2
1 “Nang khumi cho awi, ang thau jau. Nang ai leu kang thui pi ai,” napi.
2 Huni leu raawi thai nai thym khala y my Tameuh i phailo ly kai teng y kun iy, kai ai sabawm nai angdo hai bo. Naibaly raawi theu bi i,
3 “Nang khumi cho awi, kai ai tiu nai Israela khumichi theng y nang ai kang pato ai. Nichi ly mymychi i amsi pajochi kamta, vai khrairei kai ai ang tiu u nai ne.
4 Nichi ly paleung tang iy kai ai tahm khai u y; kai ati cheaungkhang sa thai nai Areng my ati thui pi nai mo, nanai nichi teng y amti pi ai nai nang ai, nichi theung y kang pato ai.
5 Nichi ly tiusi nai khumichi ne nai deaungkho y, nang i leu tangai i py ne sy, tangai y i py ne sy, mymychi theung y amo leaungrei awm, nanai pany u ai.
6 “Na i py nang, khumi cho awi, nang ly nichi ai py, nichi i thui nai leu ai py jei moh, kaso py theu moh. Nichi ly nang ai aleng keungchi kamta ang katanmeuh ai. Nang ly kani taai reaung y awm nai kamta lawm ai. Nichi ly huna nai atiu reng nai khumichi ne nai deaungkho y ne.
7 Nichi tangai i py ne sy, tangai y i py ne sy, kai i leu pei nai ngiereichi thui pi ai nai tla. Nichi ly atiu ham, nanai pany jo ba.
8 “Nang khumi cho awi, kai i leu pei nai tangai ly nichi kamta tiu moh; nang i labeaung ang ly kai i pei nai cho,” napi.
9 Ref 2.9,10: Amt 5:1. Naibaly cha aeang harei syn nai kiu makengrei ly kai i awm naira mang y talam pi nai kaniu.
10 Huni kiu ly cha aeang lam nai khala, phei nyhreira y cha mawi awm mei nai kaniu. Huni cha aeang phei nyhreira y, paleung si vo tangam nai chachi abawi nai ne.