10
1 Acu hnukah Bawipa ni mipace sawmsarih sia hngai in, amah rori a tah khaihnak khua cang ah khuah khat vek in a thlah hngai li.
2 An hemah, “Thlaikhawm ding cu a tlungpi kau, a inain a Žuantule cu an tlawmte; curuangah thlaikhawm Bawipa ni a thlaikhawmnak ah Žuantule thlah suak hngai dingin dil uh.
3 Nan lam cu tat kau uh. Zohhman uh, saserual lakih tusuanpawl thlah mangin ka tan thlah hngai.
4 Tangka sannak dip, songkhoi, kedaap, tipawl kentia hlah uh; cun lamlakah ahu khaw dobia hlah uh.
5 Itumang inn ih nan luh ah khaw, ‘Hi inn ah daihnak om kau seh’ ti peita uh!
6 Culeh acunangah cui daihnak a Žom ve tu pakhatkhat a om ahcun nan daihnak cu acu mi hemah a om dah thok; a inain acuti a ik lo ahcun nanmah hemah a kirŽhan thok.
7 Acui inn siksik ah om berbo uh la, an tan piakmi poh awin ding uh, icatile rianŽuantu cu piak a phu. Inn khat hnuk inn khat thawntia hlah uh.
8 Khua pakhat nan luh leh khuamipawl ni an tan dolaak tikpohah, nan hmaka ih hlunmi cu aw kau uh;
9 acunangih ommi mitiakpawl damsak uh, cun, ‘Pathian uknak cu nan caah bansam ah a pha rom’ tiah ti uh.
10 A inain khua pakhat nan luh ih an tan dolaak lo tikpohah, an zalam ah suakin,
11 ‘Kan ke parih a belmi nan khua vutning hman nanmah tan ralsannak in kan thingta hi. A inain hihi cu tiah uh: Pathian uknak cu a pha rom’ tiah ti uh.
12 Ka tan sim hngai, acui nii ahcun a cui khua vanin Sodom caah hman a tuar a zualdoideuh thok.
(Mat 11:20-24)
13 “Maw Khorazin, na hmaka a pit! Bethsaida, na hmaka a pit. Icatile nan khua sungih vuakmi donharŽhapawl hi Tai-ar leh Sidon khua sungah vuak ita sela an sualrimnak hlapi velin, kungdip partlai sinhru leh vutcam phulhtia in an to rom thok nain.
14 A inain thuŽhennak ahcun nangmi caah vanin cu Tai-ar leh Sidon caah an tuar a zualdoideuh thok.
15 Cun nang, Kapernaum,
vancung ah hlirsan i lei cim?
Ihlah, Mithikhua ah Žhum
na i thok, tiah a ti.
16 Cun a kaizulle cu, “Nan thu an tan ngai tupoh ni ka thu ama ngai hngai, cun nanmah an tan hnong tupoh ni kamah a ma hnong hngai, cun kamah ama hnong tupoh ni ama thlahtu an hnong,” tiah a ti hngai.
17 Mi sawmsarih cu lungawi in an kirŽhanih, “Bawipa, na min ruangah khawsiale hman ni kan thuthu in an om!” tiah an ti.
18 Jesuh ni, “Vancung in Satan nimtla kaau mangin a tlak ka hmu.
19 Zo uh, rul leh nuhmeikaangpawl, cun ral ih dihnak zate parah zon teih khawhnak thu ka tan pia hngai rom; itu ni khaw an tan tuahmawh thok lo.
20 Ilamhmanah, thlarau sia ni nan thu an tan cangngaih ruangah cu nan lungawi hlah uh, nan minpawl van ah ngaanin an om ruang tu ah nan lungawi sawn uh,” tiah a ti hngai.
(Mat 11:25-27)
21 Acui caan ah Jesuh cu Thiang Thlarau thawngin thanuamnak rum a khat ih, “Maw ka Pa, lei leh van ih Bawi, hi thilpawl hi miting leh thutiah hemin nan thup ih, thutiah reprailo tupawl hemih na phuan ruangah ka tan lawm; a ii, ka Pa, acumang cu na dawtzawng a ii.
22 Thil zate ka hemah ka Pa ni a ma pia rom; Pa simlo ahuhman ni Tiapa ahu a ik an tiah lo, cun Tiapa ni a hemih phuang dingah a rilmi ahu ni maw, cun Tiapa ni maw simlo cu Pa ahu a ik an tiah lo,” tiah a ti.
23 Cuhnukah kaizulle san laah a mertia ih an bulcein, “Nan hmuhmi a hmutu mit cu an thluasuak!
24 Icatile profet tlungpi leh siangpahrang tlungpi ni nan hmuhmi hi hmuh an hiar ta nain an hmuhngah lo, cun nan zakmi hi zak an hiar ta nain an za ta lo ti ka tan sim hngai,” tiah a ti hngai.
(Mat 22:34-40; Mar 12:28-34)
25 Acu caangte daanthiam pakhat Jesuh hniksak dingah a hang diing. “Zirhtupa, kumkhua nunnak ro co dingah itu ka ti thok?” tiah a ti.
26 Jesuh ni, “Daan sungah itu ngaan tia hmen? Acunang ah itu rel hmen ci?” tiah a ti.
27 Ani ni, “Bawipa na Pathian cu na thinlung zate, na nunkhua zate, na thazaang zate rum na daw thok; cun na innkiang cu namah na dawttiak mangin na daw thok,” tiah a ti.
28 Culeh Jesuh ni, “Na thuleh a hmaan; acucu vua, cun na nung thok,” tiah a ti.
29 Ihmansela amah leh amah miding ti tiak daw in Jesuh cu, “Ka innkiang cu ahu a ii?” tiah a dil.
30 Jesuh ni, “Mi pakhat cu Jerusalem in Jeriko laah a tatih rokhmangle kut ah a pha, a partlai an phoih, an thawi, thi samte in an mata mianmi.
31 Tlangbawi pakhat cu acui lam in a vak ngelcel; culeh acu pa a hmuh tikah khat la san in a hrel.
32 Acumangcun Levi mi pakhat ni acui hmun a pha ih acu pa a hmuh tikah khat la san in a hrel ve.
33 A inain Samaria-mipa cu khual a tlon lio ah acu pa hrial a pha; culeh acu pa a hmuh tikah a phusahih ngaite.
34 A hemah pha in an tuahmawhnak mapawl cu thathau leh sabit ti toih hngai in a tuam hngai. Cuhnukah a sumhnam parah toh in, khualbuk ah a pita, cun a zokhen.
35 A zingla ah denarii pahnih a phorh ih khualbuk-kiltu piain, ‘Hi pa hi zokhen law; ka kirŽhan laah na hman beeng mi itupoh ka tan sam leh thok,” tiah a ti.
36 Hile pathum lakah rokhmangle kut ih a pha tu pa ih innkiang cu ahu tleng ik zum ci?” tiah a ti.
37 Daanthiampa ni, “A parih phusahihnak a lansak tu pa,” tiah a ti. Jesuh ni, “Tat la acumangcun vua,” tiah a ti.
38 An lam an tah peh ih, khua pakhat an pha, acunangah Martha timi nu ni Jesuh cu a inn ah a tlunsak.
39 Martha ni Mari timi naunu a ngei ih Jesuh ke hramah toin a thusim mi a ngai.
40 Ihmansela Martha cu a rianŽuan tlungpi ni a thin a lumlawiaw; curuangah Jesuh hemah pha in, “Bawipa, ka naunu ni hi hmawhhmawh kamah ceu Žuan dingin ama mat men hi na poisa rau lo maw? Ma bawn dingin sim tuhmen,’ tiah a ti.
41 Ihmansela Bawipa ni, “Martha, Martha, nang hmawh thil tlungpi ruangah dontia in na thin a tan lumlawi kovawh;
42 thil pakhat ceu a Žul he khawh. Mari ni a Žhadeuhmi a rilngah, acucu a hemin suh mianmi a i thok lo,” tiah a sawn.