SHAKAWN KUNGDAWN 41
1 Matsan mayan masha ni a matu, myit ru myit tsang ya nga ai ni gaw a nga ai;
shanhte ru tsang hkrum nga ai shaloi, dai Madu gaw shanhte hpe karum
la na ra ai.
2 Dai Madu gaw shanhte hpe makawp maga ai hte shanhte a asak hpe kyem
mazing da ya na ra ai;
shi gaw dai lamu ga hta shanhte hpe kabu gara shangun nna,
shanhte a gumlau hpyen ni a lata hta shanhte hpe shi kau da na wu ai n rai.
3 Shanhte machyi makaw hkrum nga ai shaloi, dai Madu gaw shanhte hpe karum la
na ra ai;
shanhte hpe hkam kaja lam jaw ya na ra ai.
4 ?Madu e, nang hpe ngai yubak galaw kau ni ai;
ngai hpe matsan dum la nna, ngai hpe shamai shatsai la e,? ngu nna ngai tsun ni ai.
5 Nye a gumlau hpyen ni gaw nye a lam hpe matse ai hku tsun nga ma ai;
shanhte gaw ngai si nna, masha ni ngai hpe malap kau na matu, ra sharawng nga ma ai.
6 Ngai kaw sa chyai ai ni gaw myit kaja ai hte n sa ma ai;
shanhte gaw nye a lam hte seng ai n kaja ai shiga hpe mahkawng shinggyin nna
shara shagu de dai lam hpe tsun shabra ma ai.
7 Ngai hpe n ju n dawng ai masha yawng hte gaw nye a lam hpe shanhte shada da gahte
tsun ma ai;
shanhte gaw nye a lam hpe grau sawng ai hku myit shapraw ma ai.
8 ?Shi gaw si machyi chyi nga nna,
yupku kaw na galoi mung rawt lu sana n rai,? nga nna shanhte tsun ma ai.
9 Ngai hpe grau nna kam hpa let ngai hte rau shat jawm sha ai
nye a kaja htum ai manang wa pyi
ngai hpe nhtang gumlau kau nu ai.Ref 41:9: Mat 26:23; Mrk 14:18; Luk 22:21; Yhn 13:18.
10 Madu e, ngai hpe matsan dum la nna, hkam kaja ai lam ngai hpe bai jaw
bang ya e;
shaloi, nye a gumlau hpyen ni hpe ngai tai lu na ring ngai.
11 Shanhte ngai hpe dang kau lu na mara ai n rai,
nang ngai hpe ra sharawng nga ndai gaw ngai chye lu na ring ngai.
12 Teng man ai amu hpe ngai galaw nga nngai majaw nang ngai hpe karum la na rin dai;
nang gaw ngai hpe na a man e, htani htana bau sin na rin dai.
13 Dai Madu Israela a Karai Kasang hpe shakawn mu!
Ya kaw nna htani htana shi hpe shakawn ga law!