7
1 Hunaibaly ngai parai naichi awi, achi ly huni leu adeu naichi awm nai deaunkho y, tlang hawi phailo y chai y naira bawibawi apachai u sina; naibaly Tameuh ai tahm khai nai tarawi y chai naira so u angym sina.
Pawla amo theu nai
2 Nangchi i paleung y kaichi ai meingtym angheng pi u; kaichi ly ami i tlang tleaung y py hawi y nai so y,ami ai py taphra y, ami ai py tapawp y leang.
3 Huni ly nangchi ai pasum ai nai kathui nai ny y leang; achi ly dei baly vanrei dei bawibawi ai nai, heng baly vanrei heng bawibawi ai nai kaichi i paleung y kang kry nai ne, nanai jangvai my kang thui pi chy bo.
4 Nangchi teng y kai i leu thui vam nai sai ly khri pa-rei ty na i, kai i nangchi ai amlyh nai sai py khri pa-rei ty nanai ne; kai ly awmnem naira my kakawi, kaichi i patang naira bawibawi y kai ly amo theu naira my kawi nai lem na.
5 Kaichi ly Makedonia pri y tym iy py kaichi i tlang my ly pipi awmnem naira awm lawh y leang, kaichi ly makeng makengrei mang y ly patang hai naira avum lawh; angam mang y ly ani nairachi awm iy, theung mang y ly ka-jei awm nairachi awm.Ref 7.5: 2 Kor 2.13
6 Na i py tahm anem naichi ai awm hai nem nai keung Tameuh my ly Tita ang jeu nai deaungkho y kaichi ai ang awm hai nem bo;
7 mymy ang jeu nai my tlairei khyh ny y leang, nangchi i kai ai niu ai ngai parai nai sai py, nangchi i vo hai nai sai py, nangchi i kai i tlang tleaung y khrikhri pa-rei sa nai sai py ang thui pi i, nangmychi deaungkho y mymy i awm hai nem naira my ly kaichi ai ang awm hai nem nai bo; hunaibaly kai ly kawn nai tleaung y kakawn ra veng bo.
8 Kai i cha kang pa nai ly nangchi ai paleung mawn hai teu iy py kai ly adawn ali y leang; ne mang ly angchei khala i naini ka-dawn ali nai ne; huni cha pa nai ly nangchi ai paleung mawn hai, nanai kapany, ne mang ly kra y nai sala chy teu chy bo.
9 Vai ly kai ly kawn bo, nangchi ai paleung mawn hai nai deaungkho y ny y leang, nangchi ai uikhei ai nai paleung mawn hai nai deauungkho y teu. Nangchi ly kaimychi deaungkho y ati sai py tamo u y ai nai, Tameuh i ngai nai kamta nangchi ai paleung mawn hai nai teu.
10 Ati mana nai mo nabaly Tameuh i ngai nai kamta paleung mawn naira my ly hengra nga ai nai pa-rei uikhei naira sa; huni my ly adawn ali naira tym hai y leang, khaileaung pri i paleung mawn naira naini dei naira sa nai teu.
11 Hunaibaly khen u cham, Tameuh i ngai nai kamta paleung mawn naira awm u nai kypkyp my ly, amkym naira py, tlau thai y nai pa-rei py, paleung hawi y naira py, jei naira py, ngai parai naira py, khrikhri pa-rei sa naira py, pajeng naira py nangchi ai khrikhri pa-rei sa hai na ly! Ati cheaungkhangra y nangchi ly huni molam y ly chai u bo, nanai amteng u hai bo.
12 Hunaibaly nangchi teng y cha katajiu teu iy py, kamngo sa nai keung molam y katajiu nai ny y leang, kamngo patang nai keung molam y py katajiu nai ny y leang, nangchi ly kaichi i tlang tleaung y hawihai palai sa nai sai ly Tameuh i mei ka-niu y nangchi teng y amteng hai naimy awm thai ai nai katajiu nai bo.
13 Hunai deaungkho y kaichi ly awmnem naimy awm bo; naibaly kaimychi i awmnem naira harei khyh ny y i, mymy i paleung ly nangmychi deaungkho y amcheng naira nga nai y, Tita i kawn naira deaungkho y kaichi my kawn nai tleaung y khri pa-rei kawnra na.
14 Kai ly ni teng y ati mo ra y py nangchi ai amlyh hai iy py, kai ai ly amthang hai leaung y leang; huna ai nai kaichi ly nangchi teng y ati cheaungkhan ra y leu meitang thui lawh nai kamta ly, kaichi ly Tita i mo y amlyh nai ly leu meitang ne khypkhyp bo.
15 Naibaly nangchi bawibawi ly ni i leu tangai u nai sai py, jei nai hawi kaso theu nai tarawi y ni ai kawn u nai sai py, mymy ly pany jo nai tarawi y, khri pa-rei nangchi mang y mymy i paleung akau nai tleaung y akaura nai ne.
16 Ati cheaungkhangra y kai ly nangchi i tlang tleaung y paleung hawi nai deaungkho y kakawn nai ne.