3
Tameuh i kalop sa nai keungchi
1 Amjo amnauchi awi, kai ly phailo mang y asa nai khumichi teng y thui pi nai kamta ly nangchi teng y kang thui pi pajau y leang, tlang i kangai my peang naichi, Krista y deungdi chymplei naichi teng y thui pi nai kamta kang thui pi nai teu.
2 Biu chakre ny y naimy nangchi ai kanu hang y kang pacho bo, biu chakre cho u thai y rai nai deaungkho y; ne, vai py cho u thai y jojo rai;Ref 3.2: Heb 5.12–13
3 ati mana nai mo nabaly nangchi ly tlang i kangai my peang naichi ne jojo rai: nangchi theung y akeng naira hawi aei naira awm reng nai deaungkho y nangchi ly tlang i kangai my peang nai ne iy, khumi kamta tako u jojo rai nai ny y lawh a?
4 Leaungrei ly, “Kai ly Pawla i kamkawm teu,” napi; takhra my, “Kai ly Apolo i kamkawm teu,” napi teang; nangchi ly khumi veangveang nai ny y lawh a?Ref 3.4: 1 Kor 1.12
5 Apolo ly ati mo? Pawla py ati mo? Kalop sa nai keung, nangmychi ai ym hai nai keung teu; huni py Areng my leaung leaungrei teng y ang pei nai kamta ne.
6 Kaimy ui iy Apolo my ly tui lei hai, na i py Tameuh my veang hai nai ne.Ref 3.6: Ataw 18.4–11, 24–28
7 Hunaibaly ui nai keung py ati sai py ny y leang, tui lei hai nai keung py ati sai py ny y leang, na i py veang hai nai keung Tameuh my leaungrei khyh.
8 Naibaly ui nai keung hawi tui lei hai nai keung ly bomrei teu; na i py leaung leaungrei ly amymy i sa akawm nai kamta amymy i kawn nai vang ly nga ai.
9 Kaini ly Tameuh hawi kalop sa ahawi nai ne; nangchi ly Tameuh i pachai nai hlau ne i, Tameuh i sa nai yhm py ne teang.
10 Kai ai Tameuh i pahenra ang pei nai kamta, yhm sa nai lu keh i kawp parai nai kamta ly kaimy lengseaung leng i, khumi takhra my salo y yhm sa. Na i py khumi leaung leaungrei ly huni salo y yhm sa ai nai sai ly amkym bawibawi sy.
11 Leng angchi nai lengseaung ny y baly, lengseaung takhra ami py leng thai y leang bo, huni ly Isu Krista ne.
12 Naibaly ami py leng nai lengseaung tleaung y ly muka nai mo, tangka nai mo lengseaung vang ka-teng nai mo, dengkeaung nai mo, acha nai mo, choh phi nai mo yhm so khyly khumi leaung leaungrei i kalop sa nai ai ly amteng hai ai.
13 Ati mana nai mo nabaly mai y amny ai nai deaungkho y huni kani my ly amteng hai ai; naibaly mai kypkyp my ly khumi leaung leaungrei i kalop sa nai ly mana atawm mo, nanai cham ai.
14 Ami i kalop sa nai py huni tleaung y sa iy awm jo baly huni khumi ly kawn nai vang nga ai.
15 Ami i kalop sa nai py kang baly huni ly chau ai; na i py mymy kypkyp ly hengra nga ai, ne mang ly mai y tako prei nai kamta ne.
16 Nangchi ly Tameuh i awm naira ne, nanai hawi, Tameuh i phailo ly nangmychi y awm jo, nanai py pany y nai sai a?Ref 3.16: 1 Kor 6.19; 2 Kor 6.16
17 Ami py Tameuh i awm naira ai taphra baly huni khumi ai ly Tameuh my taphra teang ai; Tameuh i awm naira ly kachai ne i, huni ly nangmychi ne.
18 Ami py amymy ai atapawp moh sy. Nangchi theung y ami py, “Kai ly hini khaileaung pri i atitira y cheng bo,” nanai adawn baly, mymy ly cheng thai ai nai cheng y nai khumi lawn sy.
19 Ati mana nai mo nabaly hini khaileaung pri i cheng naira ly Tameuh i dawn naira y ly pathu nai ne. “Mymy ly khumi kachengchi ai ly mymyychi i cheng tapawp naira y man hai reng,” nanai hawi,Ref 3.19: Job 5.13
20 “Areng my ly khumi kachengchi i dawn nairachi ly jawmjawm teu nanai pany,” nanai py tajiu nai ne.Ref 3.20: Sam 94.11
21 Huna nai y khumi deaungkho y ami py am-e moh sy.
22 Naibaly ati cheaungkhang ly nangchi i ne bebe, Pawla mo, Kipha mo, khaileaung pri mo, heng naira mo, atiti awm angchichi mo, atiti awm ai naichi mo, bawibawi ly nangchi i ne bebe;
23 naibaly nangchi ly Krista i ne, Krista py Tameuh i ne.