31
Mosi i jeng y Josua amtym nai
1 Mosi my Israela chengchi teng y thui pi bi nai ly
2 “Vai kai ly saneng chungvai atlo apomrei awm bo i, nangchi ai kakra lu kang sa pi pajau ai ny y leang bo. Huni khyh ny y, Areng my kai ai Jordan tavo angpeang ai nai py pei y bo.Ref 31.2: Kati 20.12
3 Nangchi i Areng Tameuh ly nangchi ai pahawi iy, huni pri y awm nai khumi chengchi ai patheu vui ai i, nangchi ly nichi i pri y awm ai nai nga u ai; naibaly Areng my leu pei nai kamta, Josua my nangchi ai lu sa pi ai.
4 Areng ly Amori samrang Sihon hawi Oka nini ai pasum vui iy nichi i pri taphra pi vui nai kamta ly huni pri y awm nai khumi chengchi ai tamyh ai.Ref 31.4: Kati 21.21-35
5 Areng my nangchi ai nichi i pri ai tiu nai pajau hai ai i, kaimy thui pi yb nai kamta nangchi ly nichi ai pajau u ai nai tla.
6 Atho ala iy sorai paleung thau u. Huni khumi chengchi ai jei u moh. Nangchi i Areng Tameuh ly nangchi ai awm hai ai. Mymy ly nangchi ai ang sabawm takengkei ai i, nangchi ai ang khai su ai ny y,” napi.
7 Naibaly Mosi ly Josua ai palau iy, Israela cheng bawibawichi i mo y ni teng y thui pi nai ly “Nang ly atho ala iy sorai paleung thau; Areng my nangchi i amsi pajochi teng y adeu nai pri y kun iy peang ai nai, nang ly hini khumichi ai lu sa ai nai tla.
8 Areng mymy kypkyp my nang ai pahawi ai i, nang hawi vanrei awm ai. Mymy ly nang ai sabawm takengkei ai, nang ai khai su y leang. Hunai deaungkho y athosi moh, jei py jei moh,” napi.Ref 31.8: Jos 1.5; Heb 13.5
Reita leu ai saneng saryhrei y tlenrei phain pi ai nai
9 Naibaly Mosi ly Tameuh i reita leu pei naichi tajiu iy, Areng i Leu Maikawm Pawm kry nai Levi theaung pathyp pi nai keungchi hawi Israela cheng lu sa nai keungchi teng y au pi bo.
10 Naibaly Mosi my nichi teng y, “Saneng saryhrei y tlenrei, kalaichi palawi pi nai saneng Taichy pawi sa nai kani y, hini reita leu pei naichi ai khumi mipuichi thai pa-rei phain pi ai nai tla.Ref 31.10: Leu 15.1; 16.13-15
11 Israela chengchi ly Areng Tameuh ai chiu nai meingtym harei khyh naira y tym u nai khala, hini reita leu pei naichi phain pi ai nai tla.
12 Neampacho, neampachy, deaungdi hawi nangchi i marychi theng y awm nai cheng takhra khumichi raurei, khumi bawibawichi palau achu iy nichi ly huni reita leu pei naichi thai ai i, nangchi i Areng Tameuh ai tahm khai jei kaji naimy leu pei naichi ai paleung hawi verei patawm u ai.
13 Hina nai sa iy nangchi i Areng Tameuh my reita leu pei naichi thai vai y nai nangchi i kangpreangchi thai u ai. Huna khala naini nichi ly Jordan tavo angpeang iy, peang ai nai pri y awm nai ryrei ly mymy i leu pei naichi tangai ai nai nichi amtiu u ai,” nanai thui pi bo.
Areng my Mosi teng y kangkhym i leu pei nai
14 Naibaly Areng my Mosi teng y, “Nang ly dei ai nai kasa bo. Kai ly Josua ai leu pei ai nai ngai i, ni ai Tabynako mang y jeu hai ba, ” napi. Naibaly Mosi hawi Josua nini ly Tabynako mang y chei hawi i,
15 Areng ly Tabynako katheu pa-khora y tamai angjawi kamta amteng pi bo.
16 Areng my theung mang dengdairei Mosi teng y, “Nang ly kra y nai sala y dei ai, nang dei nai bo y Israela chengchi ly vaineng takan iy, nichi hawi kai asa nai Leu Maikawm taphra u ai. Nichi my kai ai khai su iy nichi awm ai nai pri i tameuh takhrachi ai chiu u ai.
17 Huna nai khala kai ly kado theu iy nichi ai khai su ai, naibaly nichi ly tama u ai. Nichi ly ka-jei awm nai patangrachi avum u ai. Huna nai khala nichi i Tameuh kai ly nichi hawi vanrei awm pi y nai deaungkho y, hina nai ka-jeirachi avum nai ne, nanai nichi pany u ai.
18 Nichi ly Tameuh takhrachi ai chiu iy hawi y naichi sa u nai deaungkho y, kai ly nichi ai atleu ai ny y.
19 “Vai nang ly hini khulym tajiu ba, hini khulym ly Israela chengchi i vui kai i pany hai nai ka-ma-ra lawm ai nai, hini khulym ly nichi ai patiu pi.
20 Kai ly nichi i amsi pajochi teng y adeu pi nai kamta, nichi ai paitiu khuta hawi nai pri y kapahawi ai. Nichi ly huni pri y teicha teinei kajeu kawi pa-rei cha ai nai nga u ai i, awmnem naimy awm u ai. Na i py nichi ly kai ai ym y ai i, tameuh takhrachi ai chiu u ai. Nichi ly kai ai khai su iy Kai i Leu Maikawm ai taphra nai deaungkho y,
21 ka-jei awm nai patangrachi khri pa-rei avum u ai. Na i py nichi i pany nai ka-ma-ra lawm ai nai hini khulym ly thui u ai nai tla. Kaimy pei ai adeu nai pri y kapahawi y rai khala my, nichi i paleung theung y dawn naichi kapany,” napi.
22 Huni kani y Mosi ly huni khulym tajiu iy, Israela khumichi teng y patiu pi bo.
23 Naibaly Areng my Nun i chapo Josua teng y, “Atho alo ly sorai paleung thau. Nang ly Israela chengchi ai lu sa iy kaimy adeu nai pri y kun ai nai nga ai, kai ly nang hawi vanrei awm hai ai,” nanai thui pi.Ref 31.23: Kati 27.23; Jos 1.6
24 Mosi ly Tameuh i reita leu pei nai bawibawichi ha py takhawi y pa-rei cha-iu theung y tajiu typ bo.
25 Naibaly Areng i Leu Maikawm Pawm kry nai Levi theaung pathyp pi nai keungchi teng y,
26 “Tameuh i reita leu pei nai cha-iu lo u ly nangchi i Areng Tameuh i Leu Maikawm Pawm sahawi y khai u; huni cha-iu ly mymy i khumichi i vui y pany ai hawi nai ka-ma-ra ne i, huni meingtym y awm jo ai nai tla.
27 Nichi ly paleung tang iy tiusi, nanai kai pany. Nichi ly kai dei y rai khala my Areng ai tiu u i, kai dei nai bo khala ipsaly, huni tleaung y tiu u ra ai.
28 Kai ly hini satangchi thui pi thai ai nai, nangchi cheng theaungchi i lu sa nai keungchi hawi miteaung keh bawibawichi ai angym hai, kaimy kani hawi khaileaung ai tauh iy nichi teng thui pi ai.
29 Kai dei nai bo y hini khumichi ly khumi hawi y naichi lawm u ai i, kaimy patiu pi nai ngiereichi khai su ai, nanai kai kapany. Vai mo mang y nichi ly Areng my paka nai hawi y naichi sa u nai deaungkho y, kado theu hai ai i, nichi ly ka-jeira avum u ai,” napi.
Mosi i khulym
30 Naibaly Mosi ly Israela khumi bawibawichi teng y, hina nai khulym sairei thui pi bo.