4
Krista i amtaw thau naichi
1 Ami my kaichi ai Krista i kalop sa nai keung hawi Tameuh i leu kathiu kry nai keung y palawn sy.
2 Hini ra y py kry nai keung ly ka-ym awm nai khumi ne ai nai aly ngai.
3 Na i py nangchi i kai ai chih nai mo, khumi i dawn naira my kai ai chih nai mo, huni ly kai i vui neangneang aly len y leang: ne, amy ai amy achih y leang.
4 Kaimy i tamang naira kapany y leang; na i py huni ly kai ai eaung hai lawh y leang; kai ai ang chih nai keungly Areng ne.
5 Hunaibaly Areng jeu y ryrei ly neng y rai khala y ati sai py chih u moh; mymy ly kaveng i atiti leu kangviuchi ai ly kangvang y patheu iy, paleung y tau naichi ai py amteng hai ai; huna nai neng khala y ly khumi leaung leaungrei ly Tameuh teng y amymy i nga ai nai kamlau palo naira nga ai.
6 Naibaly amjo amnauchi awi, leu tajiu nai ai ly katlen u y ai nai nangchi ly kaini i amtiu u thai ai nai hawi, nangchi theung y ami py leaung leaungrei mang y py am-e u y ai nai py, huni leu ly nangchi hawi ai nai kai ly Apolo kaini i tlang tleaung y dawn pata nai leu kamta katabi nai ne.
7 Nang ai ly ami my tahm ang khai katlen mo? Nang ly jawm nga nai ny y baly nang ly ati awm mo? Naibaly nang ly jawm my nga baly ati mana nai jawm my nga nai ny y nai kamta am-e lawh mo?
8 Vai py nangchi ly kawi palai bo! Vai py nangchi ly nang bo, nangchi ly kaichi abawi y naimy peang nai bo he; ne, kaichi py nangchi hawi peang ai nga ai nai nangchi ly peang tatang nai khyly kangai.
9 Tameuh my kaichi amtaw thau naichi ai ly dei ai nai ang khai rym nai kamta ly kangkhym kangtem y ang khai nai kadawn nai bo; ati mana nai mo nabaly khaileaung pri hawi, kani pri i amtaw thau naichi hawi, khumichi i mei ka-niu y py khen nai kahawi ang sa nai bo he.
10 Kaichi ly Krista deaungkho y cheng y nai ne, nangchi naini Krista y cheng nai ne; kaichi ly ham y, nangchi naini ham; nangchi ly palo naira nga, kaichi naini tahm anem naira nga.
11 Vai khrairei kaichi ly biu py alam, tui py ahai, ateaung py ateaung pajau y, khumi i nui chamum chami tabeang peung pang nai py ne; awmra py ma pany y;
12 Kaichi ly amy i kiu y sa nai khri pa-rei akawm; amichi mo ang jo iy kaichi ly amtheaung hai; amichi my ana iy kaichi ly kham tanga;Ref 4.12: Ataw 18.3
13 amichi my ang tapheaung iy kaichi ly leu kanem y parawi; vai khrairei kaichi ai khaileaung pri i amso ngailai nai, atiti bawibawi i kaneng chai y nai kamta amichi my ang palawn nai ne.
14 Hini leu ly nangchi ai kangji pei ai nai katajiu nai ny y leang, kai i chanau ngai parai naichi kamta kang parip ai nai tajiu nai teu.
15 Nangchi ly Krista y patiu nai keungchi kati pajau y pa-rei awm iy py, nangchi ly ampo neangneang by y leang; kaimy Krista Isu y Satang Kahawi saho y kang tapen nai teu.
16 Hunaibaly nangchi ly kai i amtiu ai nai kang takeng nai ne.Ref 4.16: 1 Kor 11.1; Phil 3.17
17 Hunai deaungkho y Timothei, Areng y kai i chanau ngai parai nai hawi ka-ym awm nai ai ly nangchi teng y kang pato nai ne; ni ly Krista y kai i awm nai reita, meingtym bawibawi palau takhra kamkawm tleirei y kapatiu reng nai kamta ly nangchi ai ang pany hai bi ai mang.
18 Naibaly kai ly nangchi teng y kang jeu bi y ai nai kamta my phyreichi ly paleung len bo.
19 Na i py Areng my avo hai baly, kra y nai sala y my nangchi teng y kang jeu ai; hunaibaly khumi paleung len naichi i leu ny y naimy, kai ly nichi i sa thai naira kapany ai.
20 Ati mana nai mo nabaly Tameuh i pri ly leu y ny y naimy, sa thai naira y awm nai teu.
21 Ati ngai u keh mo? Kai ly thengbeang hawi nangchi teng y kang jeu ai a? Ti y baly tamen naira hawi leu anui nai paleung apu naimy kang jeu ai a?