3
Tameuh my khumi cheng cheaungkhangchi ai tara chih ai nai
1 Areng my,
“Huna nai khala kai ly
Juda pri hawi Jerusalem mary y nang chawn hai teang ai.
2 Khumi cheng cheaungkhangchi ai angym hai teang iy
tara chih nai leaunghawi mang y pahawi ai.
Kai i khumichi ai nichi my sa nai molam y
huni meingtym y nichi ai, kaimy tara chih ai.
Nichi ly Israela chengchi ai, pri takhra mang y ahei hai i,
kai i pri Israela ai ahei hai akyhkyh nai ne.
3 Nichi ly langheng y hawi naichi ai
ami teng y au ai mo, nanai tambe va u bo.
Bimachi ai vang pei ai nai hawi, kreip hang vang pei ai nai molam y
deaungdi neampacho, neampachychi ai miseaung y jo u nai ne.
4 Turu mary, Sidon mary hawi Philistia pri meingtym tleirei i khumichi awi, nangchi ly kai ai ati sa ai nai atho sa u nai mo? Kai ai vawitheung tha ai nai atho sa u nai a? Huna nai atho sa u lawh baly, kai ly nangchi ai vawitheung tha manme ai! Ref 3:4-8 Is 14:29-31, 23:1-18; Jer 47:1-7; Ezek 25:15—28:26; Amo 1:6-10; Zep 2:4-7; Zek 9:1-7; Mt 11:21-22; Lk 10:13-14
5 Nangchi ly kai i muku, tangka, yhmtheaung katuichi ai, nangmychi i achura yhmchi mang y syn u bo.
6 Juda khumichi hawi Jerusalem mary i khumichi ai, mymychi pri i dengdairei palo paraira mang y hawi iy, Krip chengchi teng y jo u nai ne.
7 Nichi ai nangchi my jo nai meingtym i dengdairei, kaimy kapahawi ali teang ai. Nichi i tlang tleaung y nangchi my sa nai kamta, nangchi ai vai, kaimy sa teang ai.
8 Kai ly nangchi i cho chanauchi ai, Juda khumichi i miseaung ka-jo ka-van lawm hai ai. Juda khumichi py nichi ai palo parai nai Seba khumichi teng y jo vui ai. Hini ly kai, Areng i kang thui pi nai leu ne.
9 “Khumi cheng cheaungkhangchi teng y
‘Tavai atiu ai nai angvei u rym;
tavaimi risachi ai palau u;
tavaimi risachi ai pangym iy tavai thau u, nanai satang thai hai u.
10 ‘Nangchi ly li thawnra tamochi ai haisau palawn ai nai py,Ref 3.10: Is 2.4; Mikha 4.3
changpi kalei nai akeichi ai tivichi palawn ai nai py thip u.
Atho by y naichi malawn py, tavai thau u ai nai tla ai.
11 Tengpang sahawi y awm nai
khumi cheng cheaungkhangchi awi, jeu u kaliki iy,
leaunghawira y angym u,’ napi.
Aw Areng, huni khumichi ai tiu ai nai nang i tavaimi kamkawm ai pato ba.
12 Areng my, “Khumi cheng bawibawichi ly angveirym iy,
tara chih ai nai leaunghawira jeu u ai nai tla ai.
Tengpang sahawi i khumi cheng bawibawichi ai tara chih ai nai
huni meingtym y kai ateh ai.
13 Nichi ly khri pa-rei khumi hawi y naichi ne; Ref 3.13: Amt 14.14-16, 19-20, 19.15
choh tyn nai neng khala y
chohpui chomaw ai tyn nai kamta, nichi ai py so u.
Kreip athaichi hawi kawi nanai
athai nip nai angawmra i kreip hangchi lem nanai pa-rei,
kreip athaichi ai ati nai kamta, huni khumichi ai ati u,” napi.
14 Khumi sang neangneangchi ly
tara chih nai leaunghawira y awm u bo.
Huni leaunghawira y Areng i neng kani ly
kra y naimy ang tym ai.
15 Kanito hawi lo ly veng ai i,
ka-si taukichi py angvang ai ny y leang bo.
Tameuh my mymy i khumichi ai amtheaung hai ai nai
16 Areng ly Zion mawi salo y aeu bo. Ref 3.16: Amo 1.2
Jerusalem mary i dengdairei aeu.
Khaileaung hawi kani khusang py amchyh u bo.
Na i py mymy ly mymy i khumichi ai ama hai ai.
17 Areng my, “Israela chengchi awi, huna nai khala kai ly nangchi i Areng Tameuh ne, nanai pany u ai.
Kai ly kaimy i Zion mawi kachaira y kaawm nai ne.
Jerusalem mary ly mary kachai lawm ai.
Cheng takhra khumichi ly huni mary ai, mana khala py peang u bi pajau ai ny y.
18 Huni neng khala mawichi ly kreip akhochi hawi kawi na ai.
Mawi aheungchira py sichi tlai nai niu ai.
Juda pri verei y tui hawihai palai nga u ai.
Tavo micheaung tui ly Areng i Achura yhm mang dengdairei
leaung ai i, Akasia leaunghawi ai am-i hai ai.
19 “Aikupta pri ly khutaha meingtym lawm iy,
Edom pri ly phra ai i, khumi angso by y nai meingtym lawm ai.
Ati mana nai mo nabaly huni prichi ly Juda pri ai tiu iy,
khumi kahawichi ai padei u nai deaungkho y ne.
20-21 Kai ly tleh naira avum nai khumichi i vui vawitheung tha ai.
Khumi kamngochi ai tlamsa naira pei ai ny y.
Na i py Juda pri hawi Jerusalem mary ai ly deungtasarei khumichi awm naira lawm hai ai.
Kai, Areng my py Zion mawi salo y awm ai,” napi.