1 Nang gaw hpa majaw sumsing lamu hpe gang hpaw nna n yu wa n ni? Bum ni mung nang hpe mu nna hkrit gari ai hte ashun mai nga ai. 2 Kahtet ai wan ntsa e hka prut nga ai zawn shanhte gari ashun mai nga ai. Na a gumlau hpyen ni a man e na a daru magam n-gun sa madun dan u, masha amyu baw ni hpe na a man e hkrit gari shangun u! 3 Kalang mi na aten hta, nang du sa nna anhte n myit dum ai hkrit hpa amu ni hte jahkrit yu nit dai; shaloi bum ni gaw nang hpe mu nna hkrit gari ai hte ashun ma ai. 4 Shi hpe myit mada nga ai ni a matu dai zawn re ai magam amu galaw ai nang hte bung ai Karai Kasang hpe kadai galoi mung n mu yu, n na yu ga ai. Ref 64:4: 1Ko 2:9. 5 Nang gaw ding man ai amu galaw nga ai ni hta kabu gara lam mu tam ai ni hte, shanhte asak hkrung nga na matu nang kade daram ra sharawng nga ndai hpe adum nga ai ni hpe nang hkalum la nga ndai. Nang anhte hpe masin pawt ndai, rai ti mung anhte gaw yubak matut galaw nga ga ai; na a kaba la ai sindawng kahtet ai lam madun dan nga ti mung, moi chyaloi nhkoi kaw na anhte gaw shut hpyit amu matut galaw saga ai. 6 Anhte yawng gaw yubak mara kap ai ni rai nga saga ai; anhte a kaja htum ai magam bungli ni pyi npawt kaw nna ndung hkren matsat shabat amu hkrai rai nga ai. Anhte galaw shut ai yubak mara ni a majaw, anhte gaw nyui mat nna nbung e shapoi kau ai hpun lap ni zawn rai nga ga ai. 7 Akyu hpyi let nang kaw kayin wa ai masha kadai n nga nga ai; karum la na matu nang kaw kadai n sa nga ai. Nang gaw na hkum hpe anhte kaw na makoi kau nhtawm anhte galaw ai yubak mara ni a majaw anhte hpe kau da nga nit dai.

8 Rai ti mung, nang gaw dai Madu anhte a kawa rai nga ndai. Anhte gaw kagam ga hte bung ga ai, nang gaw di bu sama wa hte bung nga ndai. Nang anhte hpe hpan da ndai, 9 dai rai nna, anhte hpe nau wa masin hkum pawt et, anhte a yubak mara ni hpe htani htana hkum dum nga et. Anhte gaw na a amyu masha ni rai nga ga ai; anhte hpe matsan dum la mi. 10 Na a chyoi pra ai mare ni gaw nam mali zawn tai mat sai; Yerusalem gaw katsi katsang hten run mat sai, 11 chyoi pra ai hte tsawm htap nna anhte a kaji kawa ni nang hpe shakawn kungdawn ai anhte a Nawku Htingnu mung wan a majaw hten mat sai. Anhte tsaw ra manoi ai shara ni yawng hten run mat sai. 12 Madu e, ndai lam ni yawng hpe nang gaw hpa n galaw ai sha nga na wu ni? Nang gaw dai lam ni hpe hpa mung n galaw ai sha anhte hkam sharang lu ai hta jan nna anhte hpe nni nkri jahkrum na ngu nu ni?