1 Hini khaileaung pri y khri pa-rei hawi y nai y adyh adawi y naira harei kaniu. 2 Tameuh ly khumi leaungrei teng y nang chawn ai nai, tahm awm ai nai, yhmtheaung katui hawi ngai nairachi pei. Na i py mymy ly huni khumi teng y hunichi amtym ai nai pei y; apany vai y nai khumi leaungrei teng y amtym ai nai pei reng. Hini leaungsai py atyhtyh teu, teng y nai ne. 3 Khumi leaungrei ly saneng neangneang heng sau iy cho chanau leaung chungvairei nga taing nga lym ai. Na i py ni ly amo theu nai sai py by y, avo nai kamta veu pavum ai nai py ngo y naimy dei lawh baly, pahaw nai deaungdi tleaung y hawi y keh, nanai kathui bo. 4 Huni deaungdi ai tapen nai ly kamran by y; ni ly kaveng theung y tama vui nai ne. Khumichi py ni ai tami u pawn bo. 5 Ni ly kanito kangvang niu y; khumi i heng nai sai py pany ai nai ngo y. Na i py awmnem naimy anawnra nga khyp bo. 6 Saneng sang nyhrei heng teu i py, amo theu naira ngo y naimy heng nai khumi tleaung y, huni pahaw nai deaungdi ly awmnem naimy anawnra nga lawh bo. Kangkhym y nini ly meingtym harei mang y chei ai tla nai ny y a?

7 Khumichi ly kajeu ka-rei i vui kalop sa u teu i py, mana khala py kajeu kawi pajau y. 8 Khumi kacheng ly khumi ka-khum tleaung y ati katlen nai awm mo? Khumi kamawn ly heng nai deung y avum thai nai ly ati kamranra nga mo? 9 Hini leaungsai py atyhtyh teu, ali ai patiu nai kamta ne. Sai sairei ngai jojo nai tleaung y, nang i nga nai ryrei hawimy paleung tuinem nai ly hawikeh alam.

10 Tym nai leaungsai ngiereichi ly jangni i dengdairei khai yb nai ne. Khumi ly amy tleaung y sa thai naira awm nai khumi hawi leu a-ei ai nai avo y, nanai achi bawibawi pany. 11 Huna nai a-ei ryry baly tamang rara iy nang i vui hawi tleaung hawira naira tym y leang. 12 Ati sai py ny y iy dawi ala nai, pa-pui kamta tama reng nai hengra ly khumi i vui hawi keh naira ami pany pajau ai mo? Khumi ami nai ly amy dei nai bo y, hini khaileaung pri y tym ai nai leaungsai mana pany pajau ai mo?