5
Palau takhra kamkawm theung y tlang i ngaiphi teng y naichi
1 Naibaly angai nai ly, Cheng Takhrachi theung y py awm vai y nai, khumi leaungrei ly amhm to ai la nai, huni angai nai ly nangchi theung y awm, nanai leu amthang bo.Ref 5.1: Leu 22.30
2 Naibaly nangchi ly paleung mawn iy, huna nai sa nai khumi ai ly nangchi theung i nai patheu ai nai tleaung y ly nangchi ly paleung len lawh.
3 Kaimy kypkyp ly tlang y abawi y iy py phailo ai ly ka-bawi, huna tanrei sa nai khumi ai ly vai py Areng Isu i amyn y nangchi theung y abawi nai kamta khyp my kang chih bo;
4 nagchi hawi kai i phailo ly achi i Areng Isu i sa thai naira y achu nai, hunai kamta khumi ai ly,
5 ni i phailo ly Areng i kani y ly pahengra nga thai ai nai, ni i tlang tama hai ai nai Setan ai pei khyly kana nai ne.
6 Nangchi i am-e nai ly hawi y. Angbo maiden chy naimy tako phi ai ly bom verei num be, nanai pany u y nai sai a?Ref 5.6: Kal 5.9
7 Nangchi ly angbo abawi y nai kamta khyp my tako phi kangtha lawn u thai ai nai, angbo kangngym ly pasym u pan. Krista kypkyp ai ly achi i Katlen Vui nai pawi i beram cho pathyp pi veng bo;Ref 5.7: Theu 12.5
8 hunai deaungkho y angbo kangngym ny y nai hawi, paleung patheang si nai hawi kamngora angbo abawi y nai ly, meitang naira hawi teng naira angbo abawi y nai tako hawi pawi so u sina.Ref 5.8: Theu 13.7; Leu 16.3
9 Kai i cha pa nai ly angai nai khumichi hawi amkawm y ai nai nangchi ai katajiu nai ne;
10 ne mang ly hini khaileaung pri y angai nai khumichi hawi mo, atakaw nai khumichi hawi mo, um paviu nai khumichi hawi mo, myn y chiu nai khumichi hawi mo amkawm y ai nai kang tapi y leang; hunai kamta ne i khyly nangchi ly khaileaung pri i dengdairei theu vui takengkei ai nai tla.
11 Na i py vai ly ami py amjo amnau i amyn apu makho iy angai nai khumi mo, atakaw nai khumi mo, myn y chiu nai khumi mo, mhm pavui nai khumi mo, um paviu nai khumi mo ne baly, huna nai khumi hawi amkawm y ai nai hawi, cho py cho y ai nai py nangchi teng y kang tajiu bo.
12 Kai ly angam mang i khumichi ai ly ati chih ai nai awm mo? Nangmychi theung i khumichi ai ly nangmychi my chih u iy,
13 angam mang i khumichi ai naini Tameuh my chih ai nai ny y a? Huni kamngo ai ly nangchi theung i dengdairei patheu u.