1 Huni khumi ly kai ai nisi ngan mang y mo tha nai katheu pa-kho mang y hawi jo nai ne; 2 Ref 43.2: Ezek 10:3,4,18,19; 11:22,23; Amt 1:15. hu y ly Israela chengchi i Tameuh i kangvang nang parai nai ly nisi mang dengdairei theu nai kaniu. Tameuh i raawi ly pangli tui kamsau katyn hawi atawm. Khaileaung pri py mymy i nang parai nai hawimy angvang na bo. 3 Hini paleung mei y niu nai ly Tameuh my Jerusalem mary taphra ai nai ang jeu nai neng khala, kai i paleung mei y niu nai hawi Kheba tavo sahawi y kai i paleung mei y niu naichi ly atawm nai ne. Huna nai y kai ly atlym i, khaileaung y ambeu bo. 4 Nang parai nai kangvang ly nisi katheu pa-kho dengdairei, Achura yhm theung mang y kun jo nai ne.

5 Areng i phailo ly kai ai ang kateang iy, apai theung i ly-um mang y ang hawi bo. Achura yhm ly Areng i nang parai nai hawimy kawi nanai ly huni mangmy niu nai ne. 6 Huni khumi ly kai i sahawi y angdo nai thym khala, Achura yhm theung i dengdai Areng my leu pei nai kai ly thai bo. 7 Mymy ly “Nang khumicho awi, hi y ly kai i areng atehra awm; kai i kheu chiura meingtym ne. Kai ly hini meingtym y Israela chengchi hawi vanrei awm ai i, nichi ai deungtasarei peang ai. Israela chengchi py ne sy, nichi i samrangchi py ne sy, phailo mang y kamleaung sa nai py, samrangchi i veu ai meingtym ka-sangra y up nai py, kai i amyn kachai y mana khala py thui tamawn bi ai ny y. 8 Samrangchi ly mychi i katheu chenghengchi hawi katheu kheutangchi ai, kai i Achura yhm katheu chenghengchi hawi katheu kheutangchira y tabiri iy sa u. Huna nai y kai hawi nichi sala ly angpang harei arai khyh bo. Nichi ly amso ngai hawi nai cheaungkhangchi sa iy, kai i amyn kachai ai thui tamawn u bo. Huna nai y kai ly kado theu i, nichi ai taphra nai ne. 9 Vai ly nichi kamleaung sa nai hawi, tameuh takhrachi ai chiu nai anawn iy samrangchi i veu py patheu u pawn ai nai tla. Huna nai kamta sa u lawh baly kai ly nichi teng y deungtasarei awm jojo ai,” napi. 10 Naibaly Areng my thui bi nai ly “Nang khumicho awi, Israela chengchi ly mymychi i hawi y sa nai molam y kangji nga hai ai nai, Achura yhm i sa nai kamta sa ai nai nichi teng y pany hai ba. 11 Nichi ly mymychi i hawi y sa naichi molam y kangji nga u tatang lawh baly, Achura yhm ka-tawm khyp, kun theu nai pa-khochi, sa ai nai leaungsaichi, Achura yhm i reitachi thui pi pachai ba. Nichi sa palai thai ai nai hawi, sa patawm thai ai nai hunichi tajiu typ ba. 12 Achura yhm i vui reita leaungsaichi ly Achura yhm sa nai mawi saleung verei kachai ne,” napi.

13 Ref 43:13-17 Theu 27:1,2; 2 Neng 4:1. Achura yhm ai pata naira hawi maicham ai pata cham i, hina nai kamta ne. Maicham anui kheutang ka-ki kathiu miurei, kakau miurei awm nai tui lam awm; huni tui lam i angam mang i teng katho ly kiupui bi takawrei tho. 14 Maicham i anem keh nai sambeu ly miu nyhrei asang. Vai sambeu harei ly angchei sambeu i pakeang palyhrei y miurei awm riri iy, miu palyhrei asang. Vai sambeu harei bi nai ly hunai kamta, pa-nyh sambeu i pakeang palyhrei hawi atawm nai ne. 15 Tawnbawichi leng patlum nai hini salo keh nai sambeu py miu palyhrei asang teang. Huni i taki palyhrei ly maicham salo y kachawnchi theu nai ne. 16 Huni maicham i saleung ly taki palyhrei awm i, jeng ka miu holai nyhrei awm bawibawi. 17 Sala i sambeu py taki palyhrei awm teang i, jeng ka miu holai palyhrei awm bawibawi teang. Huni sambeu tengpang ka-ki kathiu ly kiupui bi takawrei awm. (Tui lam ly miurei kau.) Maicham y lyn ai nai khailei ly nisi mang y awm.

18 Sa thai naira angym nai Areng my kai teng y, “Nang khumicho awi, kai i thui nai tangai ba. Maicham sa chum nai khala, nang ly tawnbawichi leng patlum nai, tawnbawichi i thi hawi maichamra katheng iy maicham khai takhra ai nai tla. 19 Kai i mo y kun iy apathyp naichi ly Zadok i kangpreang Levi khumi pathyp pi nai keungchi ne ai nai tla. Hini ly sa thai naira angym nai kai, Areng i thui nai leu ne. Nang ly kamngo alawra apathyp ai nai si katai beaungjeaung harei, nichi teng y pei ai nai tla. 20 Nang ly huni si thi phyrei la iy maicham taki kachawnchi, sala sambeu takichi hawi, maicham tengpang ka-kichi salo y leih ai nai tla. Huna nai kamta nang ly maicham pachai iy talam ai nai tla. 21 Kamngo alawra talam nai si katai beaungjeaung ai la iy, huni ai ly Achura yhm angam mang i khai takhra nai meingtymra y, mai leng vui ai nai tla. 22 Khawn mang y ly no-na by y nai mi-i katai harei la iy, kamngo alawra apathyp ai nai i vui y talam ai nai tla. Huni maicham ai si thi hawi pachai nai kamta ly mi-i thi hawi pachai ai nai tla. 23 Huna nai sa chum baly no-na by y nai si katai beaungjeaung harei hawi beram katai harei la iy, 24 kai teng y jeu hai. Pathyp pi nai keungchi ly huni tawnbawichira palawi phui iy, kai teng y leng patlum ai nai tla. 25 Nang ly kani saryhrei sala kani tleirei, mi-i katai harei, si katai harei, beram katai harei ai kamngo alawra apathyp ai nai vui y talam ai nai tla. Huni tawnbawichi ly no-na by y ai nai tla. 26 Pathyp pi nai keungchi ly kani saryhrei sala y maicham pachai chum baly, teaung ai nai vui y khai rym ai nai tla. 27 Kani saryhrei bo y pathyp pi nai keungchi ly khumichi i vui leng patlum nai kapathyprachi, amkawm nai kapathyprachi talam amteaung ai nai tla. Huna nai khala kai ly nangchi bawibawi ai kang kawn pi ai. Hini ly sa thai naira angym nai kai, Areng my pei nai leu ne,” napi.