4
1 Naibaly kai ly hini khaileaung pri i adyh adawi y nai sai kakhen lawh bo. Ana patang naira avum nai khumichi ly vo u; nichi ai sabawm ai nai khumi leaungrei py by y. Ati mana nai mo nabaly nichi ai ana nai khumichi ly sa thai naira awm nai deaungkho y ne.
2 Kai ly dei chum nai khumichi i tlang tleaung y paleung angai y lawh bo. Nichi ly heng nai khumichi tleaung y hawi keh nai ne.
3 Na i py huni dei nai, heng nai khumichi tleaung y tapen y rai naichi, hini khaileaung pri y awm nai adyh adawi y naichi hawi avum vai y nai khumichi ly hawi keh nai ne.
4 Khumichi ly eaung naira nga ai nai khri pa-rei atho sa u; ati mana nai mo nabaly nichi ly saleaung deaungpachi i, atiti nga nai molam y paleung ano nai deaungkho y ne, nanai kapany. Na i py hini atitichi ly atyhtyh teu; ali ai patiu nai kamta ne.
5 Kajeu alam iy dei ai nai pa-rei kiu atakawime naimy awm nai khumi ly khumi ka-khum ne, nanai thui achi awm.
6 Huni leu ly tengtan tenglym ai; na i py yhmtheaung katui maidenreichy hawi paleung tuinem naimy awm nai ly kiu nyhrei hawi kalop nawi naimy ali ai patiu nai tleaung y ly hawi keh alam nai ne.
7 Heng nai deung y ati sai py ny y nai takhra leaungsai harei py, kai ly adawn pasym lawh bo.
8 Khumi ami mo leaungrei ly mymy tlairei awm; ni ly chapo py by y, amjo amnau py by y; na i py ni ly kalop sa jojo. Mymy teng y awm nai yhmtheaung katuichi hawi mana khala py paleung anyp vai y. Ni ly huna tanrei atho sa iy amo theu naira y py paleung apei y naimy awm nai ly ami i vui mo? Hini py atyhtyh teu, paleung phra ai hawi nai heng nai sai py ne.
9 Khumi ly amy tlairei awm nai tleaung y leaung nyhrei awm ahawi nai ly hawi keh; ati mana nai mo nabaly nini ly leaung nyhrei abom iy kalop hawihai palai sa pajau nai ne.
10 Leaungrei atlym baly leaungrei my sabawm pajau; na i py amy tlairei awm khyh iy atlym lawh baly, ni ai sabawm ai nai khumi leaungrei py by y i, rai naira avum nai ne.
11 Savai parai lawh nai khala y khumi leaung nyhrei vanrei i ahawi baly bi-um ai; na i py khumi ly amy tlairei awm khyh lawh baly, mana bi-um hai ai mo?
12 Amy tlairei khyh nai y sum ai nai molam ly leaung nyhrei lawh baly amtang pajau nai ne. Thomrei tavawi nai vuinawn ly leu ai nai rai parai.
13-14 Khumi leaungrei ly khumi kamawn ne teu i py, mymy i pri y samrang lawm pajau, ti y baly theaung tla naira i nai samrang atehra tleaung y atheng pajau. Na i py huni samrang ly miteaung acheang nai neng khala y, katau adeng ahui y naimy ka-khum lawh baly, cheng nai khumi kamawn thawndeang leaungrei ly ni tleaung y hawi keh nai ne.
15 Kai ly hini khaileaung pri y awm nai khumi bawibawichi i satang dawn nai khala ly meingtym takhra hareira y nichi theung i samrang lyn ai nai thawndeang leaungrei awm, nanai kapany bo.
16 Samrang leaungrei my peang ai nai khumi vuikanai ly khai takhra nai by y. Samrang leaungrei dei nai bo y ni i sa nai sai molam ly ami py ni i tlang tleaung y kawn pi y leang. Huni py atyhtyh teu, ali ai patiu nai kamta ne.