30
Pri y awm ali teang ai nai hawi amtheaungra nga ai nai leaungsai
1 Kai ly vai nangchi ai amtheaung naira hawi taham si naira, hini nyhrei theung y ha harei vawi takhra ai nai kang pei. Nangchi i Areng Tameuh ly nangchi ai pri tleirei y ahei hai iy, huni prichira awm u nai thym khala, vai nangchi ly kaimy kang thui pi nai ngiereichi ai pany u chum baly,
2 nang hawi nangchi i kangpreangchi ly Areng teng y ali u teang iy, kaimy vai kang pei nai reitachi ai paleung hawi verei tangai u baly,
3 nangchi i Areng Tameuh ly nangchi ai ang pahen ai. Huni bo y mymy ly pri tleirei y ahei nai nangchi ai ang pahawi ali teang ai, naibaly mymy ly nangchi ai amtheaung hai ali teang ai.
4 Nangchi ly khaileaung pri meingtym tleirei y ahei akyhkyh teu i py, nangchi i Areng Tameuh my pangym achu iy,
5 nangchi i amsi pajochi awm reng nai pri y peang ali teang pajau ai nai ang pahawi ali teang ai. Huni bo y nangchi ai nangchi i amsi pajochi tleaung y nang chawn hai ai i, khumi vuikanai py nawi tleaung nawi hai ra ai.
6 Mymy ly nangchi hawi nangchi i kangpreangchi teng y leu tangai ai ngai nai paleung pei pi ai. Nangchi ly nangmychi i Areng Tameuh ai paleung hawi verei tamen iy, huni pri y awm amtawn jo thai ai nai,
7 nangchi ai niu ngai y iy, nangchi ai ana panang nai paleung ka-echi i tlang tleaung y, huni taham kasi ngierei patlai be ai.
8 Nangchi py mymy i leu pei naichi tangai ali teang iy,vaini kaimy nangchi teng y kang pei nai reita bawibawichi patawm u ai.
9 Nangchi ly hini reita cha-iu theung y tajiu nai reita leu pei nai ngiereichi ai patawm iy, Areng teng y paleung hawi verei ahihawi baly, mymy ly nangchi i sa naira tleirei y amtheaung hai ai; nangchi ly cho chanau neangneang sa u ai; si, beram hawi tawnbawi neangneang nang u ai.
10 Nangchi i li hlauchi py amti amjang neangneang thawn ai, mymy ly nangchi i amsi pajochi ai amtheaung hai nai khala amo theu nai kamta, nangchi ai amtheaung hai nai khala py nangchi amo theu u teang ai.
11 “Kaimy vaini nangchi teng y kang pei nai reita leuchi ly nangchi pany thai y ai nai pa-rei rai na y leang, nangchi apho pajau y na pa-rei py ny y leang.
12 Nangchi my, ‘Achi ly huni reitachi patawm ai nai ami nai kani mang y lyn kalau iy achi i vui ang jeu kathiu hai ai mo?,’ nanai deng ai nai pa-rei huni reita leu pei nai ly kani mang y awm nai ny y leang.Ref 30.12-14: Rom 10:6-8
13 Nangchi my, ‘Kaichi ly reita patawm ai nai ami nai pangli suida vai angpeang iy kaichi teng y ang tym hai ai mo?,’ nanai deng ai nai pa-rei, huni reita leu ly pangli suida vai mang y awm nai ny y leang.
14 Huni reita leu pei nai ly hi y nangchi hawi vanrei awm. Nangchi pany yb nai reita leu, nangchi my patawm thai nai reita teu. Hunai deaungkho y nangchi ly huni reita ai vai patawm u.
15 “Kai ly vaini nangchi teng y hawi nai hawi y nai, hengra hawi deira, hinichi theung y ha harei y vawi takhra ai nai kang pei nai bo.
16 Kaimy vaini kang pei nai nangchi i Areng Tameuh i reitachi patawm u baly, nangchi ly mymy ai tamen iy, mymy i leu tangai naimy reita bawibawichi patawm u baly, nangchi ly nang chawn ai i, khumi neangneang peung ai. Naibaly nangchi i Areng Tameuh ly nangchi peang ai nai pri y nangchi ai amtheaung hai ai.
17 Na i py nangchi ly mymy i leu tangai y naimy tameuh takhrachi ai chiu u lawh baly,
18 nangchi ly myh u ai, nanai vai kaimy nangchi ai kang pany hai bo. Nangchi Jordan tavo angpeang iy awm ai nai pri y kra parai pa-rei awm thai ai ny y.
19 Vai kai ly nangchi ai heng naira mo, ti y baly dei naira, Tameuh teng i amtheaung naira mo, ti y baly taham si naira, huni theung i ha harei vawi takhra ai nai kang pei. Nangchi vawi takhra nai ly kani hawi khaileaung my pany sy, hengra phai vawi takhra u.
20 Nangchi i amsi pajo Abraham, Isaka hawi Jakobchi teng adeu nai pri y, nangchi hawi nangchi i kangpreangchi kra parai naimy heng thai ai nai nangchi i Areng Tameuh ai tamen u, mymy i leu phai tangai u ly mymy ai phai chiu u, ” nanai leu pei bo. Ref 30.20: AA 12:7, 26:3; 28:13