11
1 Kai ly Krista i amtiu nai keung lawn nai kamta ly nangchi ly kai i amtiu nai keung lawn u.Ref 11.1: 1 Kor 4.16; Phil 3.17
Tameuh ai chiu nai khala lu amym nai
2 Naibaly nangchi ly ati cheaungkhangra y kai ai pany u jo nai deaungkho y hawi, leu taviu nai kang thui pi nai kamta khyp pateung u cheng jojo nai deaungkho y py kang palo mang.
3 Na i py neampacho leaung leaungrei i lu ly Krista ne, neampachy i lu ly neampacho ne, Krista i lu ly Tameuh ne, nanai ly nangchi pany ai nai kangai.
4 Neampacho ly lu amym naimy chiu sa nai mo, leu thui pi nai mo ngierei ly mymy i lu ai amthang hai leaung nai ne.
5 Na i py neampchy ly lu amym y naimy chiu sa nai mo, leu thui pi nai mo ngierei ly mymy i lu ai amthang hai leaung nai ne: mymy ly vau pyn nai hawi vanrei teang.
6 Neampachy ly lu amym y naimy awm makho baly vau tlamtlam sy; na i py neampachy ly sam vau nai mo, vau pyn nai mo angji ngailai na makho baly lu amym sy.
7 Neampacho naini Tameuh kamta atawm nai hawi, mymy i nang parai naira py ne nai deaungkho y lu amym ai nai pipi avo y; na i py neampachy ly neampacho i nang parai naira ne.Ref 11.7: AA 1.26–27
8 Neampacho ly neampachy teng i dengdairei theu nai ny y leang; neampachy ly neampacho teng i dengdairei theu nai teu.Ref 11.8–9: AA 2.18–23
9 Ati mana nai mo nabaly neampacho ly neampachy i vui y sa nai ny y leang; neampachy naini neampacho i vui y sa nai teu.
10 Huna nai y neampachy ly kani pri i amtaw thau naichi ai tahm khai nai deaungkho y mymy i lu y aly peang nai ka-ma-ra amym ai nai tla.
11 Na i py Areng y ly neampachy ly neampacho ny y baly awm pajau y, neampacho py neampachy ny y baly awm pajau y leang teang.
12 Neampachy ly neampacho teng i dengdairei theu nai kamta ly neampacho py neampachy teng i dengdairei tapen nai ne; na i py ati cheaungkhang ly Tameuh teng i dengdairei theu nai bebe.
13 Nangmychi y adawn u cham, neampachy ly lu amym y naimy Tameuh teng y chiu sa nai ly apu a?
14 Neampacho ly sam kasau khai baly mymy i vui angji ngailai nai ne, nanai nangmychi i tapen ahawi nai paleung my py nangchi ai pany hai y a?
15 Neampachy naini sam kasau khai baly mymy i vui nang parai naira ne; mymy i sam ly mymy ai khiu ai naira pei nai ne.
16 Ati py ne sy, ami py aei ai naira awm i khyly hunai ka-tawm reita nanai ly achi ly pipi by y, Tameuh i palau takhra kamkawmchi py by y.
Areng i biu
(Mt 26:26-29; Mk 14:22-25; Lk 22:14-20)
17 Na i py nangchi ly hawi ra hawi ra ai nai mang y ny y naimy, hawi y ra hawi y ra ai nai mang y achu u lawh nai deaungkho y, hini kai i leu kang pei ai naira y ly kang palo y leang.
18 Angchei i naira y ly nangchi ly kamkawm kamta achu u iy, nangchi theung y akhawi takhra naira awm reng, nanai amichi i thui nai kathai; kai ly ym py kaym hup lawh.
19 Meitang khyp naichi ai nangchi theung y amteng hai thai ai nai, nangchi theung y akhawi takhra naira py awm ai nai tla yb nai ne.
20 Hunaibaly nangchi ly achu u nai khala y ly Areng i biu cha ai nai vuilam ny y leang;
21 nangchi ly khumi leaung leaungrei cha iy amy i biu cha man lawh veng; hunaibaly khumi leaungrei ly kajeu alam iy khumi leaungrei ly pavui lawh.
22 Ati mana nai sai mo? Nangchi ly cha ai nai nei ai nai yhm by y nai sai a? Ti y baly nangchi ly Tameuh i palau takhra kamkawm ai tahm khai u y nai, ati sai py by y naichi ai ly amthang hai u leaung lawh a? Nangchi teng y ati kang thui pi ai mo? Huni ra y ly kang palo ai a? Kang palo y leang.
23 Kai i leu kang thui pi pateang nai ly Tameuh teng i dengdairei kanga nai na a, huna nai Areng Isu ai patiu hai nai dym y ly mymy ly tako la i, kawn nai leu thui pajau iy theng baw theng bawi i,
24 “Hini ly kai i tlang, nangchi i vui kang pei nai; kai ai pany jo ai nai hini ly so u,” napi nai ly.
25 Hunai kamta teang dym biu cha pajau iy khau py la i, “Hini khau ly kai i thi y leu maikawm kangtha ne; nangchi nei nai tleirei kai ai pany jo ai nai hini ly so u,” napi nai ly.Ref 11.25: Theu 24.6–8; Jer 31.31–34
26 Nangchi ly huni tako cha iy, khau py nei nai tleirei ly mymy ly ang jeu ali y ryrei ly Areng i dei naira pany jo nai ne.
27 Hunai deaungkho y ami py cha ai ataing y naimy tako cha nai mo, Areng i khau nei nai mo ngierei ly, Areng i tlang hawi thi y sum naira nga ai.
28 Hunaibaly khumi ami py amymy ai acham amang sy, huna iy tako cho sy, khau py nei sy.
29 Cha nai hawi nei nai keung ly Areng i tlang ai hawihai palai adawn y pasi lawh baly, amy i tlang tleaung y tara chih ai nai cha nei nai teu.
30 Hunai deaungkho y chy bo, nangchi theung y khumi neangneang ham y nai no angdo nai ly, i naichi py maidenrei khyh ny y leang.
31 Na i py amychi ai hawihai palai adawn baly achi ai tara ang chih ai nai ny y ai.
32 Na i py achi ai tara ang chih ai nai awm lawh teu iy py, khaileaung pri hawi vanrei sum naira ngo y ai nai, achi ly Areng my ang parip naira y awm nai ne.
33 Hunai deaungkho y kai i amjo amnauchi awi, nangchi ly cha ai nai achu nai khala y ly leaung leaungrei aiajeng u.
34 Nangchi i achu nai ly tara chih naira y awm y ai nai, ami py kajeu alam baly amy i yhm y cho sy. Naibaly atiti takhra ly kai kang jeu nai khala y ka-vo kang dawn hai ai.