1 Dai Madu gaw, ?Ngai gaw nye a amyu masha ni a akyu hpyi ga ni hpe htan ya na matu jin jin rai nga nngai, rai ti mung shanhte akyu n hpyi ma ai. Ngai hpe hkan tam na matu shanhte a matu ngai jin jin rai nga nngai, rai ti mung shanhte shakut pyi n shakut tam ma ai. ?Ndai yang e ngai nga nga nngai; ngai nang hpe karum na nngai,? ngu nna ngai shanhte hpe htan na matu tut nawng jin jin rai nga tim pyi, amyu baw gaw ngai kaw akyu hpyi yu ma ai n rai. Ref 65:1: Rom 10:20. 2 Shut hpyit amu hpe du ja ja hte galaw nna shanhte a lam hku sha hkawm nga ai nye a amyu masha ni hpe hkalum la na matu ngai tut nawng jin jin rai nga nngai. Ref 65:2: Rom 10:21. 3 Shanhte gaw kaya n chye ai sha ngai hpe masin sha a shapawt nga ma ai. Shanhte gaw chyoi pra ai sun ni hta tara maigan ni a shagu hkungga ni nawng jau nna, tara maigan ni a tawn hkungri ntsa hkan e manam pyaw ai baw nat ma ai. 4 Shanhte gaw shana e si mat sai masha ni a tsu minla ni hte ga shaga na matu lungpu hku ni hte lupwa ni de sa ma ai. Shanhte gaw wa shan sha nna, tara maigan shagu hkungga nawng jau ai hta na shan shapyaw si mai ntsin ni hpe lu ma ai. 5 Dai hpang shanhte gaw kaga ni hpe, ?Anhte kaw na kran rai mat mu; Anhte gaw nanhte a matu nau wa chyoi pra nga ga ai majaw ahtawk hkra lu na myit dai n rai!,? ngu nna tsun ma ai. Ngai gaw dai zawn re ai masha ni hpe n sharang lu nngai-shanhte hpe ninghkap na nye a masin kahtet ai gaw galoi mung n krip mat ai wan zawn rai nga li ai.

6 ?Ngai gaw shanhte hpe ari jaw na matu daw dan da chyalu rai ni ai, shanhte a ari hpe mung ka matsing da sai. Shanhte galaw kau sai amu hpe yu numtawt kau ya na nngai n rai, rai ti mung shanhte galaw shut ai yubak mara ni hte 7 shanhte a kaji kawa ni a yubak ni a matu chyawm gaw shanhte hpe bai htang jaw na nngai. Shanhte gaw tara maigan masha ni a kawng ntsa na nawku shara ni hta manam pyaw ai baw nat nna ngai hpe n shawp ai ga tsun ma ai. Dai re ai majaw, lai sai aten na shanhte a arawn alai hte maren, shanhte hpe ngai ari jaw na we ai.?

8 Dai Madu gaw, ?Kadai mung kaja ai sabyi si ni hpe n jahten ma ai, shing di na malai, shanhte gaw dai ni hte sabyi ntsin galaw ma ai. Ngai gaw nye a amyu masha ni yawng hpe jahten kau na n rai-ngai hpe daw jau ai ni hpe ngai hkye hkrang la na nngai. 9 Ngai gaw Yuda amyu bawsang hte seng ai Israela masha ni hpe shaman ya na nngai, shanhte a aru arat ni gaw nye a bum ni hpe madu na mara ai. Ngai hpe daw jau ai lata la hkrum ai nye a amyu masha ni gaw dai yang e shanu nga lu na mara ai. 10 Shanhte gaw ngai hpe nawku wa na mara ai; sinna maga de nga ai Sharon pa layang hte sinpraw maga de nga ai Tsin-Yam Tsindam Kadit ni hta shanhte a sagu hpung ni hte dumsu hpung ni hpe ushat shayaw na matu woi sa wa na mara ai. Ref 65:10: Ysh 7:24-26.

11 ?Rai ti mung, ngai hpe kau da nna nye a chyoi pra ai Bum ngu ai Ziun hpe hpa zawn n nawn nhtawm Gad hte Meni ngu ai Gam hte Auba a karai ni hpe nawku ai dai amu gaw nanhte a matu kaga ga shai wa na ra ai. 12 Dai na a Auba gaw kabring kabrawng du daw sai hkaw si hkrung si htan hte si na rai nga ai, hpa majaw nga yang, ngai nang hpe shaga yang nang n htan ndai, nang hpe ga shaga yang n madat ndai. Nang gaw nye a ga lale na hte n hkru ai amu galaw na matu lata la nga ndai. 13 Dai re ai majaw, ngai hpe nawku ai ni hte nye a ga madat mara ai ni gaw nhpaw n-ya lu lu lu sha na mara ai, rai ti mung nang gaw kawsi kyet ai hte hpang gara ai hkrum na ndai. Shanhte gaw kabu gara lu na mara ai, rai ti mung nang chyawm gaw sari jahpoi hkrum na rai ndai, ngu ngai nang hpe tsun nngai. 14 Shanhte gaw kabu gara mahkawn mangoi na mara ai, rai ti mung nang chyawm gaw myit daw ai hte jahtau hkrap na rai ndai. 15 Lata la hkrum sai nye a amyu masha ni gaw na a mying hpe dagam dala ga hku lang wa na mara ai. Tsaw Htum ai dai Madu ngai gaw nang hpe sat kau na nngai. Rai ti mung ngai gaw nye a ga madat mara ai ni hpe mying nnan jaw na nngai. 16 Ndai mung hta nga nna shaman chyeju hpyi ai wa kadai mung teng man ai Karai Kasang hta hpa nna shaman chyeju hkam la na matu hpyi na ra ai. Dagam ai wa kadai mung teng man ai Karai Kasang a mying nsang hta dagam na ra ai. Lai sai aten na tsin-yam tsindam ni gaw lai mat wa nna malap kau na mara ai.?

17 Dai Madu gaw, ?Ngai gaw ginding aga ningnan hte sumsing lamu ningnan ni hpe hpan da nga nngai. Lai sai aten na mabyin lam ni gaw atsai awai malap kau ai hkrum na ra ai. Ref 65:17: Esa 66:22; 2Pe 3:13; Shr 21:1. 18 Ngai hpan da ai lam hta htani htana kabu gara awng sharawng nga mu. Ngai hpan ai Yerusalem ningnan gaw kabu gara ai hte hpring nga na ra ai, dai hta shanu nga ai amyu masha ni mung kabu gara lu na mara ai. 19 Yerusalem hte dai hta nga ai amyu masha ni a majaw, ngai hkum nan kabu gara ai hte hpring nga na nngai. Dai mare hta hkrap ngu hkrap ngoi nga na n rai, karum la na matu saw shaga ai nsen na lu na n rai. Ref 65:19: Shr 21:4. 20 Ma chyangai ni ma prat hta galoi mung si na mara ai n rai, amyu masha ni yawng hte gaw shanhte a asak hpring hkra nga lu na mara ai. Asak latsa ning du hkra hkrung nga lu ai wa hpe pyi, ma kaji ngu nna myit la na mara ai. Dai latsa ning a shawng e si mat ai rai yang, ngai shanhte hpe ari jaw sai masat kumla tai na ra ai. 21-22 Amyu masha ni gaw dum nta ni hpe gaw gap nna dai hta e shanhte nga nga na mara ai-dai hta masha kaga rawng na n rai. Shanhte gaw sabyi sun ni galaw nna sabyi ntsin ni hpe kabu gara lu lu na mara ai, dai hpe masha kaga wa sa lu kau ya lu na n rai. Nye a amyu masha ni gaw hpun ni a asak zawn galu hkra nga lu na mara ai.Shanhte galaw ai amu ni a jaw e shanhte hpring hpring tsup tsup kabu gara lu na mara ai. 23 Shanhte galaw ai amu awng dang na mara ai, shanhte a kashu kasha ni ru yak tsin-yam tsindam hte hkrum na mara ai n rai. Ngai gaw shanhte hte shanhte a aru arat ni hpe prat mi hte prat mi shaman ya na nngai. 24 Shanhte ngai kaw akyu hpyi ai ga garai n htum yang pyi, ngai gaw shanhte a akyu hpyi ga ni hpe htan ya na nngai. 25 Chyahkyawn hte sagu kasha ni shat rau sha na mara ai; hkanghkyi ni gaw dumsu ni zawn yihku sha na mara ai, lapu ni a lusha gaw aga rai na ra ai. Ziun ngu ai nye a chyoi pra ai kawng ntsa hta, machyi shoichyum ai mung, n hkru ai lam hpa mung nga na ra ai n rai.? Ref 65:25: Esa 11:6-9.