SHAKAWN KUNGDAWN 42
LAIKA LAHKAWNG
1 Shan nga gaw hka shi a katsi ai hka hpe marit nga ai zawn;
Karai Kasang e, ngai mung nang hpe marit nga nngai.
2 Ahkrung nga ai Karai Kasang e, ngai nang hpe shagroi gara nga nngai;
ngai gaw na a man e, galoi wa mi she, sa wa lu nna, nawku daw jau lu na rai
nga a ta?
3 Ngai gaw shani shana hkrap nga nngai,
shing rai, myi prwi ni sha, nye a lusha rai nga ai;
?Na a Karai Kasang kanang nga nga a ta?,?
nga nna aten shagu nye a gumlau hpyen ni ngai hpe san nga ma ai.
4 Lai sai aten na lam hpe ngai myit dum yu ai shaloi, nye a myit hta grai yawn
la nga nngai;
Karai Kasang a nta de shawa masha ni hte rau ngai lung wa ai shaloi,
kabu gara ai shawa hpawng gaw, Karai Kasang hpe mahkawn mangoi ai hte,
kabu jahtau nhtawm, shanhte hpe woi hkawm lung wa yu ni ai.
5 Ngai hpa majaw nde wa myit n pyaw nga nngai kun?
Ngai hpa majaw nde wa ru tsang hkrum nga nngai kun?
Ngai gaw Karai Kasang hta myit mada nga let,
nye a hkye la Madu hte nye a Karai Kasang hpe
kalang mi bai, shakawn na ring ngai.
6-7 Ngai gaw ndai yang e, bawng dung hkrum nga yang nye a myit grai kaji la
nga li ai;
shing rai, shi gaw yawn hkyen hpa langai hpang langai hpe hka leng ni zawn nye a
wenyi a ntsa e hprwi di ya ni ai;
jahten shaza ai wa gaw mawru hka zawn nye a man e wu kadu nga ai;
dai gaw hka rum ni Hermon bum hte Miza bum kaw nna
Yawdan hka de mu ngoi ai zawn wu kadu hkrat wa ai nsen hte bung nga ai.
8 Dai Madu gaw shani na aten hta, shi a dinggrin tsaw ra myit hpe madun dan ya u ga;
shaloi, shana na aten hta, ngai mung mahkawn shakawn lu na nngai;
nye a asak a Karai Kasang hpang de akyu hpyi lu n-ga.
9 ?Nang gaw ngai hpe hpa majaw malap kau nga n ni?
Nye a gumlau hpyen ni a gumshem ai hta ngai nni nkri hpe hpa majaw matut hkam
sha ra nga a ta?,?
ngu nna nye a shingbyi shara Karai Kasang hpe ngai tsun ni ai.
10 ?Na a Karai Kasang kanang nga nga a ta?,?
nga nna shanhte ngai hpe tut tut san nga ma ai majaw,
shanhte a jahpoi asawng ai nni nkri hpe hkam sha nga nngai.
11 Ngai hpa majaw nde wa myit n pyaw nga nngai kun?
Ngai hpa majaw nde wa ru tsang hkrum nga nngai kun?
Ngai gaw Karai Kasang hpe myit mada nga let,
nye a hkye la Madu hte nye a Karai Kasang hpe
kalang mi bai shakawn na ring ngai.