7
1 Ref 7.1: Lk 22:1. Khumi i tahm awm nai ly vang teng nai rimui tleaung y hawi keh nai ne. Huna nai kamta nang i dei nai kani ly tapen nai kani tleaung y hawikeh.
2 Sih tlaiveu keung y chei nai ly cha nai pawira chei nai tleaung y hawi keh; ati mana nai mo nabaly dei naira my achi bawibawi ai ajeng yb jo, nanai heng nai khumichi ly pany jo ai avo nai ne.
3 Paleungsi nai ly panui nai tleaung y hawi keh; paleung si nai ly nang i meimai aneaung hai rawm teu i py, nang i cheng naira ai atho nga haira nai ne.
4 Amo theu ai nai harei naini adawn jojo nai khumi ly khumi ka-khum ne. Khumi kacheng ly dei nai leaungsai adawn pasym reng.
5 Khumi kachengchi i thui parip nai tangai nai ly khumi ka-khumchi my palo nai tleaung y hawi keh.
6 Khumi ka-khum i panui nai raawi ly aleng keung y maimy kang nai katyn hawi atawm; huni i awm nai sai ly ati sai py ny y.
7 Khumi leaung leaungrei ai li-tapawp nai khumi kacheng ly khumi ka-khum i sa nai kamta sa nai khumi ne.
8 Ati mo sai sairei ai patem vui nai ly amteaung nai tleaung y hawi keh; paleung amnym nai ly amlyh am-e nai tleaung y hawikeh.
9 Ref 7.9: Jak 1:19. Nang i kado theu nai ly am-yh vui; paleung ka-e khai nai ly akhum nai ne.
10 Jangni i deung kangngym ly ati mana nai y, vai i deung tleaung y hawi keh lawh mo, nanai mana khala py deng reng moh. Huni ly khumi kacheng i deng nai leu ny y leang.
11 Heng nai khumi bawibawi ly tau cheng nai khumichi lawm ai nai avo; tau cheng naira ly yhmtheaung katui hawi atawm iy
12 paisa tangka kamta awmnem naira pei pajau. Tau cheng naira ly nang i heng naira ai ama hai pajau; hini ly tau cheng naira i hawira ne.
13 Tameuh i sa nai ai adawn pasym cham; Tameuh my akawi hai nai ly ami my pataw vui pajau ai mo?
14 Nang i vui ati cheaungkhang amsym naimy awm nai khala, amo theu naimy awm ba. Na i py patang naira avum nai khala y Tameuh my amo theu ai nai hawi patang ai nai ang pei bawi reng; mo mang y mana lawm ai mo, nanai nang pany pajau y leang; hunichi ai adawn pasym ba.
15 Kai i heng nai ly atyhtyh teu i py, kai ly ati cheaungkhang kaniu chum bo. Khumi kahawi ly deung dawi nai py, takhra khumi ly hawi y nai ne iy heng sau nai py kai ly niu.
16 Hunai deaungkho y khumi kahawi i hawi nai kamta khri pa-rei atho so ala moh, cheng naira py awm ala moh sy; hina nai hawimy amymy ai ati mana nai apadei ai tau lawh mo?
17 Nang ly khri pa-rei khumi aso y nai py lawm moh sy, ti y baly khri pa-rei khumi ka-khum py lawm moh sy. Ati mana nai y neng tym y naimy dei ai nai ngai lawh mo?
18 Hini amjy nyhrei ai amkyn ba. Nang ly Tameuh ai jei kaji nai khumi ne baly, ati py ne sy, eaung naira nga ai.
19 Samrang leaung horei ly mary harei ai kahawi sa pajau nai tleaung y, tau cheng naira ly khumi leaungrei ai huni tleaung y hawi naira sa pajau.
20 Avawrei hawi naira sa iy hawi y nai pipi so vai y nai khumi, nanai ly khaileaung salo y leaungrei py by y.
21 Khumichi i thui nai tleirei y tangai moh. Nang ly nangmy i miseaung my ang thui tamawn nai leu py thai tan thai lym ai.
22 Nangmy kypkyp my py takhra khumi ai neangneang thui tamawn, nanai nangmy apany keh nai ne.
23 Kai ly kaimy i cheng naira hawimy hini leaungsai bawibawichi cham iy khen bo; cheng naira nga ai nai atho kasa teu i py ngo y.
24 Khumi i heng nai sai ami pany pajau ai mo? Huni ly achi i vui khri pa-rei thiu parai, pany thai ai nai khri pa-rei rai parai.
25 Na i py kai ly tau cheng naira hawi pany thai naira ai kadawn pasym bo. Kai ly kaimy i deng nai leuchi kapany thai ai nai hawi, tau cheng naira py atho sa naimy kahau nai ne. Huni bo y aso y nai hawi akhum nai pany ai nai amtiu bo.
26 Kai ly dei naira tleaung y hawi y keh nai khumi ly parawi kawp reng nai neampachy ne, nanai kaniu. Ni i ang pei nai tamen naira ly deaung hawi paleupy kamta, nang ai patiu ai. Nang ai ang takawi nai ni i kiuchi py sengkry kamta khaw typ ai. Tameuh i kangai hawi avum nai khumi ly huni neampachy kiu tleaung i lawira nga ai; kamngo sa nai khumi ly tleaung ai ny y.
27 Kathiu dawn pasym kawp nai khumi kacheng my thui nai ly kai ly rai nairachi kapany ai nai hau nai thym y, hini satang ka-thui ka-thui pany nai ne. Takhra pany ai nairachi kahau i py niu y.
28 Neampacho leaung sangreichi theung y kaimy tahm khai pajau nai ly leaungrei ai naini kaniu khyh. Na i py neampachy leaung sangreichi theung y kaimy tahm khai pajau nai khumi leaungrei py kaniu y.
29 Kai i kapany nai ly Tameuh my achi ai kahawi ang sa nai ne i py, achi ly amychi ai khrukhrala nai khumichi lawm ai nai asa u lawh nai ne.