38
(2Hk 20:1-11; 2Hl 32:24-26)
1 Dai aten hte yang, Hkawhkam Hezekia gaw machyi hkrum ai rai nna ganoi si mat hkra rai nga wu ai. Amot a kasha myihtoi Esaia gaw shi hpe sa hkrum nna, ?Nang gaw bai hkam kaja wa na n rai sai majaw lam shagu kup kup tsup tsup lajang tawn nhtawm, si na matu jin jin di da u, nga nna dai Madu nang hpe tsun nga ai,? ngu nna tsun wu ai.
2 Hezekia gaw shakum de myi man yawng nna ning ngu akyu hpyi wu ai:
3 ?Madu e, ngai gaw nang hpe kangka ai hte sadi dung let daw jau ni ai, nang ngai hpe galaw shangun mayu ai amu hpe tut nawng shakut galaw ni ai amu ni hpe dum ya e law. Shi gaw ahkup ahka nga hkra jahtau hkrap hpang wa wu ai.
4 Dai hpang dai Madu gaw Esaia hpe Hezekia hpang de nhtang sa nna ning ngu tsun na matu hkang dat wu ai:
5 ?Dai Madu na a nji nwa Dawi a Karai Kasang ngai gaw na a akyu hpyi ga hpe na ni ai; na a myi prwi ni hpe mu ni ai; ngai nang hpe asak shi manga ning jat ya na nngai.
6 Ngai gaw nang hpe mung, ndai Yerusalem mare hpe mung Asuri hkawseng wa a lata kaw na hkye mawai la na nngai, ngai gaw ndai mare hpe matut nna makawp maga na nngai.?
21 Esaia gaw hkawhkam wa hpe shi a shakrwi hta maihpang si hpe gumchya la nna up tawn da ai shaloi, shi hkam kaja wa lu na ra ai, ngu tsun yu nu ai.
22 Dai hpang Hkawhkam Hezekia gaw, ?Nawku Htingnu de ngai sa wa na gaw kaning re ai sakse kumla rai nga a ta?,? ngu nna san yu nu ai.
7 Esaia gaw, ?Dai Madu gaw shi a ga sadi shatup na matu sakse tai na kumla langai nang hpe jaw na ra ai.
8 Hkawhkam Ahaza gap da ai lakang ntsa hta dai Madu gaw shingna n-gam shi htingnut shangun na ra ai,? ngu nna tsun htang wu ai. Dai shingna gaw hpang de n-gam shi htingnut mat nga ai.
9 Hezekia machyi mat ai hpang shi gaw ndai shakawn kungdawn mahkawn ga hpe ka wu ai:
10 Ngai gaw asak hpungngang aten e
Katsan ga de sa mat wa nna
Galoi mung asak bai hkrun na n rai ni ai ngu myit nawn la nngai.
11 Ngai gaw ndai ahkrung nga ai mungkan ga hta
Dai Madu hpe mung, hkrung nga ai masha kadai hpe mung
Galoi mung bai mu lu sana n rai, ngu myit nawn kau nngai.
12 Sum run hpya kau hkrum ai zawn,
Da lang kaw na sumpan rep la kau hkrum ai zawn,
Nye a asak sumri dan kau hkrum ai hte htum mat nga sai.
Karai Kasang gaw nye a asak hpe jahtum kau ya nga sai ngu, ngai myit nawn kau nngai.
13 Ngai gaw shana tup nchyi nmu hte marawn hkrap nngai,
Hkanghkyi gaw nye a nrut nra ni hpe agrawp kau ya ai zawn
Karai Kasang gaw nye a asak hpe jahtum kau ya nga sai ngu, ngai myit nawn kau we ai.
14 Nye a nsen gaw kaji nna kya nga li ai,
Ngai gaw hkrudu zawn madai nngai.
Nye a myi ni sumsing lamu de mada yu nna hki ba mat sali ai.
Dai Madu gaw ngai hpe ndai ru tsang yawng hta na hkye mawai la nga ai.
15 Ngai hpa tsun lu na rai ta? Dai Madu gaw ndai amu galaw nu ai.
Nye a myit masin nni nkri hkrum nga ai, ngai n lu yup nngai.
16 Madu e, Ngai gaw na a matu, na a matu chyu sha asak hkrung nga na nngai;
Ngai hpe shamai shatsai e, ngai asak hkrung nga n-ga law.
17 Nye a nchyi nmu re ai gaw ngwi pyaw sim sa wa na ra ai.
Nang gaw nye a asak hpe hkrit hpa yawng kaw na hkye la nga ndai;
Nang gaw nye a yubak mara yawng hpe raw ya nga ndai.
18 Katsan ga na masha kadai mung nang hpe shakawn kungdawn lu ai n rai;
Si hkrung si htan gaw na a sadi sahka hpe kam ai n rai.
19 Ya ngai nang hpe shakawn kungdawn ai zawn,
Asak hkrung nga ai ni nang hpe shakawn kungdawn ma ai.
Kanu kawa ni gaw nang kade wa kangka nga ai lam shanhte a kashu kasha ni hpe tsun dan ma ai.
20 Madu e, nang gaw ngai hpe shamai shatsai la nit dai.
Anhte gaw sumpyi ni dum nna na a shakawn kungdawn ga hpe mahkawn mangoi na ga ai,
Anhte ahkrung nga dingsa na a Nawku Htingnu hta mahkawn shakawn kungdawn nga na ga ai.