33
Israela chengchi ai Mosi my amtheaung hai nai
1 Tameuh my vawi takhra nai Mosi ly mymy dei y rai khala, Israela khumichi teng y hina nai kamta, amtheaungra pei nai ne.
2 Areng ly Sinai mawi salo mang dengdairei ang jeu;
mymy ly kanito kamta Edom pri salo y amteng iy,
Paran mawi salo mang dengdairei mymy i khumichi teng y kangvang ko bo.
Mymy i lamtang mang y mai kangveaung hawi
sang neangneang chang y nai kani pri amtaw thau naichi abang u bo.
3 Areng ly mymy i khumichi ai tamen,
mymy i khumichi ai kry ryhpatyh na.
Hunai deaungkho y achi ly mymy i kheu keung y ambeu iy,
mymy i reita leu pei naichi tangai u bo.
4 Achi ly Mosi my pei nai reitachi patawm u bo;
huni reita leu ly achi khumi chengchi i vui vang teng keh nai yhmtheaung katui ne.
5 Israela cheng theaungchi hawi luchi akachu u nai khala,
Areng ly mymy i khumichi i samrang lawm bo.
6 Naibaly Mosi my Ruben theaung ai patyp iy thui nai ly:
“Ruben theaung ly khumi dideichy teu i py
cheng theaung myh moh sy.
7 Juda theaung ai patyp iy thui nai ly:
“Aw Areng, Juda theaung my hnei takeng nai raawi tangai pi kyh ba;
takhra cheng theaungchi hawi amkawm ali teang sy ba.
Aw Areng, nichi ai amo hai kyh ba;
nichi i vui paleung ka-echi ai tiu ba”
8 Ref 33.8: Theu 17:7; 28:30; Kati 20;13 Levi theaung ai patyp iy thui nai ly:
“Aw Areng, nang i kangai ly nang ai ka-ym awm nai Levi theaung dengdairei,
Urim hawi Thummim saho y nangmy i kangai amteng hai bo;
nang ly Massah meingtym y nichi ai ka-ym awm mo, by y mo cham iy,
Meriba micheaung y nichi ka-ym awm, nanai pany bo.
9 Naibaly nichi ly mymychi i amhm ampo, amjo amnau,
cho chanauchi ai tamen nai tleaung y nang ai tamen keh.
Nichi ly nang i leu pei naichi tangai u iy
nang i Leu Maikawm ai py kry u bo.
10 Nichi ly nang i khumichi ai nang i reita patawm ai nai patiu pi ai;
Nichi ly nang i maicham tleaung y apathyp u ai.
11 Aw Areng, nichi cheng theaung ai lo-pa hai kyh ba;
Nichi i sa nai tleirei y kawn pi kyh.
Nichi i paleung ka-e bawibawichi ai
ang thau pajau y na pa-rei chiu piupa kyh ba.”
12 Benjamin theaung ai patyp iy thui nai ly:
“Benjamin Theaung ai Areng my tamen iy kry bo.
Mymy ly nichi ai kani khengrei kry jojo,
nichi ly mymy i ama hai nai anui y chymme naimy awm u bo.”
13 Josepha theaung ai patyp iy thui nai ly:
“Areng ly nichi i khu ka-peang theung y kanikhu hawi hai ai nai py,
khaileaung theung mang tui theu hai ai nai py sabawm pi na sy.
14 Nichi i khu ka-peang ly kanibi y myn nai thengthai,
neng tym baly vang teng nai thengthaichi hawimy nang chawn na sy.
15 Jangni i mawichi ly vang teng nai thengthaichi athai pasu bawibawi sy.
16 Mai angveaung nai lymlo kangpho theung mang dengdairei,
leu pei nai keung Areng i hawi naira my amtheaung hai nai deaungkho y,
nichi i khaileaung y vang teng parai nai amti amjangchi thau sy.
Josepha ly my i amjo amnauchi theung y lu sa nai keung ne i,
ni i theaung ly huni amtheaung nairachi ngo u sy.
17 Josepha ly si katai kamta py,
salen katai taki kamta py atho awm parai.
Ni i takichi ly Manase theaung hawi
Ephraim theaung sang neangneangchi ne.
Ni ly huni takichi hawi khumi cheng cheaungkhangchi ai
khuteng taki khrairei deng pawn ai.
18 Zebulun hawi Isakar theaung ai patyp iy thui nai ly:
“Zebulun theaung ly pangli khuleaung lam hawi ka-sum ka-pai sa iy, nang chawn u na sy.
Naibaly Isakar theaung ly mymychi i khu ka-peang theung y yhmtheaung katui nang sy.
19 Nichi ly cheng takhrachi ai mymychi i mawi saleung y palau iy,
hu y apathyp avo naichi apathyp u bo.
Nichi ly pangli hawi pangli peang jeungrei speung theung i
yhmtheaung katuichi nga u nai ne.”
20 Kad theaung ai patyp iy thui nai ly:
“Kad theaung khu ka-peang kau hai nai keung Tameuh ai palo u.
Kad theaung ly khrangsi kamta
kiuban, ti y baly lu kei piu ai nai amo yb nai ne.
21 Nichi ly mychi i vui hawi keh nai khu ka-peang vawi u;
Lu sa nai keungchi i vui khu ka-peang ly nichi ai vui pi bo.
Israela chengchi ai lu sa nai keungchi jeu u achu nai khala,
nichi ly Areng i leu pei nai hawi reitachi patawm u bo.”
22 Dan theaung ai patyp iy thui nai ly:
“Dan theaung ly khrangsi beaungjeaung ne;
Ni ly Basan pri dengdairei ampyh naimy theu bo.”
23 Naphtali theaung ai patyp iy thui nai ly:
“Naphtali theaung ly Areng i pahen nai saho y amtheaungra neangneang nga bo.
Nichi i khu ka-peang ly Kalili ang i ka-so tokalawi mang y khrairei kau.”
24 Aser theaung ai patyp iy thui nai ly:
“Aser theaung ly takhra theaungchi tleaung y amtheaungra nga keh.
Ni ly amjo amnauchi theung y meimai ngo keh sy.
Ni i khu ka-peang theung y olive keungchi neangneang prau na sy.
25 Ni i marychi ly tamo katheuchi hawi atleang typ sy;
ni ly chymme naimy awm jojo sy,”
26 Israela khumichi awi, nangchi i Tameuh ly ni hawi pata ai nai tameuh takhra by y;
mymy ly phum-ang nang parai nai hawimy tamai atang iy,
kani khusang tako prei naimy, nangchi ai sabawm ai nai ang jeu bo.
27 Tameuh ly nangchi ai ama hai jojo nai ne;
mymy i deungtasa kiuban my nangchi ai ang dawmkhawn bo.
Mymy ly nangchi tako nai lam i, paleung ka-echi ai paryh pi pawn bo;
huni paleung ka-echi ai tamyh pawn ai nai nangchi ai leu kang pei bo.
28 Hunai deaungkho y Jakob i kangpreangchi ly
kani mang dengdairei kadam tla hai nai pri,
choh hawi kreip hang nang nai pri y tlamsa naimy awmnem u bo.
29 Israela chengchi awi, nangchi ly khri pa-rei taham hawi!
Areng my nangchi ai atleu nai deaungkho y,
nangchi ly asa takhra nai cheng ne.
Nangchi ai ama hai ai nai hawi paleung ka-echi ai eaung ai nai
Areng mymy kypkyp ly nangchi i khupui hawi haisau ne.
Nangchi i paleung ka-echi ly pahenra nga ai nai ang jeu u ai,
naibaly nangchi ly nichi ai chiu u piupa vui ai.