44
1 Huni khumi ly kai ai Achura yhm meingtym nisi mang y awm nai angam mang i katheu pa-kho mang y ang hawi jo bo. Katheu pa-kho ly kho typ nai ne.
2 Areng my kai teng y, “Hini katheu ly kho typ ai nai tla; mana khala py paeaung ai ny y. Khumicho ngierei ly hini katheu teaung ai nai nga ai ny y. Ati mana nai mo na baly kai, Israela chengchi i Areng Tameuh ly huni katheu pa-kho mang kun nai deaungkho y ne. Huni katheu ly akho typ jo ai nai tla.
3 Na i py vai peang nai samrang ly huni mang y chei iy, kai i mo y teicha teinei kachai cha ai nai nga; ni ly kachawn keh i takun pui tako prei iy hini katheu mang kun theu ai,” napi.
4 Naibaly huni khumi ly kai ai tosyh mang i katheu pa-kho tako prei iy Achura yhm mo y hawi i, kai khen nai khala, Areng i Achura yhm ly mymy i nang parai nai kangvang kawi nai kaniu; kai ly khaileaung y ambeu vui na bo.
5 Areng my py kai teng y, “Nang khumicho awi, nang i niu nai thai nai ngiereichi ai adawn patyp ba. Kai ly Achura yhm molam reitachi kang thui pi ai. Mani khumi ly Achura yhm theung y kun pajau, theu pajau mo, nanai hawihai palai pany kheng ba.
6 “Atiu reng nai Israela chengchi teng y, mymychi i sa reng nai amso ngai nairachi ai sa thai naira angym nai kai, Areng ly paleung amnym pi jojo ai ny y, nanai thui pi.
7 Thau hawi thi ai, kai teng y talam nai thym khala, nichi ly lengkhym takip y nai cheng takhrachi hawi, kai i leu tangai y nai khumichi ai Achura yhm theung y kun ai nai pei iy, kai i Achura yhm chai hai y bo. Hunai deaungkho y kai i khumichi ly mymychi i sa nai amso ngai nai cheaungkhangchi hawimy, kai i Leu Maikawm ai taphra u nai ne.
8 Nichi ly kai i Achura yhm y reita kachaichi sa ai nai tleaung y ly cheng takhra khumichi ai sa hai lawh bo.
9 “Lengkhym takip y nai cheng takhra khumichi, kai i leu tangai y nai khumichi, Israela chengchi hawi vanrei awm nai cheng takhra khumichi ne lawh teu i py, kai i Achura yhm theung y kun ai nai nga u ai ny y, nanai sa thai naira angym nai kai, Areng my pei nai leu ne,” napi.
10 Areng my kai teng y, “Mynchi ai chiu nai Israela chengchi hawi vanrei, kai ai hi vui nai Levi khumichi ly kamngo pajeng naira avum u ai.
11 Nichi ly Achura yhm katheu pa-kho typ nai kalopchi, Achura yhm i atiti kalopchi napi nai, kai i kalopchi sa ai nai nga u nai ne. Nichi ly leng patlum nai katalamrachi hawi apathyp ai nai i vui y, khumichi my pei nai tawnbawichi tleh ai nai nga u; huni bo y py nichi ly atitichi sabawm ai nai Achura yhm y awm ai nai tla.
12 Na i py nichi ly Israela chengchi ai myn chiu naira y lu sa iy kamngo sa hai nai deaungkho y, kamngo pajeng naira avum u ai, nanai sa thai naira angym nai kai, Areng ly vaineng abeu bo.
13 Nichi ly pathyp pi nai keungchi kamta, kai i kalop sa ai nai ngo u y ai. Chai parai nai ha harei sahawi y ahihawi ai nai py nga ai ny y; khri pa-rei chai parai nai meingtym mang y py kun ai nai nga ai ny y. Hini pajeng naira ly mychi i sa nai amso ngai nairachi molam y ne.
14 Achura yhm y miseaungchi naini sa ai avo nai kalopchi sa ai nai kaimy pei ai,” napi.
15 Sa thai naira angym nai Areng my, “Na i py takhra Israela chengchi my kai ai nithun thun nai khala, Zadok i kangpreang Levi khumi pathyp pi nai keungchi ly Achura yhm y kai i kalop ai, ka-ym awm parai naimy sa u jojo nai ne. Hunai deaungkho y nichi ly vai, kai i kalop sa nai khumichi lawm u ai. Kai i mo y jeu iy tawnbawichi i thau hawi thi talam u ai.
16 Nichi naini kai i Achura yhm theung y kun iy, kai i maichamra kalop sa nai Achura yhm y chiu naira y lu sa u ai.
17 Ref 44.17,18: Theu 28:39-43; Lev 16:4. Nichi ly apai katheu pa-kho dengdairei Achura yhm apai theung y kun nai khala, kanih mai ka-synchi amthyp ai nai tla. Apai theung y py, Achura yhm theung y py kalop sa nai khala, mani beram mui kanih mo py amthyp ai nai tlo y.
18 Ka-ui theu y ai nai kanih mai ka-syn lupeu ajeng iy, kanih mai ka-syn phangphi na u ai nai tla. Na i py khobai akawm ai nai tlo y.
19 Ref 44.19: Lev 16:23. Nichi ly khumichi awm nai apai angam mang ly-um y theu y rai khala, nichi ly mymychi kalop sa thym khala i amthyp nai ateaungchi aleng iy chai parai nai takunchira khai ai nai tla. Khumichi teng y ka-jeira pei y ai nai, ateaung kachaichi ly takhra ateaungchi hawi atha ai nai tla.
20 Ref 44.20: Lev 21:5. “Nichi ly mychi i sam vau ai nai tlo y; sam kasau py khai ai nai tlo y. Kasau hawi khyp ryrei khai ai nai tla khyh.
21 Ref 44.21: Lev 10:9. Pathyp pi nai keungchi ly Achura yhm apai theung i ly-um mang y theu y rai khala, kreip hang nei ai nai tlo y.
22 Ref 44.22: Lev 21:7,13,14. Pathyp pi nai keung ami py juvo akhai nai neampachy hawi apom ngau y. Israela anglo lengmyn, ti y baly pathyp pi nai keung i aju tavau hawi naini apom thai khyh.
23 Ref 44.23: Lev 10:10. “Pathyp pi nai keungchi ly chai nai hawi, chai y nairachi takhra nai sai, reita y chai nai hawi chai y nairachi takhra nai py, khumichi teng y patiu pi ai nai tla.
24 Ka-jo ka-thui sai sairei awm lawh nai khala nichi ly kai i reita kamta chih pi ai nai tla. Reita pawichi ai kai i reita hawi leu pei nai kamta sa ai nai tla. Anawn kani ai kani kachai palawn iy teaung ai nai tla.
25 Ref 44.25: Lev 21:1-4. “Pathyp pi nai keung ly khumi tlaiveu ai nam nai molam y amymy ai, reita leaungsai y chai y pa-rei sa ai nai tlo y. Na i py ni ly my i amhm ampo, cho chanau, amjo amnau, juvo nang y nai tuichochi i veu ly nam pajau nai ne.
26 Huna nai amymy ai kachai sa chum baly kani saryhrei kaja sa ai nai tla.
27 Naibaly Achura yhm apai theung i ly-um y kun iy, amy ai apachai ai nai i vui y apathyp ai nai tla. Huna khala naini ni ly Achura yhm theung y kalop sa ali teang ai nai nga ai. Hini ly sa thai naira angym nai kai, Areng my pei nai leu ne.
28 Ref 44.28: Kati 18:20. “Israela chengchi teng y kaimy pei naichi theung i pathyp pi nai keungchi amtym ai nai phy ly pathyp pi nai keung kalop ne. Nichi ly Israela pri y khaileaung meingtym amtym ai nai ngo y, nichi amtym ai nai ly kai ne.
29 Ref 44.28: Kati 18:20. Pathyp pi nai keungchi ly teicha teinei katalamra, kamngo alaw nai kapathypra hawi sa tamang nai kapathyprachi cha ai nai nga u ai. Huni bo y py nichi ly Israela pri y kai i vui khai takhra nai ngiereichi nga u ai.
30 Pathyp pi nai keungchi ly amti amjang chalu hawi keh nai hawi, kai teng y talam nai takhra kapathypra ngireichi amtym u ai. Khumichi ly tako paawp nai tleirei pathyp pi nai keung ai, paawp angchei nai tako talam pi ai nai tla. Huna nai khala kai i amtheaung naira ly nichi i yhmchira y tym ai.
31 Ref 44.31: Lev 22:8. Pathyp pi nai keungchi ly alyly naimy mo, mawi kasi my kei i dei nai tavo mo, ti y baly daichi mawichi mo, cha ai nai tlo y,” napi.