8
1 Khumi kacheng naini khaileaung pri i atiti awm nai sai pany nai ne. Tau cheng naira ly huni khumi i meimai y panuiyhm nai amteng hai iy, meimai takhuisui nai tama hai bo.
2 Samrang i leu tangai ba, Tameuh teng y leu adeu tamangtang moh.
3 Samrang ly mymy i ngai nai kamta sa pajau; huna nai y ni i mei ka-niu i nai theu vui. Huna nai kamta ka-jei nawi nai meingtym y awm moh.
4 Samrang i sa nai leaungsaichira y sa thai naira abawi; huna nai y ni i ati mo sa naira y deng patumpati pajau y.
5 Nang ly ni i leu tangai nai ryrei ly chymme naimy awm ai; khumi kacheng ly leu tangai ai nai lam hawi neng py pany.
6 Ati cheaungkhang sa naira y sa ai avo nai neng hawi avo nai lam awm; na i py achi i pany nai sai ly maidenreichy teu khyh lawh ly!
7 Mo mang y tym ai nai saichi ly achi theung y ami py pany y; hunichi ai achi teng y thui pi ai nai khumi leaungrei py by y.
8 Khumi ami py deira i lawi tleaung ai nai so pajau y; ti y baly dei ai nai kani kasyh vui thai y; hini atiu naira ly achi en vui thai y nai atiura ne. Li-tapawp iy achi tleaung pajau y leang.
9 Khumi phyreichi ly sa thai naira awm iy, phyreichi ly nichi my ana naira avum; hina nai avum nai khaileaung pri y khumichi i dawn nai, tau naichi ai dawn pasym nai khala y, hina naichi kaniu bo.
10 Khumichi ly khumi aso y naichi ai tapreaung y up chum nai vawi ali teang nai khala y, nichi i hawi y sa nai mary theung y nichi ai palo nai leu katheu u nai kai avum. Hini py atyhtyh teu.
11 Khumichi ly ati mana nai y hinai kamta hawi y sa ai nai rai y na mo? Ati mana nai mo nabaly hawi y sa nai ai tara chih pi kaliki y nai deaungkho y ne.
12 Khumi kamngo ly tlen chungvairei hawi y nai sa teu i py, heng thai nai ne. Khumichi my, “Tameuh i leu tangai nai khumi i vui ly cheaungkhangra y hawi ai;
13 na i py khumi hawi y nai i vui ly huna nai kamta hawi ai ny y. Nichi ly Tameuh i leu tangai y nai deaungkho y nichi i heng nai ly pa-pui kamta ne i, nichi ly hawi thym naimy dei u ai,” nanai thui u nai kai pany khyp bo.
14 Na i py huna nai thui nai ly ati sai py ny y. Hini khaileaung pri y tym nai sai ly mana mo, nanai khen cham; tlen tlenrei y khumi kahawichi ly khumi aso y naichi i avum nai pajeng naira avum u teang nai ne. Khumi aso y naichi py khumi kahawichi nga ai avo nai nang chawn naira nga u; hini py atyhtyh teu, nanai kathui nai ne.
15 Hunai deaungkho y khumi ly amo theu naimy awm ai nai avo, nanai kapany vau bo. Ati mana nai mo nabaly hini heng nai deung y ni i vui amo theu naira ly cha nai, nei nai hawi amo theu naimy awm naichi naini ne. Ni ly hini khaileaung pri y Tameuh my pei nai heng nai ryrei atho sa naimy awm nai ly thui tlam ai nabaly huna nai cha nei amo theu naimy awm pajau nai ne.
16 Kai ly hini khaileaung pri y awm nai leaungsaichi pany ai nai atho kasa iy nga nai ly nang ly vum kanithun, i y naimy atho sa teu i py,
17 mana khala py Tameuh i sa naichi pany thai ai nai ny y; khumi kachengchi my kaichi pany, nanai thui teu i py, nichi pany khyp y leang.