8
Thengthai takhu ai paleung mei y niu nai
1 Kai ly sa thai naira angym nai Areng teng i dengdairei, paleung mei y kaniu bi bo. Huni ly thengthai kangmynchi khai nai takhu ne.
2 Areng my kai ai, “Amo awi, ati niu mo?” nanai ang deng.
Kaimy, “Thengthai kangmynchi khai nai takhu kaniu,” kanapi.
Areng my kai teng y, “Kai i khumi Israelachi ly kangmyn du iy vui ai nai, kangkhym i neng tym bo. Kai ly nichi ai kapajeng y ai nai paleung amtlau vui ai ny y.
3 Huni kani y samrang yhm i khulym thui nai raawichi ly vo nai raawichi mang y lawm vui ai. Meingtym tleirei y kadei veuchi awm ai i, huni veuchi ai kangviu y aphi u ai,” nanai leu pei bo.
Israela khumichi i taham kasi
4 Nangchi i pri theung y kajeu alam naichi ai chiu piupa iy, khumi kamawnchi ai ana nai khumichi awi, hini leu tangai u.
5 Nangchi my thui nai ly “Kaichi ly chohpui chomaw jo ai nai ngai; chai nai kani kheih ai nai malawn py ajeng pajau y na bo. Anawn kani ly mana khala y kheih ai mo? Huni kani kheih baly kaichi ly teng y nai takhu teaung hawi, teng y nai sie khyrychi teaung iy vang palyn nai jo ai.
6 Vang teng y nai choh pui chomaw ai vang palyn iy jo ai. Kalai kangngym pe pajau y nai khumi kamawn ai hau iy, miseaung palawn ai nai phainai bomrei vang by y nai hawi van ai,” nanai thui u bo.
7 Israela i Areng Tameuh my vaineng abeu nai ly: “Kai ly hini khumichi i hawi y sa naichi ai, mana khala py tami vui pajau y leang.
8 Hina nai kamngochi sa nai molam y kaleih pui theu i, pri verei i khumichi ly paleung si paleung mawn naira avum u ai. Pri verei ly Aikupta pri i Naing tavo tui kamta, anem lawh, asang lawh iy ahyn kanangkang na ai.
9 Kai ly huni kani y kanithun teng nai khala kani dym hai ai i, kanithun nai khala my khaileaung pri verei, kaveng my khiu hai ai, nanai kai sa thai naira angym nai Areng my leu pei bo.
10 Nangchi i amo theu nai pawichi ai, sih tla nai pawi lawm hai ai. Nangchi i amo theu sarai iy khulym thui nai raawichi ly vo nai raawichi lawm vui ai. Nangchi ly sam vau chum iy, paisiu kanih akhiu u ai. Chapo leaungrei awm nai dei keng nai deaungkho y, paleung si tapai nanai amhm ampo kamta lawm ai. Huni kani ly tem khala khrairei khri pa-rei hawi y nai kani lawm ai.
11 “Kaimy pri verei tahum takang pui theu hai nai neng kani tym dudu bo. Teicha alam nai py ny y, tui ahai nai py ny y. Areng teng i leu alam nai ne ai. Kai, sa thai naira angym nai Areng my kang thui pi bo.
12 Khumichi ly pangli kadei dengdairei, mrethe pangli y tym pa-rei, tosyh mang dengdairei nisi mang y khrairei, meingtym tleirei y amki iy Areng teng i leu pei nai hau u ai. Na i py ngo y naimy awm u ai.
13 Huni kani y no-na by y iy atho awm nai thawndeang hawi anglochi malawn py, tui ahai phi nai deaungkho y atlym u ai.
14 Samari tameuh mynchi napi nai, ‘Dan tameuh’ ai py, ‘Beraseba mary i tameuh’ ai py, tau iy vaineng abeu reng nai khumichi ly ang thau teang pajau y na pa-rei atlym u ai,” napi.