66
1 Dai Madu gaw, ?Sumsing lamu gaw nye a tingnyang, ginding aga gaw nye a lagaw kabye lahkum rai nga ai. Dai rai yang, nye a matu kaning re ai nta nang galaw lu nga n ta? Nye a matu shanu nga na shara kaning re ai mi rai nga a ta?
2 Ngai hkum nan nga yawng danghta n-gawn tawa ting hpe hpan da ni ai! Ngai gaw shagrit shanem ai hte myit malai lu nna ngai hpe hkrit kamyin ai hte nye a ga madat mara ai ni hpe awng sharawng nga nngai.
3 ?Dai amyu masha ni gaw shanhte awng sharawng ai hte maren galaw ma ai. Shanhte gaw dumsu usu hpe shagu hkungga shatai na matu mung, shinggyim masha hpe shagu hkungga shatai na matu mung sat ma ai; shanhte gaw sagu kasha hpe shagu hkungga nawng nna gwi a du hpe gang daw ma ai; shanhte gaw shadung hkungga nawng ya ma ai, wa asai hpe mung nawng ya ma ai; shanhte gaw manam pyaw ai baw hkungga nawng ma ai, hpara sumla kaw akyu hpyi ma ai. Shanhte gaw matsat shabat re ai nawku lai ni hta sharawng awng ma ai. Dai ni yawng gaw shanhte a matu maren sha rai nga ai.
4 Dai rai nna, Ngai shaga yang kadai n htan, ngai ga shaga yang kadai n madat nga masai majaw, shanhte grai hkrit tsang nga ai tsin-yam tsindam ngai shanhte a ntsa de shapraw dat na nngai. Shanhte gaw nye a ga n madat na hte n hkru ai amu galaw na matu lata la manu ai.?
5 Shi hpe hkrit kamyin ai hte shi a ga madat mara nga ai nanhte gaw dai Madu ning nga tsun ai ga hpe madat mu: ?Nang gaw ngai hta sadi dung nga ndai majaw, na a amyu masha majing na nkau mi ngai hpe n ju ai hte nang hte hpa amu mung galaw na mara ai n rai. Shanhte gaw nang hpe ashu ai hte, ?Dai Madu gaw shi a galu kaba ai hpe madun nna nang hpe hkye la u ga, shaloi nang kabu gara ai hpe anhte mu lu n-ga,? ngu nna tsun ma ai. Rai ti mung shanhte nan kaya kahpa hkrum na mara ai!
6 Madat mu! Mare kaw na ja ja garu ai nsen, dai Nawku Htingnu na nsen gaw shi a gumlau hpyen ni hpe ari jaw nga ai dai Madu a nsen rai nga a hka!
7 ?Nye a chyoi pra ai mare gaw shinggyim machyi garai n hkrum yang akajawng sha kasha shangai ai numsha hte bung nga ai. Ref 66:7: Shr 12:5.
8 Dai zawn re ai amu kadai wa galoi mu nna na yu nga sani? Amyu baw langai gaw lani jan hta sha shaprat yu nga sani? Amyu baw mi garai n shangai yang, Ziun gaw na na wa nni nkri hkam sha na wu ai n rai.
9 Ngai gaw nye a amyu masha ni hpe shangai mahka e shanhte n shangai wa manu ga,? ngu tsun na zawn hkum myit nawn nga myit. Dai Madu tsun nu ai.
10 Yerusalem hte rau kabu mu; Ndai mare hpe tsaw ra ai
nanhte yawng hte gaw shi a matu kabu gara nga mu!
Shi a majaw sharung shayawt hkrum ai ni yawng hte e,
shi hte rau ya kabu gara nga mu!
11 Ma gaw shi kanu a lahpyen hta rawng ai zawn,
nang mung shi a ngamu ngamai lam hta kabu lu na rai ndai.
12 Dai Madu gaw, ?Ngai gaw nang hpe agrin nga ai ngamu ngamai lam jaw ya na nngai; masha amyu baw ni a sut gan gaw galoi mung n hkyet mat ai hka nu zawn nang hta lwi sa wa na ra ai. Nang gaw kanu e bau maka nna shi a lata hta pawn da nhtawm tsaw ra myit hte makrai chyai ai ma zawn tai na rin dai.
13 Kanu gaw kasha hpe shalan shabran ai zawn ngai mung nang hpe Yerusalem hta shalan shabran na nngai.
14 Ndai zawn byin ai hpe nang mu ai shaloi, nang kabu gara na ndai; dai gaw nang hpe n-gun shaja ya ai hte hkam kaja shangun na ra ai. Dai hpang nang gaw dai Madu ngai nan nye a ga madat ai ni hpe karum ai mung, nye a gumlau hpyen ni hpe ninghkap na matu nye a masin kahtet ai hpe madun dan ai mung nang chye na rin dai,? ngu nna tsun wu ai.
15 Dai Madu gaw wan hte rau du sa wa na ra ai. Shi gaw shi pawt sindawng ai ni hpe ari jaw na matu nbung laru a singkaw ni a ntsa e jawn sa wa na ra ai.
16 Shi mara tam mu ai mungkan ga na masha yawng mayawng hpe wan hte mung nhtu hte mung ari jaw na ra ai-law law wa sat kau ai hkrum na mara ai.
17 Dai Madu gaw, ?Tara maigan sumla nawku na matu shanhte hkum ni hpe jasan jaseng ai ni, chyoi pra ai sun ni de hkawm sa ai ni, wa shan, yu shan hte kaga matsat shabat re ai malu masha ni hpe lu sha nga ai ni a jahtum aten gaw ni wa ra ai.
18 Ngai gaw shanhte a myit mang ai lam ni hte shanhte a arawn alai sat lawat ni hpe chye nga nngai. Amyu baw ni mahkra a masha ni hpe zup hpawng shangun na matu ngai du sa wa nga nngai. Shanhte rau sa hpawng ai shaloi, nye a daru magam n-gun kaning re ai amu galaw lu ai hpe shanhte mu wa na mara ai,
19 shanhte hpe ari jaw ai wa ngai rai nga nngai hpe chye wa na mara ai.
?Rai ti mung, shanhte hta na nkau mi hpe ngai ngam tawn da nna, nye a mying dan hkung ai hpe n na yu ai, nye a galu kaba ai hte daru magam n-gun hpe n mu yu ai, dai ndan gap share shagan masha ni nga ai Spain, Libya hte Ludi mung ni hpang de mung, Tubala hte Grik mung hkan nga ai amyu baw ni hte sumtsan mung na masha ni hpang de mung, shanhte hpe ngai shangun dat na nngai. Shanhte gaw dai mungdan ni hta nga ai amyu baw ni hpe nye a galu kaba ai lam tsun dan na mara ai.
20 Shanhte gaw na a amyu masha ni yawng hpe ngai hpang de la sa ai kumhpa hku masha amyu baw ni a lata kaw na woi wa na mara ai. Israela masha ni gaw htung hte maren san seng ai hkungga ban ni hta lusha hkungga ni bang nna Nawku Htingnu de la sa ma ai zawn shanhte gaw dai ni hpe gumra ni, lawze ni, gawla-uk ni, hpyen leng ni hte daw htaw ai leng ni hta htaw nna nye a chyoi pra ai kawng nga ai Yerusalem de la sa na mara ai.
21 Ngai gaw shanhte hta nkau mi hpe hkinjawng ni hte Lewi masha ni shatai na nngai.
22 Ginding aga ningnan hte sumsing lamu ningnan ni gaw nye a daru magam n-gun hte grin nga na mara ai, dai zawn na a aru arat ni hte na a mying mung agrin nga na ra ai. Ref 66:22: Esa 65:17; 2Pe 3:13; Shr 21:1.
23 Shata Praw shagu hte Bansa Nhtoi shagu hta galaw ai poi hta amyu baw shagu na masha ni gaw ngai hpe nawku na matu ndai Yerusalem de sa wa na mara ai,? nga nna dai Madu tsun ai.
24 ?Shanhte pru sa wa yang, ngai hpe gumlau ai ni a moi mang ni hpe shanhte mu na mara ai. Dai ni hpe sha ai byet ni gaw galoi mung si htum mat na n rai, shanhte hpe hkru ai wan mung galoi mung kyip mat na ra ai n rai. Shanhte hpe mu ai lam gaw masha yawng mayawng a matu matsat shabat tai na ra ai.? Ref 66:24: Mrk 9:48.