3
1 Ref 3.1-3: Amt 10:9,10. Tameuh my, “Nang khumi cho awi, hini cha aeang cho; naibaly Israela khumichi teng y chei iy leu thui pi,” ang napi.
2 Hunai deaungkho y kai ly labeaung kaang i, mymy ly kai cha ai nai cha aeang ang pei.
3 Mymy ly “Nang khumi cho awi, nang ai kang pei nai cha aeang ai kajeu angjeng na pa-rei cho,” ang napi nai deaungkho y, kai ly kacha nai khala huni cha aeang ly khawi hang kamta tui.
4 Naibaly Tameuh my, “Nang khumi cho awi, Israela khumichi teng y chei iy kai i leu pei nai ngiereichi thui pi.
5 Kai ly sailang amny amcha y nai leu hawi, rai parai nai cheng takhra leu katheu nai khumichi theung y kang pato nai ny y. Israela chengchi teng y kang pato nai teu.
6 Sailang amny amcha y nai leu hawi, nang pany ai nai rai parai nai leuchi katheu nai khumi cheng kalenchi teng y, nang ai kang pato nai ny y; kang pato lawh teu khyly, huni khumichi ly nang i leu tangai u ai.
7 Na i py mani Israela khumichi ly nang i leu tangai u ai ny y. Nichi ly kai i leu ai malawn py tangai u ai ny y. Nichi bawibawi ly paleung tang iy leu atangai y nai khumichi ne.
8 Vai, kai ly nang ai huni khumichi kamta paleung tang hai iy, paleung kang palen teang ai.
9 Kai ly nang ai lengseaung tleaung y malawn py tang hai iy, diamond kamta tang hai ai. Huni tiu ham nai khumichi ai jei moh, kaso theu moh,’ napi.
10 Tameuh my thui pi bi nai ly “Nang khumi cho awi, kai i leu kang pei nai ngiereichi ai hawihai palai tangai iy dawn patyp ba.
11 Naibaly pri palara avum nai nang i chengchi teng y chei ba. Nichi ly nang i leu ai tahm khai i py ne sy, tahm khai y i py ne sy, kai, sa thai naira angym nai Areng my leu pei nai thui pi,” napi.
12 Naibaly Tameuh i phailo my kai ai ang kateang nai khala kai i nithun mang, “Kani pri mang y awm nai Areng i nang parai nai ai palo u!,” nanai kani pajyh nai katyn kamta tyn amsau nai kathai bo.
13 Heng nai amjy palyhreichi i ali theung y pakhi aho nai katyn py, ka-ri amli nai kheuchi i katyn py, kai ly thai nai ne. Huni katynchi ly kalei theu nai katyn hawi atawm.
14 Areng ly sa thai naira len parai nai hawimy kai i tlang tleaung y tym iy, phailo my kai ai hawi jo nai khala, kai ly paleung phra, kado theu naimy abang bo.
15 Hunai deaungkho y kai ly pri palara avum nai khumichi awm nai Kheba tavo sahawi i Tela Abi avang y chei iy, kai i niu nai atitichi molam y kani saryhrei athengra nai mynkym vui bo.
(Ezek 33:1-9)
16 Kani saryhrei bo khala Areng ly kai teng y leu ang pei bo.
17 “Nang khumi cho awi, kai ly Israela chengchi i vui y nang ai tamcheaung kang khai ai. Kaimy pany hai nai leuchi tangai iy, nang ly nichi teng y amti pi ai nai tla.
18 Kaimy hawi y sa nai khumi leaungrei ly dei ai nai tla, nanai thui i py, huni khumi dei y pa-rei nang ly khumi kahawi sa vui ai nai lam patei pi y lawh baly, huni khumi ly my i kamngolai y dei ai; huna nai khala huni khumi i dei nai molam ly nang i phu ne.
19 Nang ly kamngo sa nai khumi leaungrei ai, ni i tamang nai ai thui parip teu i py, ni ly mymy i hawi y sa naichi anawn y lawh baly, mymy i sa tamang nai kamngo molam y dei ai. Huna nai khala kai ly nang ai kangheng patleaung ai.
20 “Khumi kahawi leaungrei ly hawi y naira sa nai khala y, kai ly ni ai ka-jeira tym hai ai. Huna nai khala nang ly ni i hawi y sa nai ai thui parip y naimy awm lawh baly, ni ly mymy i sa tamang nai kamngo y dei ai. Vaichi khala y ni i kahawi sa naichi ai kaimy pany pi ai ny y. Huna nai khala huni khumi i dei nai molam ly nang i phu ne.
21 Nang ly khumi kahawi leaungrei ai kamngo so y ai nai thui parip iy, ni py nang i leu tangai nai y kamngo so y naimy awm lawh baly, ni ly dei ai ny y, nang py kangheng tleaung ai,” napi.
22 Kai ly Areng i sa thai naira haiho avum i, mymy ly kai teng y, “Angthau ly leaunghawi theung mang y chei ba; huni meingtymra nang teng y leu kang pei ai,” nanai leu raawi thai bo.
23 Hunai deaungkho y kai ly leaunghawi mang y kachei i, Kheba tavo sahawi y kaniu nai kamta, hunira y Areng i nang parai nai kaniu; naibaly kai ly khaileaung y atlym i ambeu vui bo.
24 Na i py Tameuh i phailo ly kai i taku theung y kun i, kai ai angdo hai bo. Areng my, “Nang ly nangmy i yhm y vawi iy yhm y aeung ba.
25 Nang khumi cho awi, nang ai vuinawn hawi kang kawm cheng ai i, nang ly khumi mipuichi i mo y theu pajau ai ny y.
26 Huni tiusi nai khumichi ai leu pei thai y na pa-rei, kai ly nang i palai ai dangkangra y akau hai thleng ai.
27 Naibaly nang ai kaimy thui hai ali teang ai ngai nai khala y, nang ai leu katheu teang ai nai kang pei ai. Huna nai khala nang ly nichi teng y kai i sa thai naira angym nai Areng my hina nai ang thui pi, nanai amti pi ai nai tla ai. Phyrei khumichi ly nang i leu tangai iy, phyrei khumichi ly tangai y naimy awm u ai. Ati mana nai mo na baly nichi ly tiusi nai khumi cheng ne nai deaungkho y ne.