11
(2Hl 22:10-23:15)
1 Hkawhkam Ahazia a kanu Ahtalia gaw shi a kasha sat kau hkrum sai lam hpe chye jang, hkawhkam dinghku masha ni yawng hpe sat sharu kau na matu shi hkang dat wu ai.
2 Ahazia a kasha Yosha chyu sha lawt wa nga ai. Shi mung kaga ni hte rau sat kau hkrum hkyen ai wa rai nga ai; rai ti mung Hkawhkam Yehoram a shayi sha, Ahazia a kanau daw ai shi a kamoi Yehosheba a jaw e hkye mawai la hkrum ai wa rai nga ai. Shi a kamoi gaw shi hpe woi la nhtawm shi hpe gawn lajang ai numsha hte rau Nawku Htingnu kata na yup gawk langai mi de woi tawn da wu ai rai nna, sat kau ai n hkrum hkra Ahtalia a myi man kaw nna makoi da wu ai.
3 Ya Hkawhkam Ahtalia gaw dai mung hpe up nga yang, Yehosheba gaw dai ma hpe Nawku Htingnu kata makoi da ai shara hta kru ning tup yu lanu lahku ai hte bau maka da wu ai.
4 Rai ti mung sanit ning ngu na shaning hta e, hkinjawng Yehoiada gaw hkawhkam amyu lakung hpe sin ai du salang ni hte hkawhkam htingnu sin ai du salang ni hpe shaga la nhtawm, dai Nawku Htingnu kata de shanhte hpe jashawn la mu ai; dai yang e shi kaning rai galaw sa wa na yaw shada ai lam hta myit hkrum ga shaka la shangun wu ai. Shaloi Hkawhkam Ahazia a kasha Yosha hpe shi shapraw dan let,
5 ning ngu nna hkang da ai ga ni hpe jaw wu ai: ?Ya Bansa Nhtoi hta nanhte bungli sa galaw jang, hpung masum hta na hpung mi gaw hkawhkam htingnu hpe sin na rai myit dai;
6 hpung mi gaw Sura Chyinghka hpe sin mu; bai hpung mi gaw kaga sin langa ni a shingdu ang ang na Chyinghka hta sin nga na rai myit dai.
7 Bansa Nhtoi e bungli lit kaw na hkring ang ai hpung lahkawng gaw Nawku Htingnu hpe sin nhtawm hkawhkam wa hpe makawp maga na rai myit dai.
8 Nanhte gaw shi hkawm ai shara shagu hkan shi hte rau yep yep hkan nang nga nna, shaw lang da ai nhtu ni hte Hkawhkam Yosha hpe sin na rai myit dai. Nanhte hpang de shani sa wa ai ni kadai hpe mung sat kau lu na rai myit dai.?
9 Du salang ni gaw Yehoiada a matsun maroi ga ni hpe madat mara nga ma ai rai nna Bansa Nhtoi e lit gun ang nna sa wa ai ni hpe mung, bungli lit ngut nna pru wa ai ni hpe mung shi hpang de woi wa ya ya di mu ai.
10 Shi gaw Nawku Htingnu e kyem mazing da ai Hkawhkam Dawi madu da ai nri ni hte ninggang ni, dai du salang ni hpe ap ya wu ai;
11 shing rai hkawhkam wa hpe makawp maga na matu Nawku Htingnu man grup grup e dai ri nhtu lang ai masha ni yawng hpe shatsap da shangun wu ai.
12 Dai hpang Yehoiada gaw Yosha hpe woi shapraw la nhtawm shi a baw ntsa e janmau shagup ya ai hte hkawhkam aya hte up hkang na Tara ni rawng ai laika kanan langai, shi hpe ap ya wu ai. Dai hpang Yosha gaw namman jaw hkam la nna hkawhkam rai nga sai lam masat ndau hkam la wu ai. Amyu masha ni mung lahpawk dum let, ?Hkawhkam wa asak galu u ga law!,? ngu nna jahtau tsun ma ai.
13 Num hkawhkam Ahtalia gaw sin langa ni hte amyu masha ni garu ai nsen hpe na wu ai rai nna shawa masha ni hpawng de nga ai Nawku Htingnu de tin tin sa wa wu ai.
14 Dai yang e shi mada yu wu yang, hkawhkam nnan wa gaw htung hte maren dai shadaw makau e tsap nga nna, shi a makau e du salang ni hte pahtau dum ai ni grup grup e nga nga ma ai. Amyu masha ni yawng mung kabu gara jahtau garu ai hte pahtau dum nga ma ai. Ahtalia gaw myit ru myit tsang ai hte shi a hpun palawng ni hpe gang je kau nhtawm, ?Gumlau law! Gumlau law!,? ngu nna jahtau tsun wu ai. Ref 11:14: 2Hk 23:3.
15 Yehoiada mahtang Ahtalia hpe Nawku Htingnu wang e n sat kau mayu wu ai majaw hpyen luksuk du ni hpe ning ngu hkang dat wu ai: ?Sin langa ni nga ai lam yan lapran hku shi hpe woi shapraw mat wa mu; shi hpe hkye mawai la mayu ai wa kadai hpe mung sat kau na rai myit dai.?
16 Shanhte gaw shi hpe rim la nna hkawhkam htingnu na Gumra Chyinghka lam e du jang sat kau ma ai.
(2Hl 23:16-21)
17 Hkinjawng Yehoiada gaw Hkawhkam Yosha hte mung masha ni hpe dai Madu a amyu masha ni tai mu ga nga, Madu hte ga shaka tawn da shangun wu ai; shi gaw hkawhkam wa hte amyu masha ni a lapran e ga shaka tawn da shangun nga ai.
18 Dai hpang amyu masha ni gaw Bala nawku htingnu de sa nhtawm run hpya kau ma ai; tawn hkungri ni hpe mung, hpara sumla ni hpe mung agrawp mani kau nna Bala hkinjawng Matan hpe mung tawn hkungri a man e sat kau ma ai.
Yehoiada gaw Nawku Htingnu hpe aten hte aten yu na sin langa ni hpe mung san tawn da ya wu ai.
19 Dai hpang shi gaw du salang ni, hkawhkam amyu hpe asak sin makawp ai wa hte hkawhkam htingnu hpe sin ai sin langa ni hte rau hkawhkam wa hpe Nawku Htingnu kaw nna hkawhkam htingnu de du hkra amyu masha ni hkan nang let woi bawp asak sin ya ma ai. Yosha gaw Sin Langa Chyinghka hku shang wa nhtawm shi a hkawhkam tingnyang hta dung nga ai.
20 Amyu masha ni yawng mung kabu gara ai myit hte hpring nga ma ai rai nna dai mare gaw asim sha rai nga ai. Hpa majaw nga yang, Ahtalia chyawm gaw hkawhkam htingnu wang e sat kau ai hkrum nga nu ai.
21 Yosha gaw shi a asak sanit ning hta Yuda hkawhkam tai wa sai.