16
Katlen vui nai Pawi
(Theu 12:1-20)
1 “Nangchi i Areng Tameuh ly Abiba lo vum y, nangchi ai Aikupta pri i dengdairei atleu nai deaungkho y, huni lo y Areng ai palo ai nai Katlen vui nai Pawi so u.
2 Nangchi ly chiu ai nai meingtym harei khyh nai mang y chei iy, nangchi i Areng Tameuh ai palo ai nai huni meingtym y si, ti y baly beram tleh naimy Katlen vui nai Pawi so u.
3 Nangchi ly Aikupta pri i dengdairei theu u kathawnkarawn nai thym khala, angbo abawi y nai tako cha u nai kamta, Katlen vui nai Pawi sa baly, angbo abawi y nai tako kani saryh ryrei cha ai nai tla. Nangchi ly ngari kamtang avum nai Aikupta pri i dengdairei theu u nai kani ai, deungtasarei pany jo ai nai, ngari kamtang napi nai angbo abawi y nai tako cho u.
4 Nangchi i awm nai pri y kani saryhrei sala, mani yhm y py angbo awm moh sy. Angchei kani dym y tleh nai tawnbawi mawi ly huni vum y my cha keng ai nai tla.
5-6 “Nangchi ai Areng Tameuh my pei nai pri meingtym takhrachira y Katlen vui nai Pawi i vui tawnbawichi tleh moh. Chiu ai nai meingtym harei khyh naira y naini, Katlen vui nai Pawi tawnbawi tleh ai nai tla. Nangchi ly kani dym nai khala Aikupta pri i dengdairei theu u bo. Hunai deaungkho y kani dym nai neng y, tawnbawichi tleh ai nai tla.
7 Nangchi ly chiu ai nai meingtym harei khyh naira y, huni mawichi byh iy cha chum baly, kani pa-nyh khawn ly yhm mang y vawi u ai nai tla.
8 Nangchi ly kani tariurei sala angbo abawi y nai takochi cho u ly saryh kani y ly akachu iy nangchi i Areng Tameuh ai chiu u, huni kani y kalop so u moh. Ref 16.1-8: Theu 12:1-20; Lev 23:5-8, Kti 28:16-25
Chohboleh nai Pawi
(Theu 34:22, Lev 23:15-21)
9 “Nangchi choh tyn angchei nai dengdairei, Anawn kani tlen saryhrei rip u.
10 Naibaly nangchi i Areng Tameuh ai palo ai nai chohboleh Pawi so u. Nangchi i Areng Tameuh ly nangchi ai amtheaung hai nai kamta, paleung kangai katalamrachi ai pawira y syn u.
11 Nangchi i marychira y awm u nai nangchi i cho chanauchi, miseaungchi, cheng takhrachi, Levi theaungchi, nurochochi, lumai nuchi hawi vanrei, Areng i mo y amo theu nai pawi so u. Huni Pawi ly chiu naira meingtym harei khyh naira y sa u ai nai tla.
12 Nangchi ly hini leu pei naichi patawm ai nai pany u; nangchi ly Aikupta pri y miseaung achei vai nai tami u moh.Ref 16.9-12: Lev 23:15-21, Kati 28:26-31
Taichy Pawi
(Lev 23:33-43)
13 “Nangchi ly choh ati pajau nai hawi, kreip athai hang tapi pajau nai bo y, Taichy Pawi kani saryhrei sa ai nai tla.
14 Nangchi i marychira y awm u nai nangchi i cho chanauchi, miseaungchi, cheng takhrachi, Levi theaungchi, nurochochi, lumai nuchi hawi vanrei huni pawi so u.
15 Nangchi i Areng Tameuh ai palo nai hini pawi ly kani saryh ryrei, chiu naira meingtym harei khyh naira y sa u ai nai tla. Areng my amtheaung hai nai deaungkho y, nangchi ly amti amjang pakym nai deaungkho y py, nangchi kalop eaung nai deaungkho y py, amo theu nai pawi so u.Ref 16.13-15: Lev 23:33-36, 39:43, Kati 29:12-38
16 Nangchi cheng theaung i neampacho bawibawichi ly Katlen vui nai Pawi, chohboleh nai Pawi, Taichy Pawichi sa ai nai chiu nai meingtym harei khyh naira y sanengrei y tlen thomrei jeu iy, Areng ai chiu ai nai tla.
17 Nangchi i Areng Tameuh my amtheaung hai nai ka-lyp, khumi luteng katalamra syn ai nai tla.
Leu meitang y tara chih nai
18 “Nangchi i Areng Tameuh my pei nai mary tleirei y, tara chih nai keungchi hawi takhra miteaung kehchi khai ai nai tla. Nichi ly meimai khen y naimy, tara chih ai nai tla.
19 Nichi ly tara chih nai khala teng y nai hawi meimai khen ai nai tlo y, un tangka py cha ai nai tlo y. Huni un langseaungchi ly khumi kachengchi hawi khumi kahawichi i mei paju hai iy, tara lam tamang hai reng nai ne.Ref 16.19: Theu 23:6-8, Lev 19:15
20 Nangchi i Areng Tameuh my pei nai pri ai peang iy, huni pri y awm u jo thai ai nai, nangchi ly leu meitang naimy chih pi jojo ai nai tla.
21 “Nangchi i Areng Tameuh i vui maicham sa u nai khala, maicham sahawi y tameuh nu Aserah i dengkeaung leungcheng leng moh. Ref 16.21: Theu 34:13
22 Naibaly myn ai chiu nai lengseaung leungcheng py leng u moh; hunichi ai Areng ly niu ngai y nai ne.Ref 16.22: Lev 26:1