10
1 Hkawhkam Ahab a amyu matu ni marai sanit shi hte gaw Samari mare e nga nga ma ai. Yehu gaw laika langai ka nhtawm kanan law law shapraw nna mare up hkang ai ni hpe mung, mare agyi salang ni hpe mung, Ahab a amyu matu ni hpe bau maka nga ai ni hpe mung, shagun dat ya wu ai. Dai laika hpe ning ngu hti na rai myit dai:
2 ?Nanhte gaw hkawhkam a amyu matu ni hpe woi hpareng ai ni rai nga myit dai; nanhte hta hpyen leng ni, gumra ni, hpyen laknak ni hte bunghku kum ai mare ni lu nga myit dai majaw ndai laika lu la ai shaloi jang,
3 kaja htum atsam marai rawng ai hkawhkam amyu matu ni hpe nanhte lata la nna shi hpe hkawhkam shatai mu; shi a matu gasat ya nga mu.?
4 Samari mare hpe up hkang nga ai ni hkrit gari nga ma ai rai nna shanhte gaw, ?Hkawhkam Yoram mung, Hkawhkam Ahazia mung n lu ninghkap ai mi, anhte kaning rai Yehu wa hpe ninghkap lu na ga ta?,? ngu nna tsun ma ai.
5 Dai rai nna hkawhkam htingnu hpe woi hpareng nga ai du salang wa mung, mare hpe woi hpareng nga ai du wa mung, mare hpe woi awn nga ai agyi salang ni mung, hkawhkam kasha ni hpe bau maka nga ai ni mung, Yehu wa hpang de ning ngu nna shiga shana dat ma ai: ?Anhte gaw na a shangun ma ni rai nga ga ai, nang tsun ai hte maren hpa mung galaw na jin jin rai nga ga ai. Rai ti mung kaga kadai hpe mung anhte hkawhkam shatai na ga ai n rai; nang myit mang ai kaja htum ai hku hpa hpe mung hkan galaw na ga ai.?
6 Yehu gaw shanhte hpe kaga laika hta mung ning ngu nna ka dat wu ai: ?Nanhte gaw ngai hpang maga de rai nna, nye a hkang da ai ga ni hpe hkan sa na matu jin jin rai nga myit yang gaw hpawt de ndai aten hta Hkawhkam Ahab a amyu matu ni a baw ni hpe Yezrela mare, ngai hpang de la sa lu na rai myit dai.?
Hkawhkam Ahab a amyu matu na marai sanit shi hte gaw Samari mare hpe woi hkang nga ai agyi salang ni a bau maka ai npu hta woi kaba tawn ai ni hta nga nga ma ai.
7 Yehu a laika lu la shajang ai shaloi, Samari mare na ningbaw ni gaw Ahab a amyu matu sanit shi hte yawng hpe sat kau nhtawm shanhte a ningbaw ni hpe ka hta bang nna Yezrela mare Yehu hpang de shagun dat mu ai.
8 Ahab a amyu matu ni a baw ni hpe la sa sai lam Yehu wa hpe tsun dan mu ai shaloi shanhte hpe mare chyinghka lam e, hpang jahpawt du hkra sumpum lahkawng di nna dai yang e tawn da na matu hkang dat wu ai.
9 Ya jahpawt e, shi gaw mare chyinghka de pru sa nhtawm, dai yang e nga ai amyu masha ni hpe, ?Ngai gaw Hkawhkam Yoram hpe gumlau nna shi hpe sat kau ai wa rai nga nngai. Dai lam a majaw nanhte hta hpa mara mung n nga nga malit dai. Rai ti mung ndai ni yawng hpe kadai sat kau a ta?
10 Ndai gaw Ahab amyu matu ni hte seng nna dai Madu tsun da nu ai lam magup gaw teng wa nga sai sakse ni rai nga ai. Myihtoi Elia a ga hku shi tawn da sai ga sadi hte maren dai Madu galaw nga nu ai.
11 Dai hpang Yehu gaw Yezrela mare hta e naw ngam nga ai Ahab a makyin jinghku kahpu kanau ni yawng hpe mung, shi a du salang ni yawng hpe mung, ni htum ai manaw manang ni hte hkinjawng ni hpe mung shanhte hta na langai mi hpe mung n jahkrung da ai sha sat kau mu ai. Ref 10:11: Hos 1:4.
12 Yehu gaw Samari mare de sa wa na nga, Yezrela mare kaw nna pru sa mat wa wu ai. Lam e hkawm sa mat wa yang, ?Sagu Rem Ni A Dabang,? ngu nna shamying ai shara hta,
13 Yuda Hkawhkam Ahazia a kahpu kanau makyin jinghku nkau mi hte shi hkrum wu ai rai nna shanhte hpe, ?Nanhte kadai ni rai nga myit ni?,? ngu nna san wu ai.
Shaloi shanhte gaw, ?Ahazia a kahpu kanau makyin jinghku ni rai ga ai; hkawhkam jan Yezebela a kashu kasha ni hte hkawhkam wang e naw ngam nga ai dinghku masha ni hpe hkungga sa jaw na matu Yezrela mare de sa wa ga ai,? ngu nna htan ma ai.
14 Yehu gaw shi a masha ni hpe, ?Shanhte hpe chyahkrung rim la mu!,? ngu nna hkang dat wu ai. Dai rai nna shanhte mung wang rim la nhtawm dai yang na nhkun makau e yawng hkra marai mali shi lahkawng hta na langai mi hpe mung n shalawt kau dat ai sha, sat sharu kau mu ai.
15 Yehu bai pru sa wa wu yang, Rehkab a kasha Yonadab hte hkrun lam e hkrum wu ai. Yehu mung shi hpe shakram la nhtawm, ?Nang hte ngai myit mang ai lam langai sha rai nga ga ai majaw nang ngai hpe madi shadaw lu na n ni?,? ngu nna tsun wu ai.
Yonadab mung, ?Karum lu na nngai,? ngu nna htan wu ai.
Yehu gaw, ?Dai rai yang na a lata ngai hpe jaw e,? ngu nna tsun htang wu ai shaloi shan gaw lata matut nna Yehu mahtang shi hpe leng ntsa de woi jashawn la let,
16 ?Ngai kaw hkan nang nna dai Madu hta ngai gade sha kam sham nga nngai hpe nang nan mu na ndai,? ngu nna tsun htang wu ai. Dai hpang shan gaw rau sha Samari mare de jawn sa mat wa ma ai.
17 Dai yang e shan du jang, Ahab a amyu makyin jinghku ni yawng hpe langai mi mung n jahkrung da ai sha, Yehu e sat kau wu ai. Dai gaw dai Madu Elia hpe tsun da nu ai hte maren byin wa ai lam rai nga ai.
18 Yehu gaw Samari masha ni hpe shaga jahpawng tawn nhtawm, ?Hkawhkam Ahab gaw Bala karai hpe loi mi sha daw jau wu ti mung, ngai mahtang chyawm gaw grai wa daw jau na we ai.
19 Bala myihtoi ni yawng hpe mung, shi hpe nawku ai ni yawng hpe mung shaga shinggyin da mu-langai mi hpe mung ngam da lu na n rai; Bala hpe shagu hkungga kaba nawng ya na nngai majaw dai hta n shang lawm ai ni kadai mung sat kau ai hkrum na wu ai,? ngu nna tsun wu ai. (Dai gaw Bala nawku ai masha ni yawng hpe sat kau na matu Yehu maga hku nna hpaji daw hkalem ai amu rai nga ai.)
20 Dai hpang Yehu gaw, ?Bala hpe shagrau sha-a na nawku nhtoi langai hpe tsun shabra dat mu!,? ngu nna hkang dat wu ai hte maren shanhte tsun ndau shabra dat mu ai. Yehu gaw Israela mungdan ting hproi hkra dai ga hpe shana shabra dat wu ai.
21 Bala hpe nawku ai masha ni yawng sa du nga ma ai rai nna langai mi mung n hprai shajang ai hte du shajang nga ma ai. Shanhte yawng mung Bala nawku htingnu de shang ma ai rai nna nawku shara hta hpring chyat rai ma ai.
22 Dai hpang Yehu gaw nawku sa ai masha ni hpe hpun palawng galu shapraw ya na matu, chyoi pra ai hpun palawng galu ni hpe mazing hpareng ya ai hkinjawng wa hpe hkang da wu ai.
23 Dai hpang, Yehu shi nan Rehkab a kasha Yonadab hte rau nawku htingnu kata de shang mat wa nhtawm dai yang e nga ai masha ni hpe, ?Bala nawku ai ni hpe chyu sha nang e nga shangun na hte dai Madu hpe nawku ai ni kadai mung n shang lu na lam, atsawm sha hkan sawk sagawn lajang mu,? ngu nna tsun wu ai.
24 Dai hpang Bala hpe shagu hkungga nawng ya na matu mung, wan nat hkungga nawng ya na matu mung shi hte Yonadab shang mat wa ma ai. Shi gaw Bala htingnu shinggan e marai matsat shi hpe tawn da nna shanhte hpe ning ngu hkang da wu ai: ?Ndai masha ni yawng hpe nanhte sat kau na rai myit dai; shanhte hta na langai ngai hpe shalawt kau dat ai wa kadai hpe mung shi a asak a matu tinang a asak jaw ra na rai myit dai!?
25 Yehu hkungga nawng ya ngut jang, shi gaw sin langa ni hte du salang ni hpe, ?Shanhte yawng hpe shang sat kau manu; langai mi hpe pyi hkum shalawt kau dat mu,? ngu nna tsun wu ai. Shanhte shang wa nhtawm shaw da chyalu re ai nhtu ni hte shanhte yawng hpe sat kau mu ai rai nna si mang ni hpe shinggan de garawt shapraw da ma ai. Dai hpang Bala htingnu a chyoi pra ai kata gawk de shanhte shang mat wa nhtawm,
26 dai yang hkan na chyoi pra ai shadaw ni hpe la shapraw nna nat kau ma ai.
27 Shaloi shanhte gaw chyoi pra ai shadaw hte htingnu hpe run agrawp kau nhtawm htingnu hpe namdum shatai kau mu ai gaw dai ni du hkra naw nga nga ai.
28 Dai gaw Israela mung na Bala nawku ai lai hpe Yehu kaning rai shamyit jahtum kau ai lam rai nga ai.
29 Rai ti mung shi gaw Behtela hte Dan mare hta gaw sharawt da ai aja dumsu kasha ni hpe woi nawku let Israela masha ni hpe Yubak lam de woi sa wa ai Hkawhkam Yeroboam a yubak lam hkan dagraw la nga ai. Ref 10:29: 1Hk 12: 28-30.
30 Dai Madu gaw Yehu hpe, ?Ya nang chyawm gaw ngai nang hpe galaw shangun mayu ai amu magup hte maren Ahab amyu matu ni hpe galaw nit dai. Dai re ai majaw na a amyu matu hta na prat mali du hkra Israela a hkawhkam ni tai nga na mara ai gaw, ngai nang hpe ga sadi jaw nngai,? ngu nna tsun wu ai.
31 Rai ti mung Yehu gaw dai Madu Israela a Karai Kasang a Tara hpe shi a myit masin mahkra hte madat mara nga ai n rai; shing rai na malai, Israela masha ni hpe yubak lam de woi sa ai Yeroboam a arawn alai kasi hta hkan dagraw nang nga wu ai.
32 Dai aten e, dai Madu gaw Israela mungdan lamu ga masat masa hpe daw kaji kau hpang wa nu ai. Suri Hkawhkam Hazaela gaw Israela lamu ga yawng ngu na,
33 Yawdan hka a sinpraw hkran, dingdung maga Arnon hka kau na Aroera mare du hkra ngu na Gad, Rubin hte sinpraw maga de nga ai Manashe amyu bawsang ni nga ai Gilead hte Bashan mung ting lawm hkra gasat madu la wu ai.
34 Yehu galaw nu ai amu magup shagu ngu na shi a share shagan ai sat lawat ni yawng hpe Israela Hkawhkam ni a Labau Laika hta ka matsing da nga ai.
35 Shi si mat sai rai nna Samari mare e lup makoi da mu ai; shi a kasha Yehoahaza gaw shi a hkang hta hkawhkam tai wa sai.
36 Yehu gaw Samari mare e hkaw dung nna Israela hkawhkam hku hkun matsat ning tup up hkang nu ai.