10
Myn y chiu nai molam dawn hai nai
1 Amjo amnauchi awi, hini ly nangchi pany y ai nai kangai y leang, huna nai achi i amsi sangum bawibawichi ly khupanym anui y bebe awm i, nichi bawibawi ly pangli y py bebe angpeang;
2 naibaly nichi bawibawi ly khupanym y hawi pangli y py Mosi teng y baptisma nga u bebe;
3 naibaly nichi bawibawi ly phailo mang i biu py vanrei cha;Ref 10.3: Theu 16.35
4 naibaly nichi bawibawi ly phailo mang i tui nei nai py vanrei nei; ati mana nai mo nabaly nichi ly mymychi teng y abang nai phailo mang i lengseaung pui i nai bawibawi nei u bo; huni lengseaung pui ly Krista ne.Ref 10.4: Theu 17.6; Kati 20.11
5 Na i py nichi theung i khumi nawi keh naichi i tlang tlaung y ly Tameuh my paleung angai hai y i, nichi ai daichi ka-vym y atlym hai ka.Ref 10.5: Kati 14.29–30
6 Naibaly nichi i atiti hawi y sa ai nai ngai phi nai kamta achi ly ngai phi teang y ai nai, hunichi ly achi i amtiu naira ne.Ref 10.6: Kati 11.4
7 Naibaly nichi theung i phyreichi i sa nai kamta nangchi ly myn y chiu nai keung lawn u moh, “Khumi mipuichi ly cha ai nai hawi nei ai nai ateh iy, amau ai nai angthau u bi,” nanai tajiu nai kamta.Ref 10.7: Theu 32.6
8 Naibaly nichi theung i phyreichi i angai nai kamta ly angai u moh sina; kanirei y my nichi meaungkateaung nyh pa-thom sang thomrei atlym ka chy bo.Ref 10.8: Kati 25.1–18
9 Naibaly nichi theung i nai phyreichi ly Areng ai cham i pavui my tama hai nai kamta ly Areng ai cham u moh sina.Ref 10.9: Kati 21.5–6
10 Naibaly nichi theung i nai phyreichi ly preaung iy, tama hai nai keung my tama hai nai kamta ly preaung u moh.Ref 10.10: Kati 16.41–49
11 Naibaly huni ly amtiu ai naira lawn ai nai nichi i tlang tleaung y tym hai nai chy bo; achi, neng tem naira y tym naichi ai ang parip ai nai tajiu nai ne.
12 Hunai deaungkho y angdo, nanai adawm nai khumi ly amkym sy, ti y baly atlym lawh na.
13 khumi i kham pajau ai nai ryrei ny y baly parawi naira nanai ly nangchi i tlang tleaung y pipi tym vai y leang. Na i py Tameuh ly ka-ym awm nai ne, ni my ly nangchi kham pajau ai nai ryrei ny y baly parawi naira avum ai nai pei y ai; na i py nangchi kham pajau thai ai nai, parawi naira hawi vanrei nangchi i theu ai naira lam ang sa pi ryp ai.
14 Hunai deaungkho y kai i ngai parai naichi awi, myn y chiu nai ly angpreng u veng.
15 Khumi kachengchi teng y thui nai kamta kathui nai ne; kai i leu thui nai ly dawn u.
16 Amtheaung nai khau, achi i amtheaung hai reng nai ly Krista i thi y amtawm nai ny y lawh a? Achi i tako theng baw reng nai ly Krista i tlang y amtawm nai ny y lawh a?Ref 10.16: Mt 26.26–28; Mk 14.22–24; Lk 22.19–20
17 Achi, khumi neangneang ly tako phirei, tlang bomrei ne chy bo; achi bawibawi ly huni tako phirei ra i nai phy nga sa sa veng.
18 Tlang mang y Israelachi ai khen u cham, apathyp nai mawi cha nai keungchi ly maicham hawi amtawm nai ny y lawh a?Ref 10.18: Lev 7.6
19 Myn teng y apathyp nai ly atiti aly awm nanai hawi, myn py atiti aly awm, nanai py kathui a?
20 Na i py Cheng Takhrachi i apathyp nai ly Tameuh teng y apathyp nai ny y leang, vawinamchi teng y apathyp nai teu; nangchi ly vawinamchi hawi amtaw ai nai kang ngai hai y leang.Ref 10.20: Leu 32.17
21 Nangchi ly Areng i khau hawi vawinamchi i khau hawi nei abom thai y leang: nangchi ly Areng i sabawi y hawi, vawinamchi i sabawi y py cho abom thai y leang.
22 Ti y baly achi ly Areng my takho ai nai pacheang nai tau lawh a? Achi ly mymy tleaung y ham keh lawh a?Ref 10.22: Leu 32.21
23 Ati cheaungkhang sa ngau; na i py ati cheaungkhang sa ai nai avo y leang. Ati cheaungkhang sa ngau, na i py ati cheaungkhang sa naira y khaw hai y leang.Ref 10.23: 1 Kor 6.12
24 Ami py amy i hawi ai naira hau y naimy, saleaungchi i hawi ai naira hau sy.
25 Mawi seng y jo ai ngierei ly paleung y hawi nai hawi y nai pany naira deaungkho y sai py deng kalei y naimy cho u;
26 ati mana nai mo nabaly khaileaung hawi huni theung y awm nai bawibawichi ly Areng i ne. Ref 10.26: Sam 24.1
27 Ym y naichi theung i leaungrei my ang chi iy nangchi lyp ai nai ngai baly, paleung y hawi nai hawi y nai pany naira awm nai deaungkho y ang pawi pi nai ngierei ly deng kalei y naimy cho u.
28 Na i py khumi ami py nangchi teng y, “Hini ly apathyp nai mawi,” nanai ang thui pi baly, ang thui pi nai keung deaungkho y hawi, paleung y hawi nai hawi y nai pany naira deaungkho y py cho u moh:
29 nangmy i paleung y hawi nai hawi y nai pany naira deaungkho y ny y leang, mymy i vui teu; khumi takhra i paleung y hawi nai hawi y nai pany naira deaungkho y kai i savairu nai ly ati mana nai cheh lawh a?
30 Kai kawn parai naimy phy nga baly kai i kawn nai leu thui naira y ati mana nai kai ai thui tamawn lawh a?
31 Hunaibaly nangchi cha i py nei i py, nangchi i sa nai ngierei y py Tameuh ai palo ai nai so u bebe.
32 Judachi i vui py, Krikchi i vui py, Tameuh i palau takhra kamkawm i vui py atlym hai naira den py ati sai py so u moh;
33 hunai kamta teang kai py amy i chawn naira hau y naimy nichi heng naira nga thai ai nai, khumi neangneang i chawn naira hau lawh i, khumi bawibawichi ai cheaungkhangra y kakawn hai.