19
Abyhra marychi
(Kati 35:9-34; Jos 20:1-9)
1 “Nangchi i Areng Tameuh ly nangchi ai pei nai pri y awm nai khumichi ai tamyh pawn nai bo y, nangchi ly nichi i marychi hawi yhmchi nga vui nai khala,
2-3 huni pri ai phy thomrei phy iy, phy ha harei theung i nangmychi chei pajau nai mary vawi takhra u. Naibaly khumi ai padei nai keung leaungrei ly huni marychi theung i, mary ha hareira y law tleaung ai nai abyh pajau.
4 Khumi leaungrei ly my i paleung ka-e ny y nai khumi ai athang khailai y naimy padei vui lawh baly, ni ly huni mary ha harei mang y preang iy law tleaung pajau.
5 Khumi leaung nyhrei ly daichi theung y dengkeaung paliu ai nai chei hawi i, leaungrei my dengkeaung paliu nai thym y atiu ly taveang i nai angkheaung vui iy ahawi ai chawm nai dei vui lawh baly, ni ly huni ha harei mang y preang nai khala, law tleaung pajau ai.
6 Abyhra mary ly len parai iy harei khyh lawh baly, huni mary ly palo parai nai deaungkho y padei nai keung ai vawitheung tha ai ngai nai khumi ly hui i kai lawh baly, kamngo by y nai khumi ai kado theu y padei vui lawh ai. Ne mang ly ni ly mymy i paleung ka-e ny y i py, athang khailai y naimy khumi ai padei nai teu.
7 Hunai deaungkho y kai ly nangchi i vui mary thomrei khai takhra ai nai leu kang pei nai ne.
8 “Nangchi i Areng Tameuh ly nangchi i amsi pajochi teng y adeu nai kamta, nangchi i khu ka-peang kau ryh iy adeu nai khaileaung bawibawi nga u nai khala,
9 abyhra mary thomrei vawi panawi bi ai nai tla. (Nangchi ly vai, kaimy leu pei nai ngierei , nangmychi i Areng Tameuh ai tamen iy mymy i leu pei nai kamta tangai u baly, mymy ly huni pri nangchi teng y ang pei ai.)
10 Hina nai sa iy Areng my nangchi ai pei nai pri y khumi kahawichi ai dei hai ai nai tlo y. Nangchi py khumi kahawichi ai dei hai nai kamngo sa u ai ny y.
11 “Na i py khumi leaungrei ly paleung ka-e ai ym nai amo iy padei nai khala, huni mary ha harei mang y preang nai abyh lawh baly,
12 ni i awm nai mary i miteaung kehchi my ni ai palau iy, dei nai khumi i vui y vawitheung tha ai nai keung teng y au ai nai tla.
13 Ni ai pahen moh. Nangchi ly awmnem naira nga ai nai Israela cheng theung i dengdairei, khumi padei nai keung ai tama hai vui ai nai tla. Ref 19.1-13: Josua 20:1-9
Jangni i khujyhchi
14 “Nangchi i Areng Tameuh my pei nai pri y, jangni i leng nai, nangchi i yhm deaungpa khujyh leungcheng ly kasyh u moh.Ref 19.14: Leu 27:17
Pany nai keungchi i vui reita
15 “Pany nai keung leaungrei i thui nai hawimy khumi leaungrei ai kamngo tla, nanai tara pasum moh. Pany nai keung di keh nai leaung nyhrei awm khala naini, khumi leaungrei ai kamngo awm, nanai tara pasum ai nai tla. Ref 19.15: Kati 35:30, Leu 17:6, Mt 18:16, Joh 19:31; 2 Kor 13:1, 1Tim 5:19; Heb 10:28
16 Nangchi theung i khumi leaung leaungrei ly takhra khumi leaungrei ai kamngo awm, nanai neng hai atyhtyh baly,
17 nini leaung nyhrei ly chiu naira meingtym harei khyh naira y, huni neng y pathyp pi nai keungchi tara chih nai keungchi teng y ka-vum sa hawi ai nai tla.
18 Tara chih nai keungchi ly hawihai palai chih iy, huni khumi ly amy cheng tengtawi seu atyhtyh nai tau, nanai pany lawh baly,
19 huni khumi ly seu atyhtyh nai molam y pajeng naira avum ai. Hini lam hawimy nangchi ly huna nai kamngo ai tama hai pajau ai.
20 Naibaly khumi bawibawichi ly huni satang thai nai deaungkho y jei u ai i, mo mang y huna nai kamngo sa u vam ai ny y.
21 Huna nai kahm tara chih naira y pahen ai nai tlo y. Ami ai padei baly padei teang ai nai tla; mei i vui y mei, ho i vui y ho, kiu i vui y kiu, kheu i vui y kheu ai pajeng ai nai tla. Ref 19.21: Theu 21:23-25; Lev 24:19-20; Mt 5:38