22
(Luk 14:15-24)
1 Yesu gaw, ga shadawn ni hpe lang nna masha ni hpe tsun mu ai gaw,
2 ?Sumsing lamu a Mungdan gaw, kasha a hkungran poi shachyip da ai Hkawhkam langai
mi hte bung nga ai.
3 Dai poi de shaga da sai ni hpe bai shaga la na, shi a mayam ni hpe shangun dat mu ai;
rai ti mung shaga da sai ni n sa hkraw ma ai.
4 Dai rai nna shi gaw, mayam kaga ni hpe bai shangun dat nna, ?Nye a lusha poi gaw ya
jin jin rai sai, nye a usu ni hte kawn da ai
yam nga ni hpe sat kau ngut sai, yawng mayawng
jin jin rai sai, hkungran poi de sa marit!,
ngu nna shaga da sai ni hpe sa tsun mu,?
ngu dat mu ai.
5 Rai ti mung shaga da hkrum ai manam ni gaw, dai ga hpe hpa n nawn mu ai rai nna, langai
wa gaw shi hkauna de, kaga wa gaw shi a gat
rai dut ai de sa mat wa ma ai.
6 Naw nga ai ni mahtang gaw, shi a mayam ni hpe rim la nna anu kayat ai hte sat kau ma ai.
7 Hkawhkam wa chyawm gaw grai masin pawt bu nga ai rai nna, shi a hpyen la ni hpe shangun
dat nhtawm, masha sat ai ni hpe sat kau mu
ai hte shanhte a mare hpe nat shagrawm kau
ya mu ai.
8 Dai hpang shi a mayam ni hpe shaga la nna, ?Nye a kasha a hkungran lusha poi jin jin
rai sai, rai ti mung ngai shaga da ai ni dai
hte ging dan nga ma ai n rai,
9 Ya lam nmaw kaba ni de nanhte sa nna mu hkrup mahkrup masha ni hpe dai hkungran lusha poi de shaga bang masu,? ngu nna tsun mu ai.
10 Dai rai nna, dai mayam ni gaw nmaw lam ni de pru sa nna mu hkrup ai ni yawng hte hpe, n kaja
ai ni rai ti mung, kaja ai ni rai ti mung,
shaga jahpawng da mu ai rai nna dai hkungran
gawk hta masha ni hpring chyat rai nga ma ai.
11 ?Ya Hkawhkam wa gaw dung nga ai manam ni hpe kawan yu na, shang wa yang, hkungran poi sa ai hpun palawng n bu n hpun ai la langai mi
hpe shi mu hkrup wu ai.
12 Dai rai nna shi gaw, ?Jinghku wa e, hkungran poi sa ai hpun palawng n bu n hpun ai mi, nang
kaning rai nang de shang lu n ta?,? ngu nna
san wu ai. Rai ti mung dai masha chyawm gaw
n chye htan ai hte atsin sha rai nga ai.
13 Shaloi dai Hkawhkam wa gaw, shi a ali ama ni hpe, ?Shi a lagaw lata gyit hkang nna
shinggan de na nsin de jahkrat bang kau mu,?
ngu wu ai. Dai yang e hkrap ngu hkrap ngoi
ai hte wa udik ai hte nga ra na ra ai.? Ref 22:13: Mat 8:12.
14 Dai hpang Yesu gaw, ?Shaga la hkrum ai ni law ma ti mung, lata la hkrum ai ni mahtang
n law ma ai,? ngu mu ai.
(Mrk 12:13-17; Luk 20:20-26)
15 Hparishe ni pru mat wa nna Yesu hpe mara shagun lu hkra gara hku ga san ni san na
lam bawng ban ma ai.
16 Dai hpang shanhte a sape ni nkau mi hte Herod a hpung kaw na masha nkau mi hpe Yesu
hpang de shangun dat mu ai. Shanhte gaw,
?Sara e, nang gaw teng man ai lam hpe sha
tsun nga ndai hpe anhte chye ga ai. Nang gaw
masha a myi man n tau ai sha, masha a matu
Karai Kasang a myit ra ai lam hpe teng man ai
hku sharin shaga ndai.
17 Dai rai nna nang myit ai hku anhte hpe tsun dan mi: Kehta Hkawhkam kaw hkanse mai bang a
ni? N mai bang a ni? Tara hte nhtan shai a
ni? Anhte hpe tsun dan mi,? ngu mu
ai.
18 Yesu mahtang, shanhte a n hkru n kaja ai hku maw mawn ai lam hpe chye ya mu ai majaw,
?Sawt ai ni e nanhte ngai hpe hpa rai
chyam yu nga myit ta?
19 Dai hkanse bang na gumhpraw dengga lap mi ngai hpe madun yu marit!,? ngu mu ai.
Shaloi shanhte gumhpraw lap mi, shi kaw la pru wa ma ai.
20 Dai rai nna shi gaw, ?Gade a sumla hte mying masat laika kap nga a ta?,? ngu nna
san mu ai.
21 Shanhte gaw, ?Kehta a sumla hte masat laika kap nga ai,? ngu nna htan mu ai.
Shaloi shi gaw, ?Dai rai yang gaw, Kehta hte seng ai hpe gaw Kehta hpe ya mu;
Karai Kasang hte seng ai hpe gaw,
Karai Kasang hpe ya mu,? ngu nna shanhte
hpe tsun mu ai.
22 Dai ga hpe na la ma yang, shanhte mau mat ma ai rai nna, shi kaw na pru nhtawm wa mat ma ai.
(Mrk 12:18-27; Luk 20:27-40)
23 Dai shani nan Saduke nkau mi gaw Yesu kaw sit sa wa ma ai. Shanhte gaw si mat wa ai
masha ni bai hkrung rawt wa ai ngu ai hpe
n kam ai ni rai ma ai.
24 Shanhte gaw, ?Sara e, masha langai ngai kasha garai n kap ai si mat wa ai rai yang,
shi a kanau gaw karat hpe lu la na rai nna,
shan kasha lu ai hte kahpu a matu htinggaw
shachyaw u ga, nga nna Mawshe htet da mi
ai. Ref 22:24: Trj 25:5.
25 Ning re ai yan nau ni marai sanit anhte hte rau nga nga ma ai. Shawng na kahpu kaba wa
hkungran nna matu mara n kap ai si mat wa sai;
shing rai kanau wa gaw gaida bai hta wu ai.
26 Dai hte maren, hpang na wa mung, masum ngu na wa mung, dai sanit du hkra shi hpe hta da mu ai.
27 Mahkra a hpang jahtum e dai numsha mung si mat wa ai.
28 Ya, si mat wa ai ni bai hkrung rawt wa ai shani, dai marai sanit hta na gade a madu
jan mahtang shi rai na rai ta? Hpa majaw
nga yang, mahkra shi hpe hta manu ai,?
ngu nna san mu ai.
29 Yesu htan let, shanhte hpe tsun mu ai gaw, ?Nanhte gaw, Chyum Laika hpe mung, Karai
Kasang a n-gun atsam hpe mung n chye ai
majaw lam dam mat manit dai.
30 Hpa majaw nga yang, si mat ai ni bai hkrung rawt ai shaloi, shanhte gaw lamu kasa ni zawn
rai nna, num la num ya ai lam n galaw na ma
ai. Ref 22:30: 1Yh 3:2.
31 Ya, si ai ni bai hkrung rawt wa na lam hte seng nna, nanhte hpe Karai Kasang tsun dan
ai ga nanhte n hti yu myit ni? Shi gaw,
?Ngai gaw Abraham a Karai Kasang, Isak a
Karai Kasang, Yaku a Karai Kasang rai nga
nngai,? nga nna tsun ai.
32 Karai Kasang chyawm gaw, si nga ai ni a Karai Kasang n rai, ahkrung nga ai ni a Karai Kasang
she rai nga ai,? nga ai. Ref 22:32: Pru 6:16; 12:26; Luk 20:37; Kas 7:32.
33 Shawa masha ni dai hpe na ma yang, shi a sharin shaga ai lam hpe mau mat ma ai.
(Mrk 12:28-34; Luk 10:25-28)
34 Ya, Yesu gaw Saduke ni hpe jasim kau mu ai hpe Hparishe ni na ma yang, shanhte shi kaw
sa zup ma ai.
35 Shanhte hta na tara sara langai mi shi hpe ga san langai mi san ai hte mara tam lu hkra
chyam yu na nga,
36 shi gaw, ?Sara e, jep ai Tara hta na grau kaba ai tara gaw gara mahtang rai nga a ta?,?
ngu nna san mu ai.
37 Yesu gaw, ? ?Dai Madu na a Karai Kasang hpe na a myit kraw lawang mahkra hte, na a myit
masin mahkra hte, na a myit mang mahkra hte
nang tsaw ra lu na rai ndai.?
38 Ndai gaw kaba dik ai hte ahkyak dik ai shawng na hkang da ai ga rai nga ai.
39 Hpang na ahkyak dik ai hkang da ai ga mung dai hte bung nna, ?Na a htingbu wa hpe, na a hkum hte maren nang tsaw ra lu na rai ndai,? nga
nna rawng nga ai. Ref 22:39: Trj 19:18; Mrk 12:31.
40 Ndai hkang da ai ga lahkawng yan gaw, Mawshe a jep ai Tara mahkra hta, myihtoi ni a sharin shaga ai lam ni a npawt madung rai nga ai,?
ngu wu ai. Ref 22:40: Mat 7:12; 1Tm 1:5.
(Mrk 12:35-37; Luk 20:41-44)
41 Ya Hparishe nkau mi hpawng nga ma yang, Yesu shanhte hpe,
42 ?Nanhte gaw Meshia a lam kaning ngu myit nga myit ta? Shi gaw gade a kasha rai nga
a ta?,? ngu nna san mu ai.
Shanhte gaw, ?Dawi a Kasha rai nga ai,? ngu mu ai.
43 Bai Yesu gaw, ?Dai rai yang gaw, Dawi Hkawhkam gaw Chyoi Pra ai Wenyi e shadut
ai hte Meshia hpe ?Madu? nga nna kaning rai
shaga lu a ta? Hpa majaw nga yang, Dawi gaw,
44 ?Dai Madu Karai Kasang gaw nye a Madu hpe tsun wu ai gaw:
Na a gumlau ni hpe, na a lagaw npu e ngai tawn da ai ten du hkra,
nye a hkra maga de naw adung nga u,? nga nna tsun nga ai. Ref 22:44: Shk 110:2;
Kas 2:34; 1Ko 15:25; Heb 1:13.
45 Shing nga Dawi gaw Meshia hpe Madu nga ai rai yang gaw, kaning rai nna Meshia gaw shi a
kasha rai na rai nga a ta?,? ngu nna shanhte hpe
tsun mu ai.
46 Kadai wa mung, ga hkaw mi pyi shi hpe n htan lu ma ai hte dai shani kaw nna htawm hpang
de kadai wa mung shi hpe hpa ga san ni mung
n san wam mat ma ai.