9
(Mat 10:5-15)
1 Cuhnukah Jesuh ni hleihnihle cu hmunkhatah ko hngai in, khawsia hmawhhmawh parih huham leh thungeihnak, tiahherhpawl damsaknak a pia hngai,
2 culeh Pathian uknak simthan ding leh mi damsak dingah a thlahsuak hngai.
3 “Nan khuallam caah teileng iseh, songkhoi iseh, sang iseh, tangka iseh, itukhaw kentia hlah uh – angki hlei zun khat hman keng hlah uh.
4 Nan luhnak inn poh ah caam dah uh, cun acunang in pok leh uh.
5 An tan dolaak lo nakpohah acui khua nan pawhtak tikah anmah rum nan ralsantia ti lansaknak ah nan ke parih vutning thingta uh,” tiah a ti hngai.
6 An pokih khuatepawl hlawhin thuthangŽha an phatpi, cun khuazakip ih tiahherhnak hmawhhmawh an damsak.
(Mat 14:1-12; Mar 6:14-29)
7 Galilee peng uktu Herod ni a cangmi thuhla hmawhhmawh a zak tikah a thin a buai, icatile mihrekkhat ni Johan cu mithi lakin thawhsakmi a ii tiah an ti,
8 mihrekkhat ni Elijah a lang an ti, cun mipace ni hlanlio ih profet pakhatkhat a thoŽhan an ti.
9 Herod ni, “Johan bol a lu ka Žhawhsak hngai rom hin; a thuhla acumang thilpawl ka zakmi pa cu ahu a i hmen?” tiah a ti. Culeh amah cu tuah ngah ding a zuam.
(Mat 14:13-21; Mar 6:30-44; Joh 6:1-15)
10 An kirla ah tirhthlahle ni an vuakmi azate Jesuh an sim. Cutikah a hemah hruai hngai in Bethsaida timi khua ah anmah vial dungsipin an tat.
11 Mibuur ni acucu an hmuhngah tikah amah cu an zul; culeh a dolawm hngai ih Pathian uknak thu sim hngai in damsak a Žulmi pawl cu a damsak hngai.
12 Nilo sam vel ah hleihnihle ni a hemah pha in, “Mibuur hi tlunsak hngai tuhmen. Hi hrialkam khuapawl leh lo ah caam ding leh awkŽha hrawl dingin a tat taw uh; icatile hinang hmawh hmunŽhing ah kan om kovawh,” tiah an ti.
13 Ihmansela, “Nanmah ni awkŽha itumaw pia tuhmen uh,” tiah a ti hngai. Anmimi ni, “Tatin hile an zate caah tatin caw kan lei dah tilo ahcun sang hlom nga leh nga pahnih hlei cu ituhman kan ngei tal lo,” tiah an ti.
14 Icatile acunangah patling thawng nga tluk an om. Culeh Jesuh ni a kaizulle cu, “Sawmnga buur vek in tosak uh,” tiah a ti hngai.
15 Cuticun an tiih an tosak.
16 Culeh sang hlom nga leh ngah pahnih cu la in, vancau in thlua a suah ih a seu, cun a kaizulle cu mibuur zem dingin a pia hngai.
17 An zate ni an aw ih an khim vek. An hlahmi cu an sarkhawmih a ningnawi pulung hleihnih a ii.
(Mat 16:13-19; Mar 8:27-29)
18 Voikhat cu Jesuh amah ceu thla a cam ah, a hrialah a kaizulle ceu an omih, “Mibuurpawl ni kei hi ahu e ma ti uh?” tiah a dil hngai.
19 Anmimi ni, “Timihnimtu Johan an tan ti; mipacepawl ni zong cu Elijah an tan ti; apace rih ni cu hlanlio ih profet pakhatkhat a thoŽhanmi a ii an tan ti tia,” tiah an let.
20 Jesuh ni, “A ik ah nangmi ni teh ahu a ii ma ti cu?” tiah a ti hngai. Piter ni, “Pathian ih Messiah na ii,” tiah a let.
(Mat 16:24-28; Mar 8:31-9:1)
21 Jesuh ni ahuhman sim lo dingah ngekngeihin kaa hngai in a cah hngai ih,
22 “Mi Tiapa cu rauhngai in tuar lei khawh, upapawl, tlangbawi upapawl leh daanzirhtupawl ni an hnong thok, cun thah i lei khawh a ni thumnak ah thawhsak a i thok,” tiah a ti.
23 Cuhnukah an zate cu, “Mi pakhatkhat ni ka kaizul can a dawt ahcun amah le mah hnongtia in a thinglamtah nicang puin ma zul seh.
24 Icatile a nunnak amah ca-ih hualhum a dawtu cu a sung thok, cun kamah ca-ih a nunnak a sung tu ni cu a nunnak a hualhum ngah thok.
25 Vulei punpuluk congah hmansela a nunnak a sung Žung ahcun itu Žhathnemnak a ngah hmen?
26 Kamah leh ka thu ama zahpi tu cu Mi Tiapa ni a sunparnak, a Pa ih sunparnak leh athiangmi vanmile ih sunparnak rum a phat tikah a zahpi hngai ve thok.
27 Ihmansela thungai in ka tan sim hngai, hinangih a diing tu mihrekkhat cu Pathian uknak an hmuh hlanih a thi thok lo tu an om,” tiah a ti hngai.
(Mat 17:1-8; Mar 9:2-82; 2 Pit 1:16-18)
28 Hipawl a sim hnuk ni riat hrawngah Jesuh ni Piter leh Johan leh Jeim pita hngai in thlacam dingah tlang par an kai.
29 Culeh thla a cam lio ah, a mithmai landan a thlengtia, cun a partlai cu tleserso ih raang ah a cang.
30 Mi pahnih: Moses leh Elijah cu Jesuh thuthluk reroin an hmu dukdi.
31 Anmah cu sunlawinak rum an langih, Jesuh ni Jerusalem ah a cansuahsak velthokmi – a pawhsuah nak ding thu an ang.
32 Piter leh a rualcomle cu an metsuak an liah zo ti lo ih an me; ihmansela an han Žhantiak tikah Jesuh cu a sunlawinak rum, cun mi pahnih amah rum diingin an hmu.
33 Moses leh Elijah ni Jesuh an pawhtak fang ah Piter ni Jesuh cu, “Zirhtupa, hinang ih ik hi a man Žhat; thlaam pathum sa le hu, na caah pakhat, Moses caah pakhat leh Elijah caah pakhat,” tiah a ti, itu a aan khaw a tiahtia lo.
34 Acucu a an rero lio ah meici zaam ni a hneep hngai; meici ni a zelh hngai tikah an hrul ngaite.
35 Culeh meici lakin, “Hihi ka Tiapa, ka Rilmi a ii; a thu ngai uh!” tiah a ti tu aw pakhat a suak.
36 Aw ni a aan hnukah Jesuh cu amah ceu an hmu. Culeh daite in an ompiih acu lioih an hmuhmi thilpawl cu ahuhman an sim lo.
(Mat 17:14-21; Mar 9:14-29)
37 A zingla tlaang par in an Žum tikah mibuur pi ni Jesuh cu an tuakla.
38 Acu ve leh mibuur lakin pakhat pa ni, “Zirhtupa, ka tiapa zo dingah ka tan ngeen; ka tia ngeihsun a ii.
39 Amah cu thlarau sia ni a pon dukdiih avoikhatah a kiurak. A kaa in rabuan suak tiang a tha sualin a vua; a tisiatih a thlah fangfang.
40 Na kaizulle Žhawl ka ngen hngai nain an ti zo lo,” tiah a au.
41 Jesuh ni, “Nangmi zumnakngeilo leh san rawkcat, ihlet theih tan ompi hngai in ka tan ing hngai thok he hmen? Na tiapa cu hinangah hruai hnik,” tiah a sawn.
42 A phat lio ah khawsia ni a cupa cu khur phonnakin a tha a konsak. Ihmansela Jesuh ni thlarau thianglo cu a hriing, tepang pa cu damsakin a pa hemah a pia Žhan.
43 Culeh mi hmawhhmawh cu Pathian ih pipat zia an don a har.
(Mat 17:22-23; Mar 9:30-32)
A thiltimi parih mi hmawhhmawh an donhar lio ah Jesuh ni a kaizulle cu,
44 “Hi thupawl hi nan na tan khen uh seh: Mi Tiapa cu mi ih kut ah leirawi i leh lei,” tiah a ti hngai.
45 Ihmansela ahi a simmi hi an tiahthiam lo; a sullam an hemin thuh a ii ih an tiahthiam lo. Cun ahi a simmi thu hi amah dil le an hrul Žung.
(Mat 18:1-5; Mar 9:33-37)
46 Anmah lakah ahu pipatleng nala ti thu an altia.
47 Ihmansela Jesuh ni an muthup ih ruahmi a tiahthiam ih, tepang te pakhat a hrialah a tosak,
48 culeh, “Hi tepang ka min in a cosang tupoh kamah ama cosang, cun kamah ama cosang tupoh ni ama thlahtu a cosang; icatile nanmah lakih a tenautleng cu a pipatleng a ii,” tiah a ti hngai.
(Mar 9:38-41)
49 Johan ni, “Zirhtupa, mi pakhat na min in khawsia Žhawl hngai in kan hmu, culeh kanmah rum zultu a ik ve lo ruangah awlsak kan khai ta,” tiah a ti.
50 Ihmansela Jesuh ni, “Dawn hlah uh; icatile nanmah an tan dokalh lo tupoh cu nanmah lasan Žang an ii hekhawh,” tiah a ti.
51 Latso a iknak ding nii a nai vel tikah Jesuh cu Jerusalem laah tat dingin a hmai cu a hoi rori.
52 Cun thuphurtu a thlah hngai li. An tah thah ah amah caah tuahtimtia cia dingin Samaria-mipawl ih khua pakhat ah an lut;
53 ihmansela amah an cosang la lo, icatile a hmai Jerusalem la-ih a hoih rori ruangah a ii.
54 A kaizulle Jeim leh Johan ni acucu an hmuh tikah, “Bawipa, vancung in mei zong tlain kaang hngai dingah thupia hu la daw na cim?” tiah an ti.
55 Ihmansela mertia in a hringŽon hngai.
56 Cuhnukah khua pace ah an vah peh.
(Mat 8:18-22)
57 Lam ih an tah lio ah mi pakhat ni, “Na tah nakpohah ka tan zul thok,” tiah a ti.
58 Culeh Jesuh ni, “Sasepawl cu awngkaa an ngei, cun van ih vatepawl ni bu an ngei; a inain Mi Tiapa cu khawnang hman ah a lu lumnak a ngeih tia lo,” tiah a ti.
59 Mi pace cu, “Ka dung ma zul,” tiah a ti Žung. Ihmansela acu pa ni, “Bawipa, tatin ka pa vui peita rih lang,” tiah a ti.
60 Ihmansela Jesuh ni, “Mithi ni anmah ih mithi vui uh seh; a inain nang tu cu tat la Pathian uknak thu simthan,” tiah a ti.
61 Mi pace pakhat ni, “Bawipa, ka tan zul thok; a inain ka inn ih om tule damte in tiah Žianbiak in bia ta hngai pei lang,” tiah a ti.
62 Jesuh ni, “Lee thuan dingin a kut ih thuan a tlaih hnukah dungla a zoh tu ahuhman Pathian uknak caah a tlak lo,” tiah a ti.