9
1 Kai ly hini leaungsai bawibawichi ai khri pa-rei adawn pasym nai khala y, Tameuh ly khumi kachengchi hawi khumi kahawichi i sa nai saichi kasum typ nai hawi, nichi i tamen nai paleung hawi niu ngai y nai paleung ai py kasum typ, nanai py kapany. Mo mang y tym ai nai atitichi ai py pany y, pany i py ati sai py ny y.
2 Khumi kahawi hawi khumi aso y naichi py, neaung hawi nai khumi hawi kyh nai khumi py, Tameuh i reita y paleung apei nai khumi hawi paleung apei y nai khumichi py, kapathypra talam nai khumi hawi talam y nai khumi py, atawm riri nai khym taham ly avum u nai ne. Neaung hawi nai khumi ly kamngo sa nai khumi tleaung y hawi keh nai ny y, vaineng abeu nai khumi ly vaineng abeu y nai khumi tleaung y hawi keh lawh y leang.
3 Huni khumi bawibawichi py khym taham ly vanrei avum u nai ne; hini leaungsaichi py hini khaileaung pri y tym nai takhra leaungsaichi kamta, leu meitang adyh adawi naira by y. Khumichi ly heng nai ryrei, nichi i paleung ly hawi y naira hawi pathu naira my kawi nai ne i, nichi ly vaimy dei u ryp nai ne.
4 Na i py heng nai amjy awm nai khaileaung pri y, heng nai bawibawichi i vui athang khai naira maidenreichy awm rai; heng nai ui ly dei nai khrangsi tleaung y hawi keh.
5 Hini leu ly teng khyp; heng nai khumichi ly mymychi dei ai nai pany; khumi kadeichi ly ati sai py pany y. Nichi ly kawn vang nga bi ai naira by y, khumichi ly nichi ai pipi pany y leang bo.
6 Nichi i tamen nai paleung, niu ngai y nai paleung hawi, takhra ngai phi teng y nai paleung bawibawichi ly mymychi hawi vanrei tama be veng bo. Nichi ly hini khaileaung pri y tym nai atitichi theung y abawi pajau y leang bo.
7 Huna nai y nang ly nangmy i teicha teinei cha iy amo theu naimy awm ba; nangmy i kreip hang nei iy amo theu naimy awm ba; nang i atiti sa naichi ai Tameuh my kawn nai ne.
8 Nang ly avawrei amo theu nai mo amteng ba.
9 Hini khaileaung pri y nang ai Tameuh my ang pei nai heng nai sala ryrei ly kani tleirei, nangmy i khrei nai neampachy hawi amo theu naimy awm ba. Ati mana nai mo nabaly nangmy i patang parai naimy sa naichi molam y, nang i nga ai nai kawn vang ly hini ryrei khyh nai deaungkho y ne.
10 Nang i sa ai nai kalopchi bawibawira y atho angai naimy so; ati mana nai mo nabaly nang i chei ai nai tavau pri y ly kalop sa nai by y, adawn pasym nai by y, cheng naira by y, pany thai naira py by y nai deaungkho y ne.
11 Kai i pany nai takhra leaungsai harei nai ly hini ne he: hini khaileaung pri y angpreng rang parai nai khumi ly ampreng acham naira tleirei y eaung jojo ai, nanai thui pajau y; sorai paleung awm nai khumi ly tavai atiu naira y eaung jojo ai, nanai thui pajau y; khumi kachengchi ly teicha teinei avaw vai y ai, nanai thui pajau y; tau cheng nai khumi ly nang jojo ai, nanai thui pajau y; sa thai naira awm nai khumi ly kalop kalenra y atheng jojo ai, nanai thui pajau y nai ne. Khumi luteng ly taham si naira avum reng.
12 Nang i vui neng kamki ly nangmy pany khyp pajau y leang; deaung y man nai tavochi kamta mo, paleupy y man nai ngochi kamta mo, achi ly taham si nai neng khala ly pany y naimy deaung y man reng nai ne.
13 Kai i niu nai takhra leaungsai harei awm rai; huni leaungsai my hini khaileaung pri y cheng naira ai khumichi my mana dawn mo, nanai hawihai palai pata pi nai awm.
14 Khumi nawi ryry y nai marychy harei awm; huni mary ai sa thai naira awm nai samrang leaungrei my tiu bo. Ni ly huni mary ai katanmeuh nai mary apaichi taphra iy kun ai nai angveirym bo.
15 Huni mary theung y khumi kamawn leaungrei awm; ni ly khri pa-rei tau cheng nai khumi ne nai deaungkho y, huni mary ai atleu pajau ai nai sa thai naira awm. Na i py ni ai ami py dawn y.
16 Tau cheng naira ly tlang atho tleaung y hawi keh, nanai kai ly avawrei thui nai ne. Na i py huni khumi kamawn ly tau cheng naira awm, nanai ami py athang khai y, ni i thui nai leu ai py tahm khai u y.
17 Khumi kacheng leaungrei my thui pi rypsy nai leu ai tangai nai ly khumi ka-khumchi i leu ka-rumra y lu sa nai khumi i aeu nai raawi tangai nai tleaung y hawi keh.
18 Tau cheng naira ly tavai ateaung tleaung y hawi keh; na i py kamngo sa nai khumi leaungrei ly hawi naira ai takhra hai pajau nai ne.