6
1 Hunaibaly kaichi ly mymy hawi sa ahawi nai, nangchi ly Tameuh i pahenra ai ly chawn hai y naira ngo u y ai nai kaichi kang takeng.
2 “Neng kawn ai awm nai khala y kang tangai i,Ref 6.2: Is 49.8
Paheng nai kani y kang sabawm bo,”
ang napi; khen cham, vai ly kawn ai awm nai neng ne; khen cham, vai ly paheng nai kani ne.
3 Kaichi i kry nai sai ly ang padeng y ai nai, kaichi ly ati mora y py den py atlym ai naira so y;
4 na i py Tameuh i krykeungchi kamta ati cheaungkhangra y py khumi i mei kangai awm, khri pa-rei kham pajau naira y py, patang naira y py,
5 kamnga awm naira y py, amcheng naira y py, pakhau naira y py, theaung y tla naira y py, khrukhra naira y py, sa akawm naira y py, i thai y naira y py, biu hai naira y py,Ref 6.5: Ataw 16.23
6 chai naira y py, pany naira y py, amnym naira y py, neaung hawi naira y py, Phailo Kachai y py, tamen tatangnaira y py,
7 leu meitang ra y py, Tameuh i atiti sa thai naira y py; langvawi mang py lamtang mang py hawi naira haichi deaungkho y py, palo naira hawi palo y naira deaungkho y py,
8 amyn thui tamawn nai hawi amyn kahawi thui nai deaungkho y py; tapawp nai keung kamta awm iy, khumi meitang ne lawh nai;
9 kaichi ai pany ai lawn y nai, na i py amyn amthang parai lawh nai; dei vi dei vi nai kamta, naibaly khen cham, kaichi ly heng lawh nai; parip nai kamta, na i py ang padei y lawh nai;
10 paleung mawn nai kamta, na i py kawn jojo lawh nai; kamawn kamta, na i py khumi neangneangchi ai nang hai lawh nai; ati sai py by y nai kamta, na i py ati cheaungkhang neangneang awm lawh nai.
11 Aw Korinth avang i khumichi awi, kaichi ly nangchi teng y labeaung ang iy, kaichi i paleung ly nangchi i vui am-eaung vau bo.
12 Nangchi ly kaimychi y dawn amchei nai awm u y leang, nangmychi i paleung i tamen naira y dawn amchei naira awm u lawh nai teu.
13 Hunaibaly kang pei nai kamta khypkhyp kai ai pei u teang ai nai (chanauchi teng y thui pi nai kamta kathui nai ne), nangchi py paleung am-eaung u vau teang.
Ym y naichi molam y pany hai pi nai
14 Ym y nai khumichi hawi ly adyh y nai langvui savan u ahawi reng moh; hawi naira hawi kamngo naira ly ati amtawm naira awm mo? Ti y baly kangvang hawi kaveng ly ati atawm naira awm mo?
15 Krista ly Beliara hawi ati ado naira awm mo? Ti y baly ym nai khumi hawi ym y nai khumi hawi ly nga ahawi ai naira ati awm mo?
16 Naibaly Tameuh i achura yhm ly mynchi hawi ati aly naira awm mo? Achi ly Tameuh kangheng i achura yhm ne; Tameuh my ly, “Mymychi teng y kaawm ai i, mymychi teng y kapavai ai; naibaly kai ly nichi i Tameuh ne ai i, nichi py kai i khumichi lawn ai,” napi nai kamta ly.Ref 6.16: Lev 26.12; Ezek 37.27; 1 Cor 3.16, 6.19
17 Hunai deaungkho y Tameuh my ly,Ref 6.17: Is 52.11
“Nichi theung i nai theu u ly takhra awm u, napi i,
Atiti chai y naichi ly den py nam u moh;
18 Hunaibaly kang kawn u ai i,Ref 6.18: 2 Sam 7.14; 1 Kor 17.13; Is 43.6; Jer 31.9
Nangchi i vui Ampo kang lawn ai.
Nangchi py kai i vui chapo chaniuchi lawn u ai,”
nanai ati cheaungkhang sa thai nai Tameuh my ly napi.