20
Tavai i vui reitachi
1 “Nangchi ly paleung ka-echi ai tiu naira y, nangchi tleaung y atho len nai ka-ri kamkawm, keaungngo kamkawm, tavaimi kamkawmchi hawi avum nai khala, nichi ai jei u moh. Nangchi ai Aikupta pri i dengdairei atleu nai keung Areng Tameuh ly nangchi hawi vanrei awm hai ai.
2 Nangchi tavai thau y rai khala pathyp pi nai keung leaungrei ly tavaimi kamkawm mo y theu iy,
3 ‘Israela chengchi awi, tangai u! Vaini nangchi ly tavai thau iy tiu u ai bo; paleung phra jei hyn nai awm u moh.
4 Nangchi i Areng Tameuh ly nangchi hawi vanrei tavai thau ai i, mymy ly nangchi ai tavai eaung hai ai,’ nanai tavaimichi ai atho pei ai nai tla.
5 “Naibaly tavailuchi my khumichi teng y, ‘Nangchi theung y yhm kangtha sa iy Tameuh teng y au y rai nai khumi awm a? Awm baly huni khumi ly yhm y vawi teang sy, ti y naimy ni ly tavai keung y dei vui baly, takhra khumi leaungrei my ni i yhm ai Tameuh teng y au ai nai tla lawh ai.
6 Nangchi theung y kreip akho sa iy athaichi pakym y rai nai awm a? Awm lawh baly huni khumi ly yhm y vawi teang sy, ti y naimy ni ly tavai keung y dei vui baly, takhra khumi leaungrei my kreip athai jaw iy amo theu naimy kreip hang nei vui ai.
7 Nangchi theung y neampachy hawi apom ai nai angam yb nai awm a? Awm baly huni khumi ly yhm y vawi ali teang sy, ti y naimy ni ly tavai keung y dei vui lawh baly, takhra khumi leaungrei my huni neampachy ai pom vui lawh na,’ napi.
8 “Tavailuchi my khumichi teng y thui pi bi nai ly ‘Nangchi theung y jei si nai khumi awm a? Awm baly huni khumi ly yhm y vawi ali teang sy, ti y naimy ni deaungkho y takhra khumichi paleung phra ai,’ napi.
9 Tavailuchi my tavaimichi teng y thui pi chum baly, kamkawm chy ha hareichi theung i luchi vawi takhra ai nai tla.
10 “Nangchi ly mary harei ai tavai tiu nai khala, angchei y mary i khumichi ai tamawi aseih ai nai neng pei ai nai tla.
11 Nichi my mary apai pa-khochi paeaung iy tamawi aseih nai nangchi my sa hai nai kalop ngiereichi ai sa pi nai nangchi i miseaung lawm u ai.
12 Na i py huni mary theung y awm nai khumichi ly tamawi aseih y naimy amtang u lawh baly, nangchi i tavaimi kamkawm ly huni mary ai katanmeuh ai nai tla.
13 Naibaly nangchi i Areng Tameuh my nangchi ai mary peang hai nai khala, huni mary theung y awm nai neampacho ngiereichi ai ly tleh pawn ai nai tla.
14 Na i py neampachychi, deaungdichi, tawnbawichi hawi mary theung y awm nai vawnsai ngiereichi ly nangmychi i vui la pajau. Areng ly paleung ka-echi i vawnsai bawibawichi ai nangchi teaung ai nai, nangchi i kiu y ang au pi ai.
15 Nangchi awm ai nai pri hawi palo nai marychi py, hina nai kamta tiu ai nai tla.
16 “Na i py nangchi i Areng Tameuh my pei nai pri i marychi ai nangchi peang nai khala ly mary theung y awm nai khumi ngiereichi ai tleh pawn ai nai tla.
17 Areng my nangchi teng y leu pei nai kamta, Hiti cheng, Amori cheng, Kanan cheng, Perizi cheng, Hevit cheng, Jebusi cheng khumi bawibawichi ai tamyh pawn ai nai tla.
18 Huni khumichi ly mymychi i chiu nai amso ngai nai reitachi ai nangchi ai ang patiu pi lawh baly, nangchi ly Areng i tlang tleaung y sa tamang nai tla ai. Hunai deaungkho y nichi ai tamyh pawn ai nai tla.
19 “Nangchi ly mary harei ai katanmeuh nai kra nai khala thengthai keungchi ly paliu u moh, athai ly cha pajau. Huni keungchi ly nangchi i paleung ka-echi ny y nai deaungkho y, taphra u moh.
20 Mary phra nai pa-rei tiu ai nai i molam, amtangrachi sa ai nai takhra dengkeaungchi naini paliu pajau.