36
(2Hk 18:13-27; 2Hl 32:1-19)
1 Yuda hkawhkam Hezekia hkaw dung ai shi mali ning hta, Asuri hkawseng Senahkerib gaw Yuda mung na bunghku kum da ai mare ni hpe gasat nna dai ni hpe madu la kau wu ai.
2 Dai hpang shi gaw shi a hpyen du wa hpe Lahkisha kaw nna Yerusalem de hpyen luksuk kaba hte sa nna Hkawhkam Hezekia hpe asum hkam shangun na matu hkang dat wu ai. Dai hpyen du wa gaw hpun nba hkrut ai wa a shara, lahta hka lawng kaw nna hka len yu wa ai namhkawng makau na nmaw lam hpe madu da nga ai.
3 Yuda masha masum gaw shi hte hkrum na matu pru sa wa ma ai: dai ni gaw hkawhkam htingnu hpe hpareng ai du salang ngu ai Hilkia a kasha Eliakim, hkawhkam hkaw amu madu Shebna hte labau mazing lit hkam ngu ai Asap a kasha Yoa ni rai ma ai.
4 Asuri hpyen du wa gaw shanhte hpe, Hkawhkam Hezekia gaw hpa baw hta dai daram shamyet shanat nga ai hpe hkawseng wa chye mayu ai lam tsun dan wu ai.
5 Shi gaw, ?N-gup aga ni gaw hpyen zai ladat hte hpyen n-gun lagaw a malai asung mai jashawn nga ai ngu, nanhte myit nawn nga myit ni? Asuri hpe gumlau na, nang hpe karum la na kadai wa rai na nanhte myit yu nga myit ni?
6 Nanhte gaw nanhte hpe karum la na matu Egutu hpe myit mada nga myit dai, rai ti mung dai gaw mai-aw hpe dawhkrawng zawn lang ai hte bung na ra ai. Dai gaw daw mat nna na a lata hpe ju htinggrang ya na ra ai. Dai gaw Egutu hkawhkam wa kaw shamyet shanat ai ni kadai hta mung dai zawn hkrum hkra na ra ai,? ngu nna hkang dat wu ai.
7 Asuri hpyen du wa gaw matut nna, ?Nanhte gaw dai Madu nanhte a Karai Kasang hta shamyet shanat nga ga ai ngu, ngai hpe tsun na myit ni? Dai gaw dai Madu a nawku shara ni hte tawn hkungri ni hpe Hezekia jahten kau ai shaloi shi gaw Yuda hte Yerusalem amyu masha ni hpe tawn hkungri langai hta sha nawku na lam tsun nu ai.
8 Ngai gaw hkawseng wa a mying hta nanhte hte manu dara na nngai. Nanhte gumra jawn masha law law lu tam ai rai yang, ngai nanhte hpe jawn gumra hkying lahkawng jaw na nngai.
9 Nanhte gaw nem htum ai Asuri du salang hte pyi n lu shabung ai mi, Egutu masha ni nanhte hpang de hpyen leng ni hte jawn gumra ni shangun dat ya na myit mada nga myit ni?
10 Dai Madu a karum la lam n nga ai sha na a mungdan hpe gasat nna jahten kau na re ngu, nang myit nawn da wu ni? Dai Madu nan dai mungdan hpe gasat nna jahten kau na matu ngai hpe tsun ni ai,? ngu wu ai.
11 Dai hpang Eliakim, Shebna hte Yoa ni gaw hpyen du wa hpe, ?Anhte hpe Aramik ga hte shaga mi. Anhte dai ga chye na ga ai. Hebre ga hte hkum shaga mi; bunghku ntsa e nga nga ai ni yawng madat nga ma ai,? ngu nna tsun ma ai.
12 Shi gaw, ?Nanhte hte hkawhkam wa hpe chyu sha ndai lam yawng mayawng tsun dan na matu, hkawseng wa ngai hpe shangun dat ai re ngu myit nawn da mu ni? Ngai gaw nanhte zawn tinang a hkyi sha nna tinang a jit lu na rai nga ai dai bunghku ntsa e dung nga ai amyu masha ni hpe mung tsun nga nngai,? ngu nna htang tsun wu ai.
13 Dai hpang hpyen du wa rawt tsap nna Hebre ga hte, ?Asuri hkawseng nanhte hpe tsun nga ai ga hpe madat mu.
14 Hezekia gaw nanhte hpe n hkalem kau u ga, Hezekia gaw nanhte hpe n lu hkye la nga ai, ngu nna shi nanhte hpe sadi jaw nga ai.
15 Dai Madu hta shamyet shanat nga na matu shi nanhte hpe n lau la shangun u ga. Dai Madu gaw nanhte hpe hkye la nna nanhte a mare zing la rai nga ai anhte a Asuri hpyen luksuk hpe shi jahkring kau ya na ra ai ngu hkum myit nawn la myit.
16 Hezekia a ga hpe hkum madat myit! Asuri hkawseng gaw dai mare kaw na pru wa nhtawm lata sharawt asum jaw na matu nanhte hpe hkang da nga ai. Nanhte yawng hte gaw tinang a sabyi ru ni kaw na sabyi si ni, tinang a hpun ni kaw na lakum si ni di sha, tinang a hka htung ni kaw na hka ntsin lu lu na ahkang lu na rai myit dai.
17 Dai hpang hkawseng wa gaw sa nna nanhte a mungdan hte bung ai kaga nga shara bai lajang ya na ra ai; dai shara hta nanhte gaw sabyi sun ni kaw na sabyi ntsin, muk kabaw na matu nai mam nsi naisi sha lu na rai myit dai.
18 Dai Madu gaw nanhte hpe hkye mawai la na ra ai, nga nna Hezekia gaw myit n su ai hku tsun ai ga hta n kadawng bang hkrup myit ga. Masha amyu baw ni a karai ni shanhte a mungdan ni hpe Asuri hkawseng a lata kaw na hkye mawai la yu manu sai kun?
19 Hamat hte Arpad yan a karai ni gaw ya kanang nga nga ma ta? Sehparim a karai ni kanang rai nga ma ta? Kadai wa Samari hpe hkye mawai la yu sani?
20 Ndai mungdan ni yawng na kaning re ai karai ni gaw shanhte a mungdan hpe hkawseng a lata kaw na galoi hkan hkye la yu masai kun? Dai re ai mi, nanhte gaw dai Madu Yerusalem hpe hkye la lu nga ai ngu myit la nga myit ni?,? ngu ja ja jahtau tsun wu ai.
21 Hkawhkam Hezekia shanhte hpe tsun da sai hte maren, amyu masha ni asim sha nga ma ai, shanhte gaw ga hkaw mi mung n tsun ma ai.
22 Dai hpang Eliakim, Shebna hte Yoa ni gaw yawn madai ai hte shanhte a bu hpun palawng ni hpe gang je kau ai hte Asuri hpyen du wa kaning nga tsun sai ga hkawhkam wa hpang de shiga wa shana ya ma ai.