37
(2Hk 19:1-7)
1 Hkawhkam Hezekia gaw shanhte a htawn dan ai shiga na ai hte rau shi gaw shi a hpun palawng ni hpe yawn madai ai hte gang je kau nhtawm lachyit nba bu hpun let, dai Madu a Nawku Htingnu de sa wu ai.
2 Shi gaw hkawhkam htingnu hpareng rai nga ai Eliakim, hkaw wang amu madu Shebna hte myit su hkinjawng salang ni hpe Amot a kasha Esaia hpang de shangun dat wu ai. Shanhte yawng gaw lachyit nba hpun ma ai.
3 Ndai gaw Esaia hpe sa tsun na matu shi shanhte hpe hkang dat ai ga rai nga ai: ?Dai ni na nhtoi gaw nni nkri hkrum sha ai shani rai nga ai; anhte gaw ari hkrum sha nna kaya kahpa hkrum nga saga ai. Anhte gaw ma shangai na matu jin jin rai nga sai, rai ti mung shangai lu na matu n-gun n rawng ai numsha langai hte bung nga saga ai.
4 Asuri hkawseng gaw asak hkrung nga ai Karai Kasang hpe n kaw n law di na matu shi a hpyen du wa hpe dat dat nu ai. Dai Madu na a Karai Kasang gaw dai zawn re ai n kaw n law re ai lam hpe na nna shanhte hpe shing ngu tsun sai wa hpe ari jaw u ga law. Dai rai nna naw ngam nga ai anhte a amyu masha ni a matu Karai Kasang kaw akyu hpyi ya mi.?
5 Esaia gaw Hkawhkam Hezekia kaw na shiga lu la ai shaloi,
6 shi gaw ning ngu nna bai htan let htang dat wu ai: ?Shi gaw nang hpe n hkye la lu ai ngu nna shanhte ma ga hku htawn tsun let Asuri masha ni nang hpe n jahkrit kajawng shangun u ga, dai Madu gaw nang hpe tsun nga ai.
7 Dai Madu gaw hkawseng wa hpe htingwan shiga na shangun nhtawm shi a mungdan de bai nhtang wa shangun na ra ai, dai Madu gaw shi hpe dai shara hta sat kau na wu ai.?
(2Hk 19:8-19)
8 Hkawseng wa Lahkisha kaw nna pru wa nhtawm, Libna mare makau e majan gasat nga ai lam hpe Asuri hpyen du wa chye nga ai. Shi gaw dai shara de sa wa nna shi hte sa bawngban jahkrup wu ai.
9 Ehtiopi Hkawhkam Tirhaka gaw Egutu hpyen luksuk woi nna shanhte hpe gasat na matu lung wa nga ai shiga Asuri masha ni kaw hkrang pru wa nga ai. Asuri hkawseng wa dai shiga na ai shaloi, shi gaw Yuda Hkawhkam Hezekia hpang de ning ngu ai laika langai shana dat wu ai.
10 ?Nang gaw nye a lata de n hkrat mat na re nga nna nang kam hpa nga ai karai gaw nang hpe tsun nu ai, rai ti mung dai ga nang hpe n hkalem kau u ga.
11 Asuri hkawseng gaw kaning re ai mungdan hpe rai tim jahten kau na matu shi daw dan ai amu hpe shi galaw nga ai lam hpe nang na yu nga ndai. Nang hprawng lawt lu na re ngu nna myit nawn nga n ni?
12 Nye a kaji kawa ni gaw Gozan, Haran, hte Rezep mare ni hpe jahten kau nna Telesa mung hta nga ai Behteden masha ni hpe sat kau manu ai, shanhte a karai ni kadai mung shanhte hpe n lu hkye la ma ai.
13 Hamat, Arpad, Sehparim, Hena, hte Iwa mare ni a hkawhkam ni kanang nga nga ma ta?
14 Hkawhkam Hezekia gaw kasa ni kaw na laika la nhtawm dai hpe hti wu ai. Dai hpang shi gaw Nawku Htingnu de sa nhtawm dai shara dai Madu a man e laika tawn da nna,
15 ning ngu akyu hpyi wu ai:
16 ?Singkaw tu ai hkrung kanu ni a ntsa e dung nga ai Chyahtum Chyalai N-gun rawng nga ai dai Madu Israela a Karai Kasang e, nang gaw mungkan ga na mungdan yawng mayawng hpe up ai Karai Kasang nang chyu sha rai nga ndai. Nang gaw ginding aga hte sumsing lamu hpe hpan da nga ndai. Ref 37:16: Pru 25:22.
17 Ya chyawm gaw, Madu e, anhte a ga na ya nna anhte hta hpa byin nga ai lam hpe mada yu u. Ahkrung nga ai Karai Kasang nang hpe Senahkerib n kaw n law nga nna tsun nga ai ga yawng mayawng hpe madat u law.
18 Madu e, Asuri hkawseng ni masha amyu baw law law hpe jahten kau nna shanhte a mungdan ni hpe katsi katsang shara shatai kau ma ai hpe mung,
19 karai ni n rai nga ai shanhte a karai ni hpe nat kau ma ai; dai ni gaw masha a lata hte galaw ai hpun nlung hpara sumla ni sha rai nga ai hpe anhte yawng chye ga ai.
20 Ya chyawm gaw, Madu anhte a Karai Kasang e, Asuri masha ni a lata kaw na anhte hpe hkye mawai la mi, shaloi mungkan ga na masha amyu baw ni yawng gaw nang chyu sha Karai Kasang rai nga ai hpe chye lu na mara ai.?
(2Hk 19:20-37)
21 Dai hpang Esaia gaw hkawhkam Hezekia hpang de shiga shana dat wu ai; dai gaw hkawhkam wa a akyu hpyi ga hpe madat ya nna
22 dai Madu gaw, ?Senahkerib e, Yerusalem mare gaw nang hpe mani ai hte mani asawng nga ai.
23 Kadai hpe nang n kaw n law di nna asawng kau nga n ni? Nang gaw ngai, Israela a chyoi pra ai Karai Kasang hpe n gawn n sawn di kau nit dai.
24 Nang gaw na a hpyen leng ni yawng hte tsaw htum ai Lebanon bum ni hpe ka-up la lu nit dai lam dai hpe shakawng dan na matu na a shangun ma ni hpe shangun dat nga ndai. Dai yang e galu htum ai arit hpun ni hte preng tsawm ai marau hpun ni hpe kran kadawng lu ai lam hpe mung, maling htinggram a htat dik ai daw ni de nang shang lu ai lam hpe mung shakawng dan nga ndai.
25 Nang gaw maigan mung ni hkan hka htung ni htu nna hka lu lu ai hpe mung, na a hpyenla ni a lagaw ni hte Nila hka nu hpe kabye jahkraw ai hpe mung shakawng nga ndai.
26 ?Ndai lam mahkra hpe moi chyaloi nhkoi kaw nna ngai shatawng shada nga nngai hpe nang galoi mung n na yu n ni? Ya mung dai amu ni hpe ngai matut galaw nga nngai. Ngai gaw nang hpe bunghku kum ai mare ni hpe nlung sumpum shatai kau na daru magam n-gun jaw ni ai.
27 Dai yang hkan nga ai masha ni gaw n-gun atsam kata rai ma ai; shanhte gaw hkrit gari ai hte sai kajawng nga ma ai. Shanhte yawng gaw pa layang hta tu ai tsingdu tsingman shing n rai nta ntsa e tu ai tsing hpe kahtet ai sinpraw nbung e dai ni hpe ahpawt kau ai zawn rai ma ai.
28 ?Rai ti mung ngai gaw nang hte seng ai nang hpa galaw nna gara de hkawm sa ai lam magup hpe chye nngai. Nang ngai hpe kade daram n-yun bu ai hpe mung ngai chye nngai.
29 Na a n-yun bu ai shiga hte na a gumrawng gumtawng ai ga ni hpe ngai lu la nngai, ya chyawm gaw, na ladi hta lashoi shoi ya nna na a n-gup hta runghtung bang let, nang du sa wa ai lam hku bai nhtang mat wa shangun na de ai.?
30 Dai hpang Esaia gaw Hkawhkam Hezekia gaw, ?Ndai gaw byin wa na ra ai lam a kumla langai rai nga ai. Dai ning hte htaning du hkra, nang gaw sha na nsi nhpan hpe sha lu la na rai ndai, rai ti mung hpang shaning kaw nna gaw, nsi naisi ni hpe nang hkai lu nna dai hpe sha lu na rin dai. Sabyi ru ni hpe mung nang hkai nna sabyi si ni di sha lu na ra ai.
31 Yuda mung hta naw ngam nga ai ni gaw ga kata de sung sung ru jung nna asi si kung dam wa ai hpun zawn gumring gumrat wa na ra ai.
32 Yerusalem hte Ziun Bum ntsa hta naw ngam nga ai amyu masha ni nga nga na mara ai, hpa majaw nga yang, Chyahtum Chyalai N-gun rawng ai dai Madu gaw ndai hku byin shangun na myit daw dan da nu ai.
33 ?Ndai gaw Asuri hkawseng hte seng nna dai Madu tsun nu ai ga rai nga ai: ?Shi gaw ndai mare de shang lu na n rai, dai mare kata de pala langai pyi gap bang lu na n rai. Hpyen ninggang hte re ai hpyenla ni kadai mung dai mare de shani sa wa lu na n rai, kaduk ni hpe mung htu gawan da lu na n rai.
34 Shi gaw ndai mare de n shang ai sha, shi sa wa ai lam hku nan shi bai nhtang wa ra na ra ai. Dai Madu ngai nan tsun ni ai.
35 Nye a arawng sadang a matu mung, nye a shangun ma Dawi hpe ngai jaw ai ga sadi a majaw mung, ndai mare hpe shadaw shangang nna dai hpe makawp maga na nngai.
36 Dai Madu a lamu kasa langai gaw Asuri ni nga ai dap de sa nna hpyenla 185,000 hte hpe sat kau wu ai. Hpang shani jahpawt jau jau aten hta, shanhte yawng gaw dai shara e si taw nga ma ai.
37 Dai hpang Asuri hkawseng Senahkerib gaw htingnut mat wa nna Ninewe mare de nhtang mat wa wu ai.
38 Lani mi na aten hta, shi gaw shi a hpara Nisrok a htingnu kata hta nawku nga yang, shi a kasha Adramelek hte Shareze yan gaw shan a nhtu hte shi hpe kahtam sat kau da nna, Ararat mung de hprawng mat wa ma ai. Kaga shi a shadang sha ngu na Esahadon mahtang shi a tingnyang hta hkaw matut dung nga ai.