1 Huni khumi ly kai ai apai angam mang i ly-um mang y anghawi i, Achura yhm tosyh ngan i yhm mang y hawi jo bo. Huni ly Achura yhm nidym ngan katem i yhm hawi palo tleh y. 2 Huni yhm ly jeng miu chungvairei, ka ly miu vuipangrei awm. 3 Huni yhm i mo mang ly Achura yhm hawi kamjyn miu apomrei kau nai khaileaung kango mang mo tha iy, apai angam mang i ly-um nithun mang i lengseaung padai nai lam mang py mo tha nai ne. Huni yhm ai ly khaileaung sambeu thomrei salo y sa. 4 Tosyh ngan mang y huni yhm hawi kamjyn lam harei awm; huni lam jeng ly miu chungvairei, ka ly miu horei kau. Huni tosyh ngan mang my, huni yhm theung y kun ai nai pa-khochi awm. 5 Ka-sang mang i takunchi ly sala i hawi anui keh i takunchi tleaung y amchei keh. Ati mana nai mo na baly huni takunchi ai nithun mang y panaw iy sa nai ne. 6 Khaileaung sambeu thomrei i takunchi ly khaileaung adym ka-sangchira y sa nai deaungkho y, hunichi ly apai angam mang i ly-umra y sa nai takhra yhmchi kamta, lengseaung yhmmawmchi by y. 7-8 Ka-nem y awm nai yhm angpang ly jeng ka-hyhrei nai ly miu vuipangrei awm; huni bo i miu vuipangrei kamjynra ly takunchi awm. Salo keh khaileaung sambeura sa nai yhmchira y takunchi awm nai ne. 9-10 Hini takunchi anui y awm nai yhm i nisi kachawn apai angam mang ly-um katemra y, apai angam mang i ly-um mang theu ai nai pa-kho awm.

Achura yhm tokalawi ngan apai jeungrei ly Achura yhm angam mang i apai hawi amtawn iy, apai angpang kangka y takunchi awm. 11 Takunchi i mo y ly tosyh ngan mang i kamta lam harei awm; huni takunchi amto, ka-tawm khyp hawi katheu pa-khochi ly tosyh ngan mang i takunchi kamta ne teang. 12 Hini yhmchi i tokalawi ngan mang y awm nai takunchi anui y ly apai sa amteaung nai nisi kachawnra y katheu pa-kho harei awm.

13 Huni khumi my kai ai, “Hini yhm nyhrei ly kachai ne. Areng i mo y kun nai pathyp pi nai keungchi ly huni yhmchi theung i, chai keh nai katalamrachi cha ai nai nga. Huni takunchi ly chai nai deaungkho y, pathyp pi nai keungchi ly teicha teinei katalamra, kamngo ahui nai kapathypra hawi, sa tamang nai kapathypra napi nai khri pa-rei chai parai nai katalamrachi khai u nai ne. 14 Pathyp pi nai keungchi ly Achura yhm theung y tym nai bo y, Achura yhm apai angam mang ly-um y theu ai nai ngai baly, Areng teng y apathyp nai thym khala i amthyp nai ateaung kachaichi ai, huni takunchira aleng ai nai tla. Nichi ly khumi humchi achu naira mang y theu y rai khala, ateaungchi atha ai nai tla,” napi.

15 Huni khumi ly Achura yhm theung mang i kakau pata chum baly, kai ai nisi mang i katheu dengdai ang hawi iy, angam mang i kakau pata bo. 16 Ni ly pata naira la iy nisi mang kakau patau, miu chungvai pangrei awm. 17-19 Huni bo y tosyh ngan tokalawi ngan hawi nidym nganchi ai pata i, hunichi i kakau ly kasau miu chungvai pangrei awm bawibawi nai ne. 20 Hunai deaungkho y apai ly jeang, ka ka-meaung miu chungvai pangrei awm nai khaileaungra pahi nai ne. Hini apai my meingtym kachai hawi chai y nai meingtym ai patleh takhra bo.