12
(2Hl 24: 1-16)
1 Israela Hkawhkam Yehu hkaw dung ai sanit ning hta Yosha gaw Yuda hkawhkam tai wa sai rai nna Yerusalem mare hta hkaw dung let mali shi ning tup up hkang nga ai. Shi a kanu gaw Berasheba mare na Zibia rai nga ai.
2 Hkinjawng Yehoiada shi hpe matsun madun la ai a majaw shi a asak hkrun lam tup hta dai Madu awng sharawng ai hku galaw nga ai.
3 Rai ti mung tara maigan masha ni a nawku shara ni hpe n jahten sharun kau ya wu ai majaw amyu masha ni mung dai hkan e shagu hkungga ni hpe nawng jau let manam pyaw ai baw ni hpe matut nat nga ma ai.
4 Yosha gaw hkinjawng ni hpe shaga la nhtawm Nawku Htingnu hta sak jaw ai gumhpraw jahpan hte maren, man man jaw ang ai gumhpraw hpe mung, langai hte langai tinang myit hku jaw mayu ai kumhpaw kumhpa ngu ai gumhpraw mahkra hpe mung mahkawng tawn da na hkang da wu ai. Ref 12:4: Pru 30:11-16.
5 Hkinjawng shagu gaw daw jau ai masha ni kaw na gumhpraw la na lit lu nga ma ai. Nawku Htingnu bai gram lajang ai hta dai gumhpraw hte ra ai made shaw lang na matu rai nga ai.
6 Rai ti mung Yosha hkaw dung ai hkun mali ning du hkra dai Nawku Htingnu bai gram lajang ai lam hpe hkinjawng ni hpa mung garai n lu galaw da nga ma ai.
7 Dai rai nna shi gaw hkinjawng Yehoiada hte kaga hkinjawng ni hpe shaga la nhtawm, ?Nanhte hpa majaw Nawku Htingnu hpe n galaw lajang nga myit ni? Dai re ai majaw nanhte lu hta da ai gumhpraw ni hpe ya kaw nna n hkap la da lu na rai myit dai; dai Nawku Htingnu hpe galaw lajang wa lu u ga, dai gumhpraw ni hpe ap ya lu na rai myit dai,? ngu nna tsun wu ai.
8 Hkinjawng ni mung dai lam hpe myit hkrum ma ai hte Nawku Htingnu hpe n galaw lajang na matu mung myit hkrum ma ai.
9 Dai hpang Yehoiada gaw sumpu langai mi la nhtawm de a magap hta hku langai waw nna Nawku Htingnu de shang wa ai lam a hkra maga, tawn hkungri a makau e shadun da wu ai. Shing rai shang wa chyinghka lam makau e lit lu ai hkinjawng ni gaw nawku sa ai ni sak jaw ai gumhpraw yawng hpe dai sumpu hta bang da ya nga ma ai.
10 Ya dai sumpu hta gumhpraw law law rawng jang, hkawhkam hkaw na amu madu hte Hkinjawng Kaba wa sa nna gumhpraw hpe shabyawng kau nhtawm shen da ma ai.
11 Dai gumhpraw jahpan hpe tup hkrak lajang ngut jang Nawku Htingnu hta amu woi hpareng ai masha ni hpe ap ya nhtawm, dai ni hpe lasama ni, nta galaw ai ni,
12 wut gaw ai ni hte nlung tawk ai ni hpe mung, gram lajang ai hta lang ra ai hpunpyen hte nlung ni hpe mari na matu mung shabrai jaw nna kaga ra mara mahkra hta jai lang na matu mung garan jaw mu ai.
13 Rai ti mung dai gumhpraw ni hte gumhpraw gawm ni, hka wan ni, pahtau ni, pyengdin hta lang ra ai arung arai ni hte aja arai, gumhpraw arai ni hpe galaw ai hta n lang ma ai.
14 Dai yawng gaw amu galaw masha ni yawng hpe jaw ai hta lang nna gram lajang ra ai hta lang ra ai arung arai ni hpe mari ai hta lang ai hkrai rai nga ai.
15 Bungli woi hpareng ai masha ni gaw myit ding nga ma ai rai nna shanhte kaw na jahpan n hpyi la ra nga ai. Ref 12:15: 2Hk 22:7.
16 Mara raw hkungga hte yubak hkungga ni a matu jaw ya ai gumhpraw hpe chyawm gaw sumpu hta n mahkawng ma ai; dai gaw hkinjawng ni a matu rai nga ai. Ref 12:16: Jaw 7:7.
17 Dai aten hta Suri Hkawhkam Hazaela gaw Gat mare hpe shang gasat nna madu la wu ai. Dai hpang Yerusalem mare hpe mung gasat la na myit daw dan da wu ai.
18 Yuda Hkawhkam Yosha gaw shi a shawng na Yehoshahpat, Yehoram hte Ahazia ni dai Madu hta ap nawng da sai hkungga arai ni, shi a hkungga arai ni, Nawku Htingnu hte hkawhkam htingnu sut dek ni hta rawng ai ja rai mahkra la shapraw nhtawm Hkawhkam Hazaela hpang de kumhpa hku shagun dat wu ai; dai rai nna shi gaw Yerusalem mare kaw nna shi a hpyen luksuk hpe woi mat wa wu ai.
19 Hkawhkam Yosha galaw nu ai amu magup hpe Yuda Hkawhkam ni a Labau Laika hta ka matsing da nga ai.
20-21 Hkawhkam Yosha a du salang ni shi hpe gumlau nga ma ai rai nna Shimit a kasha Yozahka hte Shoma a kasha Yehozaba yan gaw Sila de yu wa ai lam ntsa na ga jahpring bang da ai Yerusalem mare a sinpraw maga na lamu ga hta gap da ai nta e shi hpe sat kau mu ai. Yosha hpe Dawi a Mare na hkawhkam lupwa hta lup makoi da mu ai. Shi a kasha Amazia gaw shi a hkang hta hkaw galai dung ai hte hkawhkam tai wa sai.