63
1 Edom mung Bozra mare kaw na du sa wa ai ndai wa gaw kadai rai nga a ni? Hkyeng ai hpun palawng hte grai hkik hkam hkra hpun nna daru magam n-gun hte n-gun atsam hte hkawm sa wa ai ndai wa gaw kadai rai nga a ni?
Dai gaw hkye hkrang la na daru magam n-gun hte shi a awng padang hpe tsun shabra na matu du sa nga ai dai Madu rai nga ai.
2 ?Shi a hpun palawng gaw sabyi ntsin galaw na matu sabyi si ni hpe kabye ai masha wa a hpun nba zawn hpa majaw grai hkyeng nga a ni??
3 Dai Madu gaw, ?Ngai gaw masha amyu baw ni hpe sabyi si ni hpe zawn kabye anut kau ni ai, kadai mung ngai hpe sa karum la ai n rai. Ngai gaw masin pawt ai hte shanhte hpe kabye mani kau nngai, shanhte a asai gaw nye a hpun palawng ni yawng hta numsha mat sai. Ref 63:3: Shr 14:20; 19:15; Shr 19:13.
4 Nye a amyu masha ni hpe hkye la na aten du nga sai; nye a gumlau hpyen ni hpe ari jaw na aten rai nga sai, ngu ngai daw dan ni ai.
5 Ngai yu dat yang, ngai hpe karum la na kadai mung n nga ai hpe mu ai shaloi ngai mau mat nngai. Rai ti mung, nye a masin kahtet ai gaw ngai hpe n-gun ja shangun ai hte ngai nan awng padang hkam la ni ai.
6 Nye a masin kahtet ai hta, ngai gaw masha amyu baw ting hpe kabye anut kau ai hte shanhte hpe gamang ayai kau ni ai. Ngai gaw shanhte a asak sai hpe ga ntsa e ru kau ni ai,? ngu nna tsun ai.
7 Ngai gaw dai Madu a n-gaw nwai ai tsaw ra myit a lam atsun nga na nngai;
anhte a matu shi galaw dan sai amu yawng a majaw ngai shi hpe shakawn kungdawn na nngai.
Shi a matsan dum ai myit hte dinggrin tsaw ra myit a majaw,
shi gaw Israela amyu masha ni hpe nhpaw n-ya shaman ya nu ai.
8 Dai Madu gaw, ?Shanhte gaw nye a amyu masha ni rai nga ma ai; shanhte ngai hpe masu hkalem na mara ai n rai,? ngu nna tsun ai. Dai rai nna shi gaw shanhte hpe
9 shanhte hkam sha ai nni nkri yawng kaw na hkye hkrang la nga ai. Dai gaw lamu kasa galaw ai n rai, rai ti mung dai Madu shi nan shanhte hpe hkye la nu ai. Shi a tsaw ra myit hte matsan dum la ai myit a jaw e, shi shanhte hpe hkye mawai la nga sai. Shi gaw lai sai aten ni hta shanhte hpe galoi mung lanu lahku lai wa nu ai,
10 rai ti mung, shanhte gaw shi hpe gumlau nna shi a chyoi pra ai wenyi hpe yawn shangun ma ai. Dai rai nna dai Madu gaw shanhte a gumlau tai mat nhtawm shanhte hpe gasat wu ai.
11 Rai ti mung, shanhte gaw lai sai aten, dai Madu a shangun ma Mawshe a nhtoi ni hpe dum ma ai rai nna shanhte gaw, ?Panglai kaw na shi a amyu masha ni a ningbaw ni hpe hkye hkrang la sai dai Madu gaw ya kanang rai nga a ta? Mawshe hpe shi a wenyi jaw ya ai dai Madu gaw kanang rai nga a ta?
12-13 Shi hkum nan a matu htani htana gumhkawng wa lu hkra, Mawshe hku nna shi a daru magam n-gun hte panglai hka hpe ga garan kau nna sung ai hka hku shi a amyu masha ni hpe woi lakawn wa ai amu kaba galaw dan sai dai Madu gaw kanang e rai nga a ta?,? ngu nna san ma ai.
Dai Madu woi lakawn wa ai majaw gumra shazai ni n kashawt n kataw ai zawn shanhte gaw galoi mung ahtu kataw nga ma ai n rai. Ref 63:12: Pru 14:21.
14 Ga sau kaja ai kadit de dumsu ni yu wa ai zawn, dai Madu gaw shi a amyu masha ni hpe bansa lam jaw nga ai. Shi gaw shi a amyu masha ni hpe lam woi nna shi a mying hpe shagrau shatsaw nu ai.
15 Madu e, na a chyoi pra ai hte hpung shingkang hta shanu nga ai sumsing lamu kaw na anhte hpe gum yu mi. Anhte a matu na a galu kaba ai tsang ai myit gaw kanang rai nga a ta? Na a daru magam n-gun kanang rai nga a ta? Na a tsaw ra myit hte matsan dum ai myit kanang rai nga a ta? Anhte hpe hpa n nawn hkum rai et.
16 Nang gaw anhte a kawa rai nga ndai. Anhte a kaji kawa ni rai nga ai Abraham hte Yaku yan gaw anhte hpe n chye mi ai, rai ti mung Madu nang gaw anhte a kawa rai nga ndai, anhte hpe tut nawng hkye mawai la ai wa mung rai nga ndai.
17 Anhte hpe na a lam ni kaw na hpa majaw shayit kau nga n ta? Anhte nang kaw na kayin mat wa hkra, anhte hpe hpa majaw du shaja ya nga n ta? Nang hpe daw jau nga ai ni a matu, na a matu tut nawng rai nga ai amyu masha ni a matu, bai wa rit.
18 Na a chyoi pra ai amyu masha, anhte gaw chyahkring mi laman, anhte a gumlau hpyen ni a gawt shapraw kau ai hkrum ga ai; shanhte gaw na a chyoi pra ai shara hpe kabye anyawp kau ma ai.
19 Nang gaw anhte hpe anhte a mung du galoi mung n tai yu ai wa zawn mung, anhte gaw na a amyu masha ni galoi mung n tai yu ai ni zawn di nga ndai.