8
Kristianchi i sabawm nai
1 Naibaly amjo amnauchi awi, Makedonia pri i palau takhra kamkawmchi theung y Tameuh i pahenra pei nai ly nangchi ai kang pany hai ai;Ref 8.1–4: Rom 15.26
2 huna nai patang naira khri pa-rei cham nai tarawi y amo theu ala nai hawi khrikhri pa-rei kamawn ala nai my ly, nichi i khri pa-rei paawh y naimy pei nai sai ly panawi ryh panawi ryh bo.
3 Ati mana nai mo nabaly nichi ly nichi i kamjau ryrei pei, ne, nichi i pajau nai ryrei bo y py mymychi ngaingai my pei panawi bi, nanai kapany hai na a;
4 huni tamen naira hawi khumi kachaichi ai kry naira y abawi teang ai nai ly kaichi ai khri pa-rei ang takeng;
5 huni py kaichi i athang khai y nai kamta sa u iy, Tameuh i kangai y mymychi kypkyp my Areng teng y apei u manme i,kaichi teng y py apei u nai ne;
6 hunaibaly Tita ly jangvaini y sa amteaung chum nai deaungkho y hini pahenra py nangmychi theung y sa be pajau ryp ai nai kaichi ly mymy ai takeng bo.
7 Hunaibaly nangchi ly ati cheaungkhangra y ym naira y py, leu thui kawp naira y py, pany naira y py, hawihai palai sa naira bawibawi y py, kaichi ai tamen naira y py nawi ra nawi ra nai kamta huni pahenra y py nawi ra nawi ra thai ai nai atho angjeng u.
8 Kai ly leu pei nai kamta kathui y leang, khumi takhrachi i hawihai palai sa naira y nangchi i tamen u tatang nai sai cham ai nai kathui nai teu.
9 Nangchi ly achi i Areng Isu Krista i pahenra ly pany u bo, mymy kamawn nai deaungkho y nangchi ly nang thai ai nai, mymy nang iy py nangmychi kypkyp deaungkho y mymy i kamawn lawn nai ly pany u bo.
10 Hunaibaly hunira y ly kai i dawn nai kathui nai ne; huni ly nangchi i vui hawi veng, nangchi ly sa u amteaung nai keung y lawn u nai ly sanengrei awm veng bo, sa u amteaung nai harei khyp py ny y naimy, ngai py ngai u manme nai ne.
11 Hunaibaly ngai ai nai tau rym naira awm nai kamta ly, nangchi i awm nai theung i nai sa amcheang naira awm thai ai nai, vai ly sa nai ly pacheang u jau.
12 Tau rym naira awm baly ami py by y pui nai ny y naimy, mymy i awm nai kamta kawn ai ataing nai ne.
13 Kalangchi akawm u y iy, nangchi ly akawm ai nai kathui nai ny y leang:
14 na i py vanrei ahyh bawibawi ai nai nangmychi i nawi rawm awm nai ly vai dymkhawn nichi i avaw naira y sabawm ai naira lawn thai ai nai hawi, nichi i nawi rawn awm nai ly nangchi i avaw naira y sabawm ai naira lawn thai ai nai py kang napi nai teu;
15 hunaibaly vanrei ahyh u naira lawn thai ai; “Neangneang la achu nai keung ly kamlai by y leang, naibaly maidenrei la achu nai keung ly avaw lawh y leang,” nanai tajiu nai kamta.Ref 8.15: ႊ့နက 16.18
Tita hawi ahawichi
16 Na i py Tameuh teng y ly kawn nai leu tym sy. Mymy ly kai i nangchi i tlang tleaung y hawihai palai kry nai sai kamta ly Tita i paleung ai dawn hai bo.
17 Ni ly kaichi i pachei nai ly tangai tanga; na i py mymy kypkyp ly atiti hawihai palai sa ai nai tau i, mymy ngaingai nangchi teng y ang jeu ai nai theu bo.
18 Naibaly kaichi my amjo amnau leaungrei ai mymy hawi vanrei kang pato bo; huni amjo amnau ai ly Satang Kahawira y palo nai leu ly palau takhra kamkawm bawibawichi theung y amthang bo;
19 huni khyh ny y leang rai, palau takhra kamkawmchi my mymy ai ly hini pahenra molam y kaichi hawi vanrei chei ai nai khai rym bo: huni ly Areng ai tahm pasang ai nai hawi kaichi i tau rym nai sai amteng hai ai nai py sa nai ne.
20 Hini atiti pei nai kry nai sai molam y ami py kaichi ai padeng y ai nai kaichi ly amkym.
21 Ati mana nai mo nabaly Areng i mei ka-niu y khyh ny y naimy, kaichi ly khumi i mei ka-niu y py atiti cheh ai by y nai dawn rym nai ne.Ref 8.21: Lkch 3.4
22 Naibaly kaichi ly nichi hawi vanrei kaichi i amjo amnau ai pato teang i, ni my ly atiti ra y hawihai palai sa, nanai kaichi my neangneang cham bo; vai ipsaly mymy ly nangchi ai khrikhri pa-rei ym nai deaungkho y hawihai palai sa nai tleaung y sa ra nai ne.
23 Naibaly ami py Tita i satang deng baly mymy ly kai i ahawi hawi, nangchi mang y kai hawi vanrei kalop sa ahawi nai ne; naibaly kaichi i amjo amnauchi ly palau takhra kamkawmchi i amtaw thau naichi ne, Krista i nang parai naira py ne.
24 Huni deaungkho y nangchi i tamen naira hawi, kaichi i nangchi ai amlyh hai nai pany naira ly palau takhra kamkawmchi i mo y nichi teng y amteng hai u.