11
1 Dai rai nna ngai gaw Hkristu a kasi hpe la ai zawn, nanhte mung nye a
kasi hpe la mu.Ref 11:1: Ehp 5:1; Hpl 3:17: 2Ht 3:9.
2 Nanhte gaw lam shagu hta e ngai hpe adum nga nna, ngai nanhte hpe jaw da
ai matsun maroi ga hte maren, nanhte
hkan sa galaw myit dai majaw, ngai
nanhte hpe shakawn made ai.
3 Rai ti mung, lasha nlang hte a baw gaw, Hkristu rai nga ai, numsha a
baw chyawm gaw lasha rai nga ai,
Hkristu a baw chyawm gaw Karai Kasang
rai nga ai lam ngai nanhte hpe chye
na shangun mayu made ai.
4 Kadai lasha mung akyu hpyi yang, shing n rai, shawa nawku hpawng
hta Karai Kasang a mungga htawn
tsun ai shaloi, baw magap nga a
yang gaw, tinang a baw a arawng
jahpoi nga ai.
5 Kadai numsha mung akyu hpyi yang, shing n rai shawa nawku hpawng kaw
mungga htawn tsun nga ai shaloi,
baw n magap a yang gaw, madu wa a
arawng hpe jahpoi nga ai; shi gaw
baw shangun shakrin kau ai num
langai mi hte hpa n shai nga ai.
6 Numsha gaw baw n magap na rai yang, kara mung doi kau u ga; rai ti mung,
kara doi na, shing n rai, baw shangun
na gaw, numsha a matu arawng jahpoi
ai lam rai nga yang gaw, shi baw
magap nga u ga.
7 Lasha chyawm gaw Karai Kasang a hkrang bung sumla hte hpung
shingkang nsam shapraw ai wa
rai nga ai majaw baw magap na
n sut nga ai. Numsha mahtang
gaw lasha a hpung shingkang
nsam shapraw nga ai.
Ref 11:7: Nin 1:26-27; 5:1; 9:6.
8 Hpa majaw nga yang, lasha gaw numsha kaw na hpan da sai n rai,
numsha mahtang lasha kaw na rai
nga ai.Ref 11:8: Nin 2:21-22.
9 Dai lasha mung numsha a matu hpan da wu ai n rai, numsha hpe mahtang
dai lasha a matu hpan da wu ai.
10 Dai rai nna, lamu kasa ni hpe hkungga ai hku nna numsha gaw tinang a ntsa e
madu wa up nga ai ngu ai kumla shapraw
na matu shi a baw magap na htuk nga ai.
11 Rai ti mung, dai Madu hte anhte a kanawn mazum asak hkrung ai lam hta
lasha gaw numsha n lawm yang n mai
nga ai hte maren, numsha mung lasha
n lawm yang n mai nga ai.
12 Hpa majaw nga yang, numsha gaw lasha kaw na hpan da sai rai ti mung, lasha
gaw numsha kaw na shangai wa ai wa rai
nga ai; dai hta n ga, yawng mayawng
hpe byin tai wa shangun ai Madu gaw
Karai Kasang nan rai nga ai.
13 Nanhte gaw tinang dai myit aru yu mu; Numsha gaw baw n magap ai sha Karai
Kasang hpe nawku ai shawa hpawng kaw
akyu hpyi yang htuk nga ai kun?
14 Lasha gaw kara galu madat yang, shi a matu arawng hpoi lam rai nga ai gaw,
shingra maka e nan nanhte hpe madun
dan nga ai n rai ni?
15 Rai ti mung, numsha mahtang gaw kara madat yang shi a tsawm htap ai lam
rai nga lu ai. Shi a kara galu gaw
shi a baw magap tai na matu jaw da
nu ai.
16 Rai ti mung marai langai ngai, dai lam hte seng nna ndang kalang hkat
mayu dam a yang gaw, anhte hta mung,
Karai Kasang a hpung ni hta mung,
nawku daw jau ai hpawng hta, htung
lai kaga n nga ai, ngu nna dai wa hpe
ngai tsun na we ai.
(Mat 26:26-29; Mrk 14:22-25; Luk 22:14-20)
17 Nanhte nawku daw jau na matu hpawng ai zuphpawng ni gaw kaja wa akyu jat
na matu hpawng myit dai n rai, akyu
yawm na hku hpawng myit dai majaw,
lawu de na matsun da ai lam ni hta
ngai nanhte hpe shakawn made ai n rai.
18 Langai ngu na hta nanhte a hpung zuphpawng ni hta myit n hkrum ninghkap
ai ni nga ai lam ngai na nngai; dai
mung, daw chyen mi gaw jaw ai ngu nna
ngai kam nngai.
19 (Nanhte hta hka bra wa ai lam byin na sha rai nga ai. Shaloi she kadai
ni gaw jaw ai maga rai nga ai ngu ai
teng man ai lam asan sha dan pru wa
na ra ai.)
20 Dai re ai majaw, nanhte rau hpawng ai shaloi, dai Madu a Shana Shat sha na
matu hpawng nga myit dai n rai.
21 Hpa majaw nga yang, nanhte sha ai shaloi, tinang a lusha tinang hkrai
sha myit dai, nkau mi gaw kawsi nga
ai, nkau mi gaw sabyi chyaru nang
ai ni gaw nang rai nga myit dai.
22 Ataw, sha na lu na matu tinang a nta n lu myit ni? Shing n rai Karai Kasang
a Hpung hpe n gawn n sawn jahpoi asawng
nna, n lu n su ai ni hpe kaya jahkrum
ai ga rai myit ni? Ngai nanhte hpe ndai
lam hte seng nna kaning ngu tsun na ra
ai ngu nna nanhte myit mada myit ta?
Ngai nanhte hpe shakawn na rai ni? Kaja
wa nanhte hpe ngai shakawn na made ai
n rai.
23 Hpa majaw nga yang, ya ngai nanhte hpe shalai ap ya ai sharin shaga ai
lam gaw dai Madu kaw na ngai hkam
la se ai: dai gaw, hpyen ni a lata
de ap kau hkrum na shana e, Madu Yesu
gaw muk hpe la nna,
24 chyeju shakawn ngut jang, muk hpe ahkyep alep nhtawm, ?Ndai gaw nanhte
a matu ya kau ai nye a hkum rai nga
li ai, ngai hpe adum nga na matu ndai
galaw mu,? ngu nna tsun mu ai.
25 Dai hte maren, Shana Shat sha ngut jang, gawm hpe mung shi la nhtawm,
?Ndai gawm gaw nye a sai hte dazik
dawk nna gaw da ai Karai Kasang a ga
shaka ningnan rai nga ai, ndai gawm
kaw na sabyi lu ai ten shagu ngai
hpe adum nga na matu ndai galaw mu,?
ngu nna tsun mu ai.
26 Nanhte gaw galoi mung ndai muk sha nna ndai gawm hta na sabyi hpe
lu ai ten shagu dai Madu a si hkam ai
lam hpe, shi bai du sa ai ten du hkra
sakse hkam tsun shana ya ai lachyum
rai nga ai.
27 Dai rai nna, kadai rai ti mung, n ging n dan ai hte dai Madu a muk
sha nna gawm hta na lu a yang gaw,
dai Madu a hkum hte asai hpe shut
kau da wu ai.
28 Dai majaw kadai wa mung, tinang hkum hpe shawng san dinglik yu nhtawm, dai
muk sha nna dai gawm hta na lu u ga.
29 Hpa majaw nga yang, dai muk sha nna dai gawm hta na lu ai shaloi, dai
Madu a hkum hkrang a lachyum hpe n
chye na ai wa gaw, tinang dai tara
dara la ai hku lu sha nga ai.
30 Dai re ai majaw, nanhte hta na n-gun kya ai hte n hkam kaja ai masha law
law wa nga nga ma ai, si mat ai ni
mung tsawm ra wa rai nga ma ai.
31 Anhte gaw tinang dai shawng gawn dinglik yu ga yang gaw, Karai
Kasang a jeyang daw dan ai hkrum
na ga ai n rai.
32 Rai ti mung, anhte hpe ndai zawn Karai Kasang e jeyang daw dan nna
ari jaw ai lam gaw, anhte hpe mungkan
masha ni hte rau daw dan n hkrum
shangun na matu sharin shaga ai lam
rai nga ai.
33 Dai rai nna, nye a hpu nau ni e, Madu a Shana Shat Sha Poi sha na matu nanhte
zuphpawng nga myit yang gaw, nanhte
shada da ala nga mu.
34 Dai rai nna, Madu a Shana Shat Sha Poi sha na matu nanhte zuphpawng nga
myit yang, Karai Kasang a tara dara
ai hkrum na matu n rai u ga, masha
langai ngai kawsi a yang gaw, nta e
sha la u ga. Kaga ra ai lam ni hte
seng nna ngai du sa ai shaloi she
lajang sanglang na we ai.