5
1 Nang ly Achura yhm y chei nai khala hawihai adawn ba. Hawi nai hawi y nai khawilang takhra ai pany y nai khumi ka-khum i apathyp nai tleaung y ly huni meingtym y chei iy tangai nai ly hawi keh alam nai ne.
2 Nang ly leu katheu y rai khala adawn pasym ba; Tameuh teng y leu adeu tamangtang moh. Mymy ly kani pri mang y awm i, nang ly khaileaung pri y awm. Hunai deaungkho y nang ly mymy teng y avo nai ryrei bo baly hnei panawi bi moh.
3 Nang ly paleung bi paleung mawn nai nawi baly, ka-jeira amang amangra nai ne. Nang ly leu katheu nai nawi ala baly ka-khum leuchi katheu lawh ai.
4 Ref 5.4: Sam 66:13,14. Nang ly leu neangneang katheu baly leu hawi y naichi katheu lawh ai. Hunai deaungkho y nang ly Tameuh teng y sai sairei leu adeu lawh baly, adeu nai kamta sa kaliki ai nai tla. Khumi ka-khum ly Tameuh i vui teaung ai nai ngo y leang. Nang ly nangmy i leu adeu nai kamta so ba.
5 Leu adeu nai khala atyp y baly, leu adeu y nai hawi keh alam nai ne.
6 Nang i leu deaungkho y kamngo lawm moh sy; huni katamangra sa ai nai kai, ka-dawn by y leang, nanai Tameuh i pathyp pi nai keung mo y ahui ai nai tlo moh sy. Ati mana nai y Tameuh ai kado theu hai lawh mo? Nang i sa nai kalopchi phra hai ai nai nang ly ati mana nai sa lawh mo?
7 Nang ly amang neangneang amang nai, ati sai py ny y nai kalop sa nai, leu peung ryry nai ne teu i py, Tameuh ai ly jei ai nai tla.
8 Pri peang nai keungchi my khumi kamawnchi ai ana nai py, nichi i nga ai avo nai pei pi y nai hawi ka-dyh ka-dawi so pi y nai py, nang niu nai khala rengrang ti moh. Miteaung kehchi malawn py mymychi tleaung y len nai khumichi i ama hai nai anui y awm u nai ne.
9 Samrang malawn py pakym achu nai amti amjangchi ai a-ym nai teu bo.
10 Nang ly tangka paleung no lawh baly, mana khala py paleung awmnemra awm ai ny y. Nang chawn ai nai ngai teu i py nangmy i kadeaung nai ryrei, yhmtheaung katui nga ai ny y, huni py atyhtyh teu.
11 Nang ly nang chawn lawh baly, pacho ai nai labeaung nawira ai. Nang i nang chawn nai ly nangmy naimy apany ai.
12 Kalop sa nai khumi ly kajeu kawi pa-rei cha ai nga nai py ne sy, cha ai nai ngo y nai py ne sy, i kamhm pei nai ne. Na i py khumi kanang ly nang chawn nai molam y paleung bi paleung mawn i, i kamhm pei y.
13 Hini khaileaung pri y khri pa-rei ka-jei hawi parai nai amjy harei ly hini ne: khumichi ly mo mang i neng y ngai nai khala y teaung ai nai tangkachi pateung u achu reng.
14 Naibaly sai sairei molam y huni tangkachi kheih be i, amychi i cho chanauchi ai yhmtheaung khai pi ai nai by y bo.
15 Ref 5.15: Job 1:21; Sam 49:17; 1 Ti 6:7. Achi ly hini khaileaung pri y tym nai neng khala i kamta, hini khaileaung pri i nai theu nai neng khala py bengtlairei theu ai tla nai ne. Kalopra khri pa-rei atho sa teu i py achi hawi vanrei ati sai py syn ai nai ngo thai y leang.
16 Hini leaungsai ly avo y leang; achi jeu nai khala i kamta ly vawi ali teang ai nai tla ai. achi ly ali ai patiu ai nai atho sa nai ly ati kamran nga mo?
17 Achi ly paleung bi paleung mawn nai, noso nai, kaveng theung y awm nai hawi paleung si naimy heng u nai ne.
18 Khumi ami py sa ai hawi keh nai kalop ly achi ai Tameuh my ang pei nai khumi i heng nai deung y cha nai, nei nai, amy haura i nga nai yhmtheaung katui amtym naimy awm ai nai ne, nanai kapany bo.
19 Tameuh my khumi leaungrei ai nang chawn nai hawi yhmtheaung katuichi pei iy amo theu hai lawh baly, huni khumi ly mymy ai kawn iy my i nga nai yhmtheaung katui py amtym ai avo. Huni yhmtheaung katuichi ly Tameuh my pei nai kawn vang ne.
20 Tameuh ly achi ai amo theu ai nai ang pei chum nai deaungkho y, achi ly amychi deung dawi nai molam y, ka-mawn ka-thui awm ai ny y leang bo.