32
1 “Kani khusang hawi khaileaung bom vereichi awi,
kai i thui nai ngiereichi ai hawihai palai tangai.
2 Kai i patiu pi naichi ly kani amai kamta tla iy,
khaileaung salo y kadam amai kamta angdeang ai.
Kai i leu ly keung dichychi tleaung y kani nai hai nai kamta py,
acha tleaung y kani nai hai sym nai kamta py lawm ai.
3 Kai ly Areng i amyn palo ai;
mymy i khumichi my ly mymy i nang parai nai sai thui u ai.
4 “Areng ly nangchi ai ama hai nai keung ne;
mymy i sa nai ngiereichi ly angym iy hawi parai.
Nangchi i Tameuh ly ka-ym awm nai hawi leu meitang py ne;
mymy ly apu parai nai hawi, hawi parai nai Tameuh py ne.
5 Na i py nangchi ly ka-ym by y, mymy i khumi lawm ai nai py ataing y,
kamngo kawi nai hawi li-tapawp nai khumi cheng theaungchi ne.
6 Cheng naira by y iy khumi ka-khumchi awi,
Areng ai hina nai kamta sa ai tla nai a?
Mymy ly nangchi ai sa nai keung, nangchi i ampo,
mymy ly nangchi ai khumi cheng harei ang lawn hai bo.
7 Lawn veng nai jangni i deung ai pany u,
atitichi tym nai saichi ngamhm ngampochi teng y deng u.
Saneng len nai miteaungchi teng y jangni i satangchi deng u.
8 Salo kangteng keh Tameuh ly pri tleirei i khujyhchi py,
khumi cheng neangneangchi awm ai nai prichi py khujyh patleh pi.
Pri tleirei y kani pri amtaw thau naichi khai pi takhra bo.Ref 32.8: Ataw 17:26
9 Na i py Jakob i kangpreangchi ai, mymy i vui y vawi takhra bo.
10 “Mymy ly nichi ai ali ho nai
daichi ka-vym theung y amki ryry nai niu baly,
mymy i cho chanau kypkyp kamta
nichi ai hawihai palai kry nai ne.
11 Ahmtlau ly chochi ai akheang nai patiu pi nai khala,
mymy i pakhichi kadai iy dawmkhawn pi nai kamta,
Areng y Israela chengchi ai pahawi nai ne.
12 Cheng takhra tameuhchi i kasabawmra lo y naimy,
Areng mymy tlairei naimy, mymy i khumichi ai pahawi bo.
13 “Mymy ly mymy i khumichi ai mawitleaung prichi peang hai iy,
li hlauchira i theu nai amti amjangchi cha hai bo.
Nichi ly lengseaung ka-kochira i khawi hang py,
leungchip khaileaung y prau nai olive keungchira i asituichi py nga u nai ne.
14 Nichi i sichi, mi-ichi my kanu tui neangneang nga hai;
nichi ly ti hawi keh nai sichi, beramchi hawi mi-ichi awm iy,
lym patyp nai chohpui hawi, hawi keh nai kreip hang py cha nei ai nai nga u bo.
15 “Areng i khumichi ly nang ra nang ra nai ne, na i py tiu u lawh;
nichi ly veung tlang hawi u,
teicha teinei kajeu kawi pa-rei cha ai nai nga;
mychi ai sa nai keung Tameuh ai khai su iy,
sa thai naira awm nai keung ai hi u vui bo.
16 Nichi ly tameuh mynchi ai chiu nai kamngo molam y,
katakhosi nai Areng ai kado theu hai bo.
17 Nichi ly amsi pajochi chiu vai y nai,
Israela chengchi ahihawi vai y nai,
tameuh takhrachi teng y apathyp u lawh.Ref 32.17: 1 Kor 10:20
18 Nichi ly sa thai naira awm nai atleu keung,
mymychi ai hengra pei nai keung Tameuh ai tami u vui bo.
19 “Areng my hunichi niu nai khala kado theu i,
mymy i cho chanauchi ai khai su bo.
20 Areng my, ‘Hini khumichi ly paleung tang iy, ka-ym by y naichi ne;
kai ly nichi ai kasabawm y leang bo,’
‘Naibaly nichi ati lawm u na mo, nanai kakhen cham ai.
21 Nichi i tameuh mynchi hawimy kai ai kado ang theu hai bo;
nichi i tameuh tatang ny y nai hawimy kai ai takho ang si hai.
Hunai deaungkho y aso ami y nai
khumi cheng lawm hai nai hawimy nichi ai kado theu hai ai.
Cheng y nai khumi cheng lawm nai hawimy,
nichi ai takhosi nai paleung tym hai ai.Ref 32.21: Rom 10:19; 1 Kor 10:22
22 Kai i kado theu nai ly mai kamta angveaung ai i,
khaileaung tleaung y awm nai ngierei kang hai ai.
Kado theu nai mai kangveaung ly tavau prinote 32:22\xk tavau pri: khumi kadeichi i saleaung. \x* khrairei py,
mawi kheutang khrairei py kang hai ai.
23 “Kai ly nichi ai pajeng nairachi avum hai aninau ai.
Kai i thailiho chynchi khei be na pa-rei nichi ai kako ai.
24 Nichi ly kajeu kanglam hawi keaung nosora dei u ai;
ka-jei awm nai no-na hawimy dei u bebe ai.
Mawi kasichi ly nichi ai kei ai;
pavui kangsochi my nichi ai patiu ai.
25 Tavai takai deaungkho y khumichi ly lamchira dei u ai;
yhmchira y ka-jei awm naichi avum ai.
Thawndeangchi anglochi py dei u ai;
deaungdicho kanu nei thym naichi hawi miteaung maichochi py tleaung y ai.
26 Kai ly nichi ai katamyh keng ai i,
khumi ami py nichi ai pany jo ai ny y leang bo.
27 Na i py nichi i paleung ka-echi ly mymychi i haiho saho y
kai i khumichi ai eaung nai ne, nanai
amlyh am-e ai nai kapei ai ny y.’
28 “Israela khumichi ly tau by y iy
cheng naira pipi by y nai khumi cheng ne.
29 Nichi ly ati mana nai y tavai sum u nai mo, nanai pany u y;
ati mana nai deaungkho y mo, nanai py dawn pajau y.
30 Khumi leaung sangreichi ai leaungrei my,
khumi leaung meaungkateaungreichi ai leaung nyhrei my ati mana nai tiu pajau nai mo?
Nichi i Areng Tameuh my nichi ai khai su nai deaungkho y,
nichi i ati cheaungkhang sa thai nai Tameuh my nichi ai sum hai nai deaungkho y ne.
31 Nichi i paleung ka-echi ly mymychi i tameuhchi atho jy iy,
Israela chengchi i Tameuh kamta sa thai naira len y, nanai pany u.
32 Nichi i paleung ka-echi ly Sodom mary, Komora mary kamta phra nai,
khota iy paleih thai nai athaichi athai nai kreip angjyn keung kamta py,
33 pavui i thailai num nai kreip hang kamta py lawm u bo.
34 “Areng ly nichi i paleung ka-echi sa nai bawibawi pany nai deaungkho y,
nichi ai pajeng ai nai neng ka-pe ajeng nai ne.
35 Areng ly paleung ka-echi ai pajeng iy vawitheung tha ai;
nichi i sum nai neng tym ai;
nichi myh ai nai neng ly kasa bo. Ref 32.35: Rom 12:19; Heb 10:30
36 Areng ly mymy i khumichi atho kheih nai,
paha nai niu nai khala atleu ai.
Mymy teng y ahihawi iy chiu nai chiu nai khumichi
jeaungmang nai niu nai khala, nichi ai pahen ai. Ref 32.36: Sam 135:14
37 Naibaly Areng ly mymy i khumichi teng y,
‘Nangchi ym iy cheaungkhang sa thai nai tameuhchi ly ma y mo?
38 Nangchi ly huni tameuhchi teng y apathyp nai tawnbawi thau hawi
kreip hangchi talam u bo.
Huni tameuhchi ly vai jeu iy nangchi ai sabawm u na sy,
jeu praw iy nangchi ai atleu pi na sy.
39 “Kai leaungrei naini Tameuh ne;
kai naini Tameuh tatang ne.
Kai ly hengra la pi veng thai, hengra py kapei thai, hawi py sa thai;
kai i sa nai ai ly ami py paka pajau y leang.
40 Kai ly deungtasarei heng nai keung ne khyp i,
kai ly kani mang y kiu pheu iy katauh bo.
41 Kai ly sadi nanai haisau kata iy,
meitang naimy tara chih ai.
Kai i paleung ka-echi ai vawitheung tha iy
kai ai niu ngai y naichi ai ly pajeng ai.
42 Kai i thailiho chynchira y nichi i thi leaung ai;
kai i haisau ly kai ai paka nai khumi ngiereichi ai tamyh ai.
Kai ai paleung ka-e khai nai khumichi ai leaungrei py kangheng khai ai ny y;
tamo nga nai hawi langheng hawi naichi malawn py dei u be ai.
43 “Cheng theaung khumichi awi, Areng i khumichi ai palo u;
mymy ly mymy i khumichi ai padei nai keung ngiereichi ai ly pajeng ai.
Mymy ly mymy i paleung ka-echi ai vawitheung tha ai,
mymy ly mymy i khumichi i kamngo pahen pi ai,” napi.Ref 32.43: Rom 15:10; Amt 19:2
44 Mosi hawi Nun i chapo Josua nini my Israela chengchi thai pa-rei, hini khulym thui hawi nai ne.
Mosi my kangkhym i leu pei naichi
45 Mosi my Israela cheng bawibawichi teng y Tameuh teng i leu pei naichi thui pi pajau nai bo y,
46 “Nangchi teng y vaini kaimy kang pei nai hini leu saichi hawihai patawm u. Nangchi i cho chanauchi py Tameuh i leu pei nai bawibawichi ai paleung hawi verei patawm ai nai patiu pi u.
47 Hini leu pei naichi ly atyhtyh ny y leang; hunichi ly nangchi i heng ai nai sai tatang ne. Nangchi hini leu pei naichi patawm u baly Jordan tavo vai, nangchi peang ai nai pri y heng sau u ai,” napi.
48 Huni kani y my Areng ly Mosi teng y, Ref 32.48-52: Kati 27:12-14; Leu 3:23-27.
49 “Jeriko mary kangka Moba pri i Abarim mawichi mang y chei iy, Nebo mawi y lyn kalau; huni mawi salo mang dengdairei Israela chengchi teng y kaimy pei ai nai Kanan pri khen angdeang.
50 Nang i amjo Aron ly Hora mawi saleung y dei nai kamta, nang ly huni Nebo mawi y dei teang ai.
51 Ati mana nai mo na baly nangni ly Zin daichi ka-vym i Kadesa mary sahawi Meriba tavo micheaung y tym nai thym khala, Israela chengchi i mo y kai ai tahm khai hawi y nai deaungkho y ne.
52 Nang ly kaimy Israela chengchi teng y pei ai nai pri y kun y naimy, kamlo mang dengdairei niu jo ai khyh,” napi.