9
Amtaw thau i nga ai avo nai hawi sa ai nai kalop
1 Kai ly alaw nai ny y lawh a? Kai ly amtaw thau nai ny y lawh a? Kai ly Isu, achi i Areng ai niu y lawh a? Nangchi ly Areng y kai i sa nai ny y lawh a?
2 Kai ly khumi takhraichi i vui ly amtaw thau nai ny y iy py, nangchi i vui ly ne khyp; ati mana nai mo nabaly nangchi ly Areng y kai i amtaw thau nai sai ka-ma-ra ne he.
3 Kai ai chih nai keungchi ai katlau ai nai ly hini ne he.
4 Kaichi ly cha ai nai hawi nei ai nai hawi aly peang y lawh a?
5 Kaichi ly amtaw thau nai takhrachi hawi, Areng i amjo amnauchi hawi, Kipha i sa nai kamta py ym nai aju ai hawi ai nai aly peang y a?
6 Ti y baly kalop so y ai nai Barnaba kaini my aly peang y kalei khyh a?
7 Amy apacho ryp iy tavaimi kalop ami sa vai mo? Athai cho y pui naimy kreip akho ami sa vai mo? Ti y baly tawnbawi kanghu kanu cho y pui naimy tawnbawi kanghu ami kry vai mo?
8 Huni leu ly khumi kamta khyp naimy kathui nai a? Reita leu py huni kypkyp ly thui teang y nai sai a?
9 Mosi i Reita cha-iu y ly, “Si katai ly choh ati nai thym khala y labeaung y kawm moh sy,” nanai tajiu nai awm.Ref 9.9: Leu 25.4; 1 Tim 5.18
10 Tameuh my si katai i vui harei dawn hai nai khyh a? Amychi i vui harei thui khyh nai ny y a? Ne chy, amychi i vui tajiu nai ne; ati mana nai mo nabaly khaileaung pachai nai keung ly athang khai naira awm nai pachai ai nai tla, choh takheaung nai keung py phy nga ai athang khai nai takheaung ai nai tla.
11 Kaichi ly phailo mang i atitichi nangchi teng y kang hei chum nai bo y ly, nangchi i tlang mang i atitichi pakym khyly rengrang tlai napi ai a?Ref 9.11: Rom 15.27
12 Khumi takhrachi malawn py nangchi i tlang tleaung y hini aly peang naira nga baly, kaichi ly nga ra ai nai tlo y a? Na i py kaichi ly huni aly peang naira ly teaung y leang. Kaichi ly Krista i Satang Kahawi kang paka y ai nai kaichi ly ati cheaungkhang kham tanga nai teu.
13 Achura yhm kalen pui y atiti kachai kry nai keungchi ly, achura yhm kalen pui i atitichi cha u nai hawi, maicham kalop sa nai keungchi ly maicham hawi phy nga, nanai pany u y nai sai a?Ref 9.13: Leu 18.1
14 Hunai kamta khyp pa-rei Areng my ly, “Satang Kahawi thui pi nai keungchi ly Satang Kahawi i saho y mymychi i cha nei naira nga ai nai khai pi rym nai ne.Ref 9.14: Mt 10.10; Lk 10.7
15 Na i py kai ly hunichi ha py teaung y leang; naibaly kai i tlang tleaung y hunai kamta sa u ai nai hini leu ly katajiu nai ny y leang; ami py kai i palo nai sai ly ati sai py ny y nai sa nai tleaung y ly dei i khyly kai i vui y hawi keh alam ai.
16 Satang Kahawi thui pi i py kapalo naira ha py by y; kai i tlang tleaung y aly aeang nai amtei bo; Satang Kahawi kathui pi y baly kai ly sum ryp bo.
17 Huni ly amymy ngaingai kasa baly kai ly kawn nai vang awm; na i py amymy ngaingai sa nai ny y i py, atiti kry ai nai kalop ly ang au veng bo.
18 Tumbaly kai i kawn nai vang ly ati mo? Satang Kahawi y kai i aly peang naira angym pa-rei teaung y i, kai ly Satang Kahawi kathui pi iy vang ngo y naimy Satang Kahawi i kalop kasa pajau nai ne.
19 Kai ly ami i miseaung ny y iy py, khumichi nawi nai tleaung y nawi ra naichi ai kanga thai ai nai, kai ly khumi bawibawichi i miseaung y kapalawn bo.
20 Hunaibly Judachi ai kanga thai ai nai Judachi teng y Juda kamta kaawm; kai ly reita anui y awm y pui naimy, Reita anui y awm naichi ai kanga thai ai nai, Reita anui y awm naichi teng y Reita anui y awm naichi kamtakaawm;’
21 kai ly Tameuh i mo y Reita y awm y nai ny y naimy, Krista i reita anui y awm naimy Reita by y naichi ai kanga thai ai nai Reita by y naichi teng y Reita by y nai kamta kaawm.
22 Ham y naichi ai kanga thai ai nai, ham y naichi teng y ham y nai kamta kaawm; ati mo sairei kasa iy, phyreichi ai kapaheng thai ai nai kai ly khumi bawibawichi teng y ati cheaungkhang kalawn bo.
23 Satang Kahawi phy kanga hawi teang thai ai nai huni Satang deaungkho y ati cheaungkhang kasa.
24 Angpreng acham naira y acham naichi bawibawi ly angpreng, na i py kawn nai vang ly leaungrei chy nga khyh, nanai ly nangchi pany y a? Nangchi nga thai ai nai hunai kamta khyp angpreng u.
25 Naibaly acham naira y acham tanga nai ngierei ly ati cheaungkhangra y amkym chauchau. Naibaly nichi ly mawn thai nai areng lukhym nga ai nai sa nai ne; na i py achi ly mawn thai y nai areng lukhym nga ai nai sa nai ne.
26 Hunaibaly kai ly amny amcha y nai angpreng nai ny y leang; kai i tapheu nai sai ly ali ai tapheu nai kamta ny y leang;
27 na i py kai ly kai i tlang y ka-tapheu ryry nai miseaung y kapalawn veng, ti y baly khumi takhrachi teng y leu kathui nai bo y kaimy kypkyp ai pasum lawh na.