2
Krista dei pi ai nai satang
1 Naibaly amjo amnauchi awi, kai ly Tameuh i leu kathiu kang thui pi nai nangchi teng y kang jeu nai khala y ly leu kawp parai nai thui nai hawi, cheng parai naira y py kang jeu nai ny y leang.
2 Ati mana nai mo nabaly Isu Krista hawi mymy ai kraws tleaung y tahen nai leu harei ny y baly, nangchi theung y ati sai py kang thui pi ai nai katau y ly.
3 Naibaly kai ly nangchi theung y ham y nai hawi jei nai khri pa-rei kaso theu nai py awm bo.Ref 2.3: Ataw 18.9
4 Naibaly nangchi i ym naira ly khumi i cheng naira y awm y naimy, Tameuh i atiti sa thai naira y awm thai ai nai,
5 kai i leu katheu nai hawi leu kang thui pi naichi ly leu kacheng y parawi nai leu ny y, na i py phailo hawi atiti sa thai naira y pany hai nai teu chy bo.
Tameuh i cheng naira
6 Na i py kaichi ly khumi ka-cheangchi theung y ly cheng nai leu thui pi; na i py hini khaileaung pri i cheng nai leu ny y leang, hini khaileaung pri i peang nai keung tama ai naichi i cheng nai leu py ny y leang.
7 Kaichi ly Tameuh i leu kacheng ly leu kathiu y thui pi nai teu, leu kacheng aheu nai, achi i nang parai ai naira Tameuh my khaileaung palum y rai khala y my khai rym nai bo.
8 Huni ly hini khaileaung pri i peang nai keungchi ly leaung py pany y: pany iy khyly nang parai nai Areng ai ly kraws tleaung y tahen ai ny y.
9 Na i py,Ref 2.9: Is 64.4
“Mei y niu vai y nai, kano y thai vai y nai,
Khumi i paleung y kun vai y nai ly
Tameuh my mymy ai tamen naichi i vui
sa pi rym nai ngiereichi ly,”
10 nanai tajiu kamta, hunichi ly Tameuh my achi ai ly Phailo i saho y ang pany hai nai bo. Phailo my ly ati cheaungkhang khen patawm be nai ne; ne, Tameuh i leu kathiuchi py.
11 Khumichi theung y khumi i satang ly khumi i phailo, mymy theung y awm naimy pany y baly ami pany ai mo? Hunai kamta khyp teang Tameuh i satang ly Tameuh i Phailo my ny y baly ami py pany y leang.
12 Hunaibaly Tameuh i atiti jawm ang pei naichi ly achi pany thai ai nai, achi ly khaileaung pri i phailo nga nai ny y i, Tameuh teng i Phailo nga nai ne.
13 Achi ly huni atiti pei naichi satang thui pi, khumi i cheng naira patiu nai leu y thui nai ny y, Phailo i patiu nai leu y thui nai teu, phailo mang i satang ly phailo mang i satang hawi dawn pata nai.
14 Tlang mang y asa nai khumi ly Tameuh i phailo mang i atitichi ai ly kawn y leang; ni i vui ly pathu naira ne; hunichi ai Phailo mang y dawn pasym nai ne nai deaungkho y mymy ly pipi pany pajau y.
15 Na i py phailo mang y asa nai khumi ly ati cheaungkhang dawn pasym i, ni ai ly ami py cheh thai y leang.
16 Areng i paleung ai pany chum iy, mymy ai patiu pajau nai keung ly ami mo? Achi naini Krista i paleung apu nai ne.Ref 2.16: Is 40.13