AMOS
I AMO LEU
1
1 Hini ly Tekoa avang i beram typ nai keung Amo i thui nai leuchi ne. Uzi ly Juda samrang lawm iy, Jehoasa i chapo Jeroboam ly Israela pri i samrang lawn nai neng, kaleih theu y kyh rai nai saneng nyhrei khala y, Tameuh ly Amo teng y paleung mei hawi Israelachi i molam y, hini leuchi pei pi nai ne.Ref 1:1 2 Areng 15:1-7; 2 Neng 26:1-23; 2 Areng 14:23-29
2 Amo my, Ref 1.2: Joe 3.16
“Zion mawi dengdairei Areng i aeu nai raawi thai bo;
Jerusalem mary theung i dengdairei, kani pajyh nai katyn thai hai bo.
Beram sui tlai nairachi ly jeirawm be bo i, Karamela mawi i achachi ly jei nawm veng bo,” nanai thui.
Israelachi i yhm deaungpa prichi ai Tameuh my tara chih naichi
Suria khumichi ai tara chih nai
3 Areng my, “Damaska mary i khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly Kilead pri i khumichi ai pahyp y naimy ana kalikachi na bo.Ref 1:3-5 Is 17:1-3; Jer 49:23-27; Zek 9:1
4 Hunai deaungkho y kai ly samrang Hazaela kangpreangchi tlang tleaung y mai kani nai hai iy, samrang Benhada i amtangra yhmchi ai maidym satlawi palawn vui ai.
5 Kai ly Damaska mary apai katheuchi ai taphra vui iy, Avan leaunghawi hawi Betheden mary ai peang naichi ai tamyh ai. Suria khumichi ai Kira pri mang y langheng hawi vui ai,” napi.
Philistia khumichi ai tara chih nai
6 Areng my, “Kaza mary i khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly khumi cheng vui jeungreichi ai, Edom khumichi teng y miseaung y jo u nai ne.Ref 1:6-8 Isaia 14:29-31; Jer 47:1-7; Ezek 25:15-17; Joel 3:4-8; Zep 2:4-7; Zek 9:5-7
7 Hunai deaungkho y kai ly Kaza mary apaichi salo y mai kani nai hai iy, Kaza amtangra yhmchi ai maidym satlawi palawn vui ai.
8 Asadod hawi Asakelon marychi peang nai khumichi ai katamyh vui ai. Kai ly Ekron mary ai py kapajeng ai. Awm asai rai nai Philistia khumi ngiereichi py, dei u be ai,” napi.
Turu khumichi ai tara chih nai
9 Areng my, “Turu khumichi ly kamngo sa nai bo y sa panawi u bi nai deaungkho y, kai ly nichi ai meitang khyp kapajeng ai. Nichi ly khumi chengvui jeungreichi ai Edom pri mang y pri pala pawn nai ne. Naibaly nichi ly mychi naimy amsawi amnai asa nai sumneang ai taphra vui bo.Ref 1:9-10 Isaia 23:1-18; Ezek 26:1—28:19; Joel 3:4-8; Zek 9:1-4; Mt 11:21-22; Lk 10:13-14
10 Hunai deaungkho y kai ly Turu mary apaichi salo y mai kani nai hai iy, Turu amtangra yhmchi ai maidym satlawi palawn vui ai.
Edom khumichi ai tara chih nai
11 Areng my, “Edom khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly mychi i amjo amnau Israelachi ai, ngo y nai nga pa-rei hui iy pahyp y naimy ana bo. Nichi i kado theu nai sai ly mana khala py rym hai y naimy, kado theu nai mai angveaung hai na bo.Ref 1:11-12 Isaia 34:5-17, 63:1-6; Jer 49:7-22; Ezek 25:12-14, 35:1-15; Oba 1-14; Mal 1:2-5
12 Hunai deaungkho y kai ly Teman mary salo y mai kani nai hai iy, Bozarah amtangra yhmchi ai maidym satlawi palawn vui ai,” napi.
Ammon khumichi ai tara chih nai
13 Areng my, “Ammon khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly khu ta-i ai nai ngai phi nai deaungkho y, tavai atiu nai khala Kilead pri neampachy jeubomchi ai malawn py, kajeu pho iy padei bo. Ref 1:13-15 Jer 49:1-6; Ezek 21:28-32, 25:1-7; Zep 2:8-11
14 Hunai deaungkho y kai ly Rabah mary apaichi salo y mai kani nai hai iy, Rabah amtangra yhmchi ai maidym satlawi palawn vui ai. Naibaly tavai atiu nai kani y aeu nai katyn amsau nai thai iy, atiu nai ly ali kamchai kamta, khri pa-rei ho na ai.
15 Nichi i samrang hawi bangtang bawibawichi ai ly pri takhra mang y hawi pawn ai,” napi.