7
(Mat 8:5-13)
1 Mipi zak ih a thusim hmawhhmawh a uh hnukah Jesuh cu Kapernaum khua ah a lut.
2 Acunangah ralkapzabawi pakhat a omih a sunsak ngaimi hemom pakhat a ngei, acu pa cu thisam in a tiak.
3 Jesuh ih thu a zak tikah, Judah upa hrekkhat thlah hngai in, Jesuh ni pha in a hemom pa damsak dingah a dilsak hngai.
4 Jesuh hem an phat tikah thungaithlakin an ngeenih, “Amah hi hi thil na vuak piak dingah a tlak hrimhrim,
5 icatile kan mipawl a daw hngai ih, kan sinakok man sak piak tu cu amah hi a ii,” tiah an ti.
6 Culeh Jesuh cu anmahpawl rum a tat, ihmansela inn in lamhla tuk lo a phat ah, ralkapzabawi ni Jesuh cu, “Bawipa, zanzaih piatia duh hlah, icatile ka luangkhum tangih tan luhsak dingah ka tlak lo;
7 curuangah namah tan phat ding khaw Žha ah ka ruat lo. Thu ceu pia hruak la ka hemom cu dam seh.
8 Icatile kamah khaw thungeihnak tangah siah ka ii, ka kut tangah ralkaple an om; culeh pakhat cu, ‘Tat’ ka ti tikah a tat, cun a pace cu, ‘Ma pha’ ka ti tikah a ma pha. Culeh ka hemom cu, ‘Hihi vua’ ka tiih a vua,” tiah sim dingin a rualpile cu a thlah hngai.
9 Jesuh ni acucu a zak tikah a don a har ngai, culeh amah zultu mibuur san la hoiin, “Ka tan sim hngai, Israelmi sung hman ah himang zumnak hi tuak rih hlah ing ee,” tiah a ti hngai.
10 Thlahmi le inn ih an kirŽhan tikah, hemompa cu damŽha in an hmu.
11 Acu hnuk ihlet hlanah Jesuh cu Nain timi khua ah a tat, culeh a kaizulpawl leh mibuur pi ni an zul.
12 Khua hnar an hnaih deuh tikah, mithi vui thok zawntia an vasuak. Amah cu a nu ih tiapa ngeihsun a ii ih, a nu cu nuhmei a ii; culeh khua sung in mibuur ni cu nu cu an zul.
13 Bawipa ni cu nu a hmuh tikah a phusahih ih, “Òap hlah maw,” tiah a ti.
14 Cuhnukah hmaiah suakdeuh in ruak zonnak laang cu a tham, a zawntia tule cu an ding ciahco. Culeh, “Tlangvalpa, thu ka tan pia, tho!” tiah a ti.
15 Mithi pa cu hang toin a ang, culeh Jesuh ni a nu hemah a ap.
16 An zate an Žih rori; culeh Pathian an thangŽhatih, “Kan lakin profet pipa pakhat a suaklang rom,” tiin leh, “Pathian ni a mipawl mithmaiŽha in a zoh hngai rom,” tiah an ti.
17 Amah ih thu an simtiakmi hi Judea peng leh a hrialkam ram zate hlawhin a karh.
(Mat 11:2-19)
18 Timihnimtu Johan ih kaizulle ni hi thil hmawhhmawh hi amah an sim. Curuangah Johan ni a kaizule pahnih tirh hngai in
19 Bawipa cu, “Namah hi a pha thok mi pa cu na i maw? iklole mi pace kan hngak thok?” tiah dil dingin a thlah hngai.
20 Acule Jesuh hem an phat tikah, “Timihnimtu Johan ni namah hemah, ‘Nang hi a pha thok mi pa cu na ii maw? Iklole mi pace kan hngak thok?’ tiah tan dil dingah a man thlah,” tiah an ti.
21 Ahi hi Jesuh ni tiahherh ngeimi mi tlungpi, hrirai ih tlakmi a damsak hngai, thlarau Žhalo Žhawl hngai in, mitcaw tlungpi khua a hmuhsak hngai hnuk caang a ii.
22 Culeh, “Tat lei cu khawh nan hmuhmi leh nan zakmi hi Johan sim uh: mitcaw khua an hmu, kezeng an vak, miphar thiansak an ii, naset ni khua an za, mithi thawhsak an ii, mifarahpawl thuthangŽha phurh an ii.
23 Cun kanmah parih lunghi lonak a ngei lo tu cu mithluasuak a ii,” tiah a let hngai.
24 Johan ih thuphurtule an kir hnukah Jesuh ni Johan ih thuhla mibuur pi sim hngai a thawh ih: RamŽhing ah itu zoh dingin nan tat? Huih tlo ih hninmi phaikung maw?
25 Itu zoh dingah nan suak? Angkitual nem sinin a ommi maw? Partlai ŽhaŽha sinthlaiin lungtluaingaiih om tu cu siangpahrang inn ah an om hekhawh.
26 Itu zoh dingah nan suak? Profet maw? A ii, ka tan sim hngai, amah cu profet vanin a pipa sawn.
27 Hihi mi pakhat ih thuhla:
‘Zohhman, na hlanah na lam
tan tuahtim piak tu ding,
ka thuphurtu na hmala ah
ka thlah li thok’
tiih nganmi pa cu a ii.
28 Ka tan sim hngai, numi ih hrinmi lakah ahuhman Johan vanin an pipasawn lo; a inain Pathian uknak sungih a tenautleng cu Johan vanin a pipasawn,” tiah a ti.
29 (Culeh hi thu a za tu mi hmawhhmawh ni, siahkhuanle telin, Pathian ih dingfelnak an tiahthiam, icatile Johan ih tihnimmi an ii.
30 Ihmansela amah ih tihnim an alnak thawngin, Farisipawl leh daanzirhtupawl ni cu anmah ca-ih Pathian tumtahmi an hnong.)
31 “Hi san mipawl hi itu rum ka tahŽhim hngai thok, cun itumang an ti?
32 Dawrhmun ah toin buur khat le buur khat,
‘Tilawvau kan tan tum nain,
nan laam lo;
Žah hla kan tan sak nain
nan Žap lo’
tiah a auhtiami tepangle mang an ti.
33 Icatile Timihnimtu Johan pha in caw aw lo leh sabit ding loin a omih, ‘Khuavang a ngei’ nan ti;
34 Mi Tiapa pha in a aw, a dingih, ‘Zoh uh, cawkaupa leh zuripa, siahkhuanpawl leh misualpawl ih rualpi’ nan ti!
35 A inain tinnak cu a zultule ih nunnak ni ahmaan zia a lansak,” tiah a ti.
36 Farisi pakhat ni Jesuh caw awk khat a sawm, culeh Farisi pa inn ah cun a tatih cabuai ah caw a um.
37 Culeh, khua sungih misual nu pakhat ni Farisi pa ih inn ah Jesuh caw a zawh ti a tiah ih Jesuh hnulh dingmi rimhmui tii cu alabaster timi lung ih vuakmi uum in a kentia ta.
38 Jesuh dungla a ke hramah dingin a Žap, culeh a mitthli in a ke Žawlin a sam in a hnawt. Cuhnukah a ke cu hnam berboin a rimhmui tii cu a toih.
39 Jesuh caw a ko tu Farisi pa ni acucu a hmuh tikah amah le amah, “Hi pa hi profet a ik ahcun amah a tongtham rero tu nu hi ahu a ik leh itumang numi a ik misual a ik – a tiah thok nain,” tiah a ti tia.
40 Jesuh ni, “Simon, na hemih sim ding thil pakhat ka ngei,” tiah a ti. Simon ni, “Zirhtupa, ang kau tuhmen,” tiah a sawn.
41 Jesuh ni, “Tangka micoihtu ahu pakhat ni maw leibatu pahnih a ngei hngai; pakhat ni denariiRef 7:41 Mar 6:37 za nga a ba ih pakhat ni sawm nga a ba.
42 An sam zo lo tikah an pahnih an leiba a daih hngai. Ahu ni acu pa cu daw sawn thok nala?” tiah a ti.
43 Simon ni, “Leiba tlungsawn daih a imi pa ni dawt sawn ka zum,” tiah a sawn. Culeh Jesuh ni, “Hmante in thu Žhen ci ee,” tiah a ti.
44 Cuhnukah acu nu san la hoiin, Simon cu, “Hi nu hi hmu cim? Na inn sung ka luh tikah ka ke Žawlnak tii a ma pia lo; a inain ani cu a mitthli in ka ke Žawlin a sam in a hnawt hngai.
45 Nang ni cu ama hnamla lo, a inain ani cu ka luh in ka ke hnam a awl dah lo.
46 Nang ni cu ka lu khaw thathau na hnulh lo, a inain ani cu ka ke rimhmui tii a ma toih.
47 Curuangah ka tan sim, a sualnak a tlungpi ta mi cu ngaidam a i rom; acu caah hete in dawtnak hnempi a lansaknak cu! A inain tlawmte ceu ngaidammi ni cu tlawmte ceu mi a daw ve,” tiah a ti.
48 Cuhnukah minu cu, “Na sualnakpawl ngaidam an ii,” tiah a ti.
49 Ihmansela amah rum cabuai ih caw a uum khat tule ni anmah leh anmah, “Sualnakpawl hman ngaidam tu pa hi ahu a i zetzo?” tiah an ti tia.
50 Culeh Jesuh ni minu cu, “Na zumnak ni a tan rung rom; nadaite in tat tia law,” tiah a ti.