18
Pathyp pi nai keungchi ai phy vui pi nai
1 “Pathyp pi nai keung Levi theaung bawibawichi ly Israela pri y khu ka-peang phy ngai ai nai tlo y. Na i py nichi ly Areng teng y apathyp nai katalamrachi hawi apacho u ai nai tla.
2 Nichi ly kalang theaungchi kamta, mychi i vui khu by y; nichi i vui nga ai nai phy ly Areng my adeu pi kamta, Areng i vui pathyp pi nai keungchi lawm hai patyp nai ne.Ref 18.2: Kati 18.20
3 “Si, ti y baly beramchi hawi pathyp nai tleirei, pathyp pi nai keungchi ai paleang, kajai hawi sapawpchi pei pi ai nai tla.
4 Choh, kreip hang, olive asitui hawi beram muichi theung i angchei phy py amtym ai nai tla.
5 Areng ly nangchi cheng theaung bawibawichi theung i, Levi theaung ai mymy i kalopra y deungtasarei sa ai nai vawi takhra nai ne.
6 “Israela pri y awm nai mani mary i Levi theaung ami py, chiu nai meingtym harei khyh naira chei iy,
7 huni meingtym y kalop sa nai keung Levi theaungchi kamta ly Areng Tameuh i pathyp pi nai keung y sa pajau.
8 Ni ly kalang pathyp pi nai keungchi nga nai jirei nga nai bo y, my i yhm dengtheungchi my tha pi nai ngiereichi py nga pajau nai ne.
Amkym ai nai saichi
9 “Nangchi i Areng Tameuh my pei nai pri y tym nai khala, nangchi ly huni pri y awm nai cheng khumichi i amso ngai nai saichi amtiu u moh.
10 Nangchi i cho chanauchi ai leng patlum nai kapathypra palawn iy talam u moh. Nangchi ly dawi kawp nai, leung khen kawp nai, uimiu khawn nai, Ref 18.10: Lev 19:26, Theu 22.18
11 atam kawp nai hawi kadei phailochi hawi arum kawp nai, hunichi ly amtiu u moh.Ref 18.11: Lev 19.31
12 Nangchi i Areng Tameuh ly huna nai reitachi teaung nai khumi chengchi ai ly paso nai deaungkho y, nangchi i tako nai lam jeungrei i khumichi ai paryh pi pawn nai ne.
13 Nangchi ly Areng ai paleung hawi verei ym u,” napi. Ref 18.13: Mt 5.48
Amo leaungrei pato ai nai leu ka-deu
14 Naibaly Mosi my, “Nangchi peang ai nai pri y awm yb nai khumichi ly dawi kawp nai, leung khen kawp nai khumichi teng y atitichi deng u reng moh. Na i py nangchi i Areng Tameuh ly huna nai atitichi deng ai nai pei y.
15 Areng ly nangchi cheng theaung theung i, kaimy ka-tawm amo leaungrei pato pi ai i, ni i leu phai tangai u. Ref 18.15: Amtaw 3:22, 7:37
16 “Nangchi ly Sinai mawi y tym achu nai kani y, Areng i leu raawi thai bi moh sy ly, mai kangveaung py niu bi moh jau sy, nanai takeng u. Mymy i leu raawi hawi mai kangveaung niu baly, nangchi ly dei ai nai jei u nai deaungkho y, huna nai takeng u nai ne.
17 Naibaly Areng my kai teng y, ‘Nangchi i takeng nai ly teng khyp nai ne.
18 Kai ly nichi i cheng theaung theung i dengdairei nang ka-tawm amo leaungrei pato pi ai; kaimy ni teng y kaimy leu pei nai ngiereichi ai ni ly khumichi teng y thui pi pateang ai.
19 Ni ly kai i amyn y leu ang thui pi ai, ni i leu tangai y nai khumi ai ly ka my pajeng ai.Ref 18.19: Ataw 3:23
20 Kaimy leu pei y naimy kai i amyn y leu thui vam nai amo ai py, tameuh takhrachi i amyn y leu thui nai amo ai py, padei ai,’ napi.
21 “Amo leaungrei my thui nai leu ly Areng teng i leu ne, ny y nanai nangchi pany u ai nai ngai ai.
22 Ni i thui nai leu kamta teng khyp y lawh baly, ni i thui nai leu ly Areng teng i leu ny y. Ni ly mymy i paseang amang nai leu teu i, nangchi ly ni ai jei u moh.