, kang sa i khumichi ly tavai keung y dei u ai. Dei kamthumchi ly kajeu kanglam y dei u ai. Nichi ly kai i khri pa-rei kado thau nai angym pa-rei avum u ai. 13 Khumi veuchi ly mynchi sala y hawi maichamchi ka-kira y py, mawi ka-sangchi hawi mawi saleung tleirei y py, heng-yh nai dengkeaung keungchi hawi ngopraibiu keung pui ngierei anui y py, mynchi teng y mui katui leng patlum nai ngiereira y py, ahei naimy awm ai. Huna nai khala kai ly Areng ne, nanai khumi bawibawichi my pany u ai. 14 Kai ly kiu pheu iy nichi i pri taphra ai. Israela chengchi i awm nai meingtym ngierei y kangheng patleaung y naimy, tokalawi mang daichi ka-vym dengdai, tosyh mang Riblah mary khrairei, khumi angso savai tlang nai meingtym kalawn hai ai. Huna nai khala kai ly Areng ne, nanai khumi bawibawichi my pany u ai.